O na kau Mbivilia ti ĩvuku ya ũiiti, yĩ na ũtao ũtonya kũtũtethya. Ũtao ũsu no ũtetheesye mũndũ ũkũngʼangʼana na mathĩna ma kĩlĩko. Kwoona ngelekanyʼo imwe.

“Andũ mate awau mayĩthĩawa na vata wa mũiiti, ĩndĩ no ala awau.”—MATHAYO 9:12.

Mbivilia nĩyonanĩtye kana no twĩthĩwe twaĩlĩte kũmantha ũiiti. Aingĩ me na ũwau wa kĩlĩko nĩmatethekete mamanya maũndũ maingangĩ ĩũlũ wa ũwau woo na makwata ũtethyo wa matakĩtalĩ.

‘Masoesi nĩmatethasya.’​—1 TIMOTHEO 4:8, MAELESYO MA KWONGELEELA.

Kũtũmĩa ĩvinda na vinya tũyĩka maũndũ ma kwaka mwĩĩ no kũolange mathĩna ma kĩlĩko. Maũndũ asu nĩ ta kwĩka masoesi ũteũtĩĩa, kũya malĩu maseo, na kũkoma too wĩanĩtye.

“Ngoo ndanu nĩ mũiito mũseo; ĩndĩ veva mũtũlĩku ũtumaa mavĩndĩ moma.”​—NTHIMO 17:22.

Kũsoma mĩsoa ya kũthangaasya na kwĩyĩkĩĩa mĩvango wĩsĩ no wĩanĩsye no kũũtetheesye ũkekalaa wĩ mũtanu. O na ĩngĩ, kũtũnga kĩlĩko maũndũnĩ ala maseo na kwĩkwatasya kana maũndũ makaseũva ĩvinda yũkĩte, no kũũtetheesye ũkomĩanĩsya na mathĩna ma kĩlĩko.

 “Ũĩ wĩ na ala menyivasya.”​—NTHIMO 11:2.

No wĩthĩwe ũtatonya kwĩanĩsya maũndũ onthe ala ũkwenda kwĩka, kwoou nũseo ũketĩkĩla ũtethyo wa angĩ. Anyanyau na andũ ma mũsyĩ no mende kũũtetheesya, ĩndĩ no methĩwe matesĩ meĩka ata. Kwoou no ũmatavye kĩla matonya kwĩka. Ndũkekwatye makwĩke maũndũ matatonya, na mavinda onthe tũngaa mũvea yĩla maũtetheesya.

“Neewʼaa ve vandũ ve vandũ, na nũndũ wa ũu, nĩnaendie kũmwona ndakĩtalĩ. Na nĩwamanyie ũwau ũla naĩ nawʼo. Kĩu nĩkyandetheeisye naelewa thĩna wakwa na neemanyĩsya mĩthemba ya ũiiti ĩtonya kũndetheesya nĩthĩnĩkĩe nesanga ũima wakwa wa mwĩĩ.”—Nicole, a ũla wĩthĩawa na ũwau wa “bipolar.”

“Nĩthĩĩte kana kũsoma Mbivilia ndeũtĩĩa nĩ na kĩveti kyakwa nĩkũndetheesye ngethĩwa na woni ũla waĩlĩte na mesilya maseo. Kaingĩ, yĩla ngũngʼangʼana na ũwau wakwa, nĩngwataa mũsoa ũũngiakisya mũno.”​—Peter, ũla wĩthĩawa na ũwau wa kũkwʼa ngoo mũno.

“Ndwaĩ ũndũ wĩ laisi kũtavya angĩ kĩla nangʼangʼanaa nakyo nũndũ wa nthoni. Ĩndĩ mũnyanyawa ũmwe nĩwambĩthukĩĩasya nesa na nĩwatataa kũngelewa. Nĩwandetheeisye neewʼa kavaa na naeka kwĩwʼa ta nĩ weka.”—Ji-yoo, ũla wĩthĩawa na mathĩna ma mĩĩle.

“Mbivilia nĩndetheesye ngethĩwa na woni ũla waĩlĩte ĩũlũ wa wĩa na kũthyũmũa. Ũĩ wayo nũndetheesye ngamanya ũndũ ndonya kũmĩanĩsya na mawĩmakĩo makwa.”—Timothy, ũla ũthĩnawʼa nĩ OCD.