No Ũkĩlye Vinya Kĩmanyĩo kya Kũnyw’a Sikala

KĨLA kĩtialĩte yu nĩ ‘kwĩnenga vinya na ũyĩka kĩla kyaĩle.’ (1 Mavinda 28:10) Nĩ matambya meva ma mũthya ũtonya kwosa ũkethĩa nĩ laisi mũnango kwaku kũkĩlya vinya kĩmanyĩo kya kũnyw’a sikala?

Tw’a matukũ ala ũkwenda kũeka. Mũvea wa ũiiti wa Amelika wĩtawa U.S. Department of Health and Human Services, waĩtye kana mũndũ atw’a kũekana na kĩmanyĩo kya kũnyw’a sikala, aĩle kwĩka ũu syumwa ilĩ ite nthelu. Na kĩtumi nũndũ kwĩka ũu na mĩtũkĩ no kũũtetheesye kwĩanĩsya ũtwi waku wendi ũla wĩ naw’o ũtanaoleka. Tavya anyanyau matukũ ala ũtw’ĩte kũeka sikala, na ndũkatate kũkũĩĩsya o na maũndũ maku maalyũka.

Andĩka kathangũ ũtonya kũkuaa kĩla ĩvinda ka kũũlilikany’a ũtwi waku. No ũandĩke maũndũ aa me vaa ĩtheo, vamwe na ũvoo ũngĩ ũtonya kũlũlũmĩĩlya wendi waku wa kũeka sikala:

● Itumi syaku sya kũeka kũnyw’a sikala

● Namba sya simũ sya andũ ũtonya kũkũnĩa mosũanĩo ma kũnyw’a sikala mooka kĩlĩkonĩ

● Motao ũtonya kũlilikanaa, ala matonya kũũtetheesya ũekane na kĩmanyĩo kya kũnyw’a sikala, ta kwa ngelekany’o, ĩandĩko ya Akalatia 5:22, 23, na angĩ matonya kũũtetheesya

Kuaa kathangũ kaũ kĩla ĩvinda na ũikasomaa mavinda kauta kwa mũthenya. O na waeka kũnyw’a sikala, endeea kũkuaa kathangũ kau na ũikasomaa yĩla weew’a ta ũkwenda kũsyokea kĩmanyĩo kĩu

Ambĩĩa kũmbany’a kĩlĩko kyaku kwĩ tene. O ũndũ mũthenya ũla ũtw’ĩte kũeka kũnyw’a sikala ũthengeee, ambĩĩa kwĩvathana na maũndũ ala matumaa wĩthĩwa na wendi wa kũnyw’a sikala. Ta kwa ngelekany’o, ethĩwa ũnyusaa sikala waamũka oou, eteelaa ĩsaa yambe kũvĩta ũtanamba kũmĩnyw’a. Ethĩwa kaingĩ ũnyusaa sikala ũiya kana wamina kũya oou, tata ũvĩndũe mũtuo ũsu. Ndũkaendae kũla angĩ manyw’ĩĩaa sikala. Yĩla wĩ weka, ĩmanyĩsye kwaasya na wasya mũnene: “Aiee. Nĩnĩnaekie sikala.” Kwosa matambya ta asu no kũtetheesye kwĩyũmbany’a kwondũ wa mũthenya ũla ũtw’ĩte kũeka kũnyw’a sikala. O na makaũlilikanasya kana o mĩtũkĩ ndũkambĩla ĩngĩ kũnyw’a sikala.

Ĩka mĩvango ya kũũtetheesya waeka ndũkaleelye ũtwi waku. O ũndũ mũthenya ũla ũtw’ĩte kũeka kũnyw’a sikala ũthengeee, ambĩĩa kũmbany’a twĩndũ twa kũtanyukaa yĩla wakwatwa nĩ mũmeo wa sikala ta: nzũũ kalanga, sitingamu, na syĩndũ ĩngĩ ta ĩsu. Lilikanasya andũ maku ma mũsyĩ na anyanya ĩũlũ wa mũthenya ũla ũtw’ĩte kũeka kũnyw’a sikala, na ũimatavya ũndũ matonya kũũtetheesya ũlũlũmĩĩlye ũtwi waku. Vatiele mũthenya ũmwe, vetanga vyũ syĩndũ ila ĩtonya ũkũkĩlĩlya mũmeo wa kũnyw’a sikala ta syĩndũ ĩla wĩkĩaa mũu wa sikala, ilĩvĩtĩ, sikala itonya kwĩthĩwa ĩlekangĩtw’e nyũmba, vala ũthũkũmĩaa, ngalĩnĩ, kana syĩ ngusunĩ. Na kĩtumi nũndũ ve vinya mũnango kwĩa mũnyanyau aũnenge sikala kana aũthooee ĩmwe kwĩ kũmyosa mesanĩ kwaku. O na ĩngĩ, endeea kũvoya Ngai aũtetheesye na ũyĩka ũu na kĩthing’ĩĩsyo mũnango wamina kũtila sikala oou.—Luka 11:13

Andũ aingĩ nĩmaekie sikala vyũ o na kau ĩvinda yĩmwe nĩyamasumbĩkĩte ta mũnyanya mũthũku na ũtesa kũmatethya. O naku no ũeke sikala. Na weeka ũu, ũkethĩawa na mwĩĩ mũseo na kĩla ĩvinda ũkatanaa nũndũ nĩwathaiw’e kuma ũkombonĩ ũsu.

[Visa]

Kũaa kathangũ kala ũandĩkĩte maũndũ ma ũkũtetheesya ũeke kũnyw’a sikala na ũikasomaa mavinda maingĩ kĩla mũthenya.