1, 2. Yesũ eekie ata wĩoo wa matukũ 14, mwei wa Nisani, mwaka wa 33? (Sisya visa ĩthangũnĩ yĩĩ.)

MŨTHENYA ũmwe kwĩ matukũ 14 ma mwei wa Nisani, mwaka wa 33, Yesũ nĩwambĩĩsye ũndũ wa mwanya e na atũmwa make 11 aĩkĩĩku. Sua ũsu maĩ Yelusaleme. Yesũ nĩweesĩ mũthenya ũsu ũte mũthelu nũkũawa, na kwondũ wa ũu ambĩĩsya mboka ya mwanya ĩla andũ makalilikanaa kĩkw’ũ kyake nayo. Ĩndĩ atambĩĩsye mboka ĩsu, maĩ mambie kũtanĩa Vasaka maililikana ĩvinda yĩla mbaĩ ya Isilaeli yaumie ũkombonĩ wa Amisili, myaka ta 1,500 mĩvĩtu. Kwoou Yesũ ayĩsa kũtw’ĩka nĩwaambĩĩsya ĩla mboka ya mwanya, kwaĩ kũnatuka. Ũseo mwei waĩ mũtheu. *—Mt. 26:1, 2.

² Wĩoo ũsu Yesũ oosie kĩmũtũ kĩte ĩlawa, akĩathima na anenga atũmwa make akyasya, “Osai, mũye.” Asyokie osa kĩkombe kya mbinyu na amina kũtũnga mũvea amea: “Nyw’ai inyw’onthe.” (Mt. 26:26, 27) Ĩtina wa ũu Yesũ ndaanenga amanyĩw’a make aĩkĩĩku malĩu angĩ ĩndĩ nĩwamatavisye maũndũ angĩ maingĩ.

3. Ĩsomo yĩĩ yĩsũngĩa makũlyo meva?

³ Ũu nĩw’o Yesũ wambĩĩsye mũvango wa kũlilikana kĩkw’ũ kyake, ũla now’o wĩtawa “kya ũya kya . . . Mwĩaĩi.” (1 Ako. 11:20) Ĩndĩ  andũ amwe nĩmatonya kũkũlya-ĩ, Ve vata mwaũ wa kũlilikana kĩkw’ũ kya Yesũ? Kĩmũtũ na mbinyu syonanasya kyaũ? Tũtonya ata kwĩyũmbanĩsya mũthenya wa kũlilikana kĩkw’ũ kya Yesũ? Naaũ maĩle kũya kĩmũtũ na kũnyw’a mbinyu? Na Aklĩsto maĩle kwĩthĩwa na woni mwaũ ĩũlũ wa wĩkwatyo ũla manengetwe nĩ Maandĩko?

4. Kĩkw’ũ kya Yesũ kĩtũtethetye ata?

⁴ Tũsyaawa na naĩ nũndũ twĩ nzyawa sya Atamu, na nokyo kĩtumi tũkusaa. (Alo. 5:12) Kwoou, vai mũndũ ũtonya kũnenga Ngai wovosyo kwondũ wa thayũ wake kana wa mũndũ ũngĩ. (Sav. 49:6-9) Ĩndĩ ĩla Yesũ wakwie, nĩwaumisye wovosyo o ũla waaĩlĩte, naw’o nĩ mwĩĩ wake ũte naĩ na nthakame ĩla yetĩkie. Na ĩndĩ ĩla Yesũ wamũtwaĩe Ngai thayũ wake ũte na naĩ wĩthĩwe wovosyo, nĩwatumie ithyĩ twĩthĩwa tũtonya kumw’a ũkombonĩ wa naĩ na kĩkw’ũ na tũikwata mũthĩnzĩo wa thayũ ũtathela.—Alo. 6:23; 1 Ako. 15:21, 22.

5. (a) Twĩsĩ ata kana Ngai na Klĩsto nĩmendete andũ? (b) Nĩkĩ tũyaĩlĩte kũtĩĩa ũmbano wa kũlilikana kĩkw’ũ kya Yesũ?

⁵ Mũvango ũsu wa wovosyo waumanie na Ngai woonanisye kana nĩwendete mbaa andũ. (Yoa. 3:16) O nake Yesũ ĩla wakwie oonanisye kana nũtwendete. Na nĩ w’o nũtwendete nũndũ o na ĩla wekalaa ĩtunĩ e “mũthũkũmi mũnene” wa Ngai, ‘ũtanu wake waĩ na ana ma andũ.’ (Nth. 8:30, 31) Kwoou twaĩle kũtũngĩa Ngai na Mwana wake mũvea mũno kwa kũthi ũmbanonĩ wa kũlilikana kĩkw’ũ kya Yesũ. Ĩla tweeka ũu twĩthĩawa tũyonany’a kana nĩtũatĩĩaa mwĩao ũũ: “Ĩkaai ũu ũndũ wa kũndilikana.”—1 Ako. 11:23-25.

