ETHĨWA nĩwakwatiwe nĩ mũisyo mũthũku, no ũelewe ũndũ andũ ala makwatawa nĩ mĩisyo mew’aa. Andũ asu nĩmatelemaa, nĩmew’aa ta mate andũ ma vata ĩngĩ, nĩmasaanĩaw’a, nĩmemakĩaa, na mekalaa me na wia. Andũ aingĩ ala makwatawa nĩ mĩisyo nĩmew’aa matũlĩkĩte ngoo na me anou mũno nginya ũkethĩa maikwenda kwĩkĩa kĩthito mekale ũndũ mekalaa tene maũndũ matanamba kũthũka.

Ethĩwa nĩwaĩtye syĩndũ syaku syonthe nũndũ wa mĩisyo, o naku no wĩw’e ta ũte na vinya wa kũendeea kũmĩĩsya. O na no wambĩĩe kwĩw’a ta ũtaĩle kũendeea kwĩthĩwa thayũ. Ĩndĩ o na ũu wĩ o vo, Mbivilia nĩyonanĩtye kana no wĩthĩwe na kĩtumi kĩseo kya kũendeea kwĩthĩwa thayũ na kwĩkwatya kana ĩvinda yũkĩte yĩkeethĩwa yĩ ĩseo.

Ĩandĩko ya Mũtavan’ya 7:8 yaasya atĩĩ: “Mũminũkĩlyo wa ũndũ nĩ kavaa kwĩ wambĩlĩlyo.” Ĩtina wa kũkwatwa nĩ mũisyo, no ũtate vyũ kwĩkala ũndũ wekalaa maũndũ matanathũka, ĩndĩ ũyĩw’a vatatonyeka. O na ũu wĩ o vo, manya kana maũndũ no maseũve weethĩwa na kĩthito na waendeea kwĩthĩwa na wũmĩĩsyo yĩla ũkwĩka ũu.

Mbivilia nĩwetete ĩvinda yĩla ‘kũtakew’ĩka ĩngĩ wasya wa kũmeta na wasya wa kũĩa.’ (Isaia 65:19) Wathani ũsu ũkeanĩa ĩvinda yĩla nthĩ ĩno ĩkethĩwa yĩ vandũ vaseo va kwĩkala ungu wa Ũsumbĩ wa Ngai. (Savuli 37:11, 29) Andũ maikakwatawa nĩ mĩisyo. O na maikalilikana maũndũ mathũku ala mamakwatie nũndũ wa mĩisyo, nũndũ Ngai Mwene Vinya W’onthe athanĩte atĩĩ: “Maũndũ ma mbee matikalilikanwa, o na matikalika kĩlilikanonĩ.”—Isaia 65:17.

Kwasũanĩa ũndũ ũũ: Mũmbi waitũ nũvangĩte ‘kũtũnenga wĩkwatyo mũminũkĩlyonĩ witũ.’ Ndeto isu syĩonany’a kana Ngai akatuma twĩkala thayũ mũseo ũte mathĩna ungu wa Ũsumbĩki wake mũlũngalu. (Yelemia 29:11) Yo kũmanya ũw’o ũsu wĩ Mbivilianĩ no kũtume wenda kũendeea kwĩkala thayũ? Ũla mũndũ mũka wĩtawa Sally ũwetiwe mbeenĩ aĩtye atĩĩ: “Kwĩlilikany’a ĩũlũ wa maũndũ maseo vyũ ala Ũsumbĩ wa Ngai ũkeanĩsya kwondũ witũ ĩvinda yũkĩte no kũũtetheesye ũeke kũsũanĩaa mũno ĩũlũ wa mathĩna ala maũkwatie, na ũiendeea kũmĩanĩsya na maũndũ ala me vo yu.”

Wĩona ata ũkemanyĩsya mũnango maũndũ ala Ũsumbĩ wa Ngai ũkeka kwondũ wa andũ? Kwĩka ũu no kũũtetheesye kũmanya kana o na kau nũkwatĩtwe nĩ mathĩna, ve kĩtumi kĩseo kya kũendeea kwĩkala thayũ weteele mũno ĩvinda yũkĩte yĩla ũtakakwatwa nĩ mathĩna. Ĩndĩ ĩvinda yĩu yĩtanamba kũvika, ĩvindanĩ yĩĩ no ũkwate motao maseo kuma Mbivilianĩ ala matonya kũũtetheesya kũmĩĩsya mathĩna ala maũkwatie nũndũ wa mĩisyo. Kwaeka twone ngelekany’o imwe syonanĩtye ũndũ ũsu.