6. Twaĩle kwĩthĩwa na woni mwaũ ĩũlũ wa kĩmũtũ na mbinyu ila itũmĩawa ĩvindanĩ ya kũlilikana kĩkw’ũ kya Yesũ?

⁶ Ĩla Yesũ wambĩĩasya mũvango wa kũlilikana kĩkw’ũ kyake, ndaavĩndũa kĩmũtũ na mbinyu ikatw’ĩka mwĩĩ wake na nthakame yake. Vandũ va ũu, aisye ũũ ĩũlũ wa kĩmũtũ: ‘Kĩĩ nĩkyo mwĩĩ wakwa.’ Na asyoka asya atĩĩ ĩũlũ wa mbinyu: ‘Ĩno nĩyo nthakame yakwa ya ũtianĩo mweũ, ĩla ĩĩtĩkw’a kwondũ wa andũ aingĩ.’ (Mko. 14:22-24) Kwoou kĩmũtũ na mbinyu syatũmĩiwe o ta ngelekany’o.

7. Kĩmũtũ kĩla kĩtũmĩawa ĩvinda ya kũlilikana kĩkw’ũ kya Yesũ kĩthĩawa kĩyonany’a kyaũ?

⁷ Kĩmũtũ kĩla Yesũ watũmĩie mũthenya ũsu wa vata mũno nĩ kĩla kyatialĩte ĩtina wa kũya Vasaka. Kĩmũtũ kĩu kĩyaĩ na ĩlawa. (Kuma 12:8) Mavinda amwe Maandĩko matũmĩaa ĩlawa kwonany’a ũthũku kana naĩ. (Mt. 16:6, 11, 12; Luka 12:1) Kwondũ wa ũu, Yesũ aĩ na vata wa kũtũmĩa kĩmũtũ kĩte ĩlawa nũndũ kyaũngamĩe nesa vyũ mwĩĩ wake ũte na naĩ. (Aevl. 7:26) Tũtũmĩaa kĩmũtũ o ta kĩu ĩla tũũlilikana kĩkw’ũ kya Yesũ.

8. Mbinyu ĩla ĩtũmĩawa mũthenya wa kũlilikana kĩkw’ũ kya Yesũ yonanasya kyaũ?

⁸ Nayo mbinyu ĩla Yesũ watũmĩie mũthenya ũsu wa matukũ 14 ma mwei wa Nisani, mwaka wa 33, yaũngamĩe nthakame yake. O ta ũu mbinyu ĩla tũtũmĩaa mũthenya wa kũlilikana kĩkw’ũ kyake yĩthĩawa ĩyonany’a nthakame yake. Nthakame ĩsu yake yetĩkĩie vandũ veetawa Kolokotha, vala vaĩ nza wa mũsyĩ wa Yelusaleme, na yetĩkie ‘kwondũ wa ũekeo wa naĩ’ sitũ. (Mt. 26:28; 27:33) Kwoou kĩla ũmwe witũ nĩwaĩle kwĩyũmbanĩsya mũthenya wa kũlilikana Kyaũya kya Wĩoo kya Mwĩaĩi. Nĩkĩ? Kĩtumi nũndũ kĩmũtũ na mbinyu ila itũmĩawa ĩvindanĩ yĩu syonanasya nthembo ya vata mũno ĩla Yesũ waumisye kwondũ wa ala ewi, na kelĩ nĩtwĩw’aa mũyo mũno nũndũ wa mũvango ũsu.

9. (a) Nĩkĩ nĩ ũndũ wa vata kũsoma maandĩko ala methĩawa manyuvĩtwe masomwe ĩvindanĩ ya kũlilikana kĩkw’ũ kya Yesũ? (b) We wĩ na woni mwaũ ĩũlũ wa wovosyo?

⁹ Kũsoma Mbivilia kwosana na mũvango ũla wĩ kalendanĩ kaitũ kana kavukunĩ Kũneenea  Maandĩko Kĩla Mũthenya nĩkũtonya kũtũtetheesya tũvindĩĩsye maũndũ ala Yesũ weekie atanamba ũkw’a. Tweeka ũu tũkeethĩwa tũtonya kũmbany’a ngoo sitũ kwondũ wa Kyaũya kya Wĩoo kya Mwĩaĩi. * Mwĩĩtu-a-asa ũmwe aandĩkie atĩĩ: “Nĩtwĩthĩawa tweteele mũno mũthenya wa kũlilikana kĩkw’ũ kya Yesũ. Kĩla mwaka mũthenya ũsu wĩthĩawa wĩ wa mwanya kũte wa mwaka mũvĩtu. Nĩlilikanaa mũthenya ũmwe naĩ mokyalĩ . . . nĩsyaĩĩsye ĩthe wakwa. Kavindanĩ kau nĩw’o naeleiwe vyũ ũndũ wovosyo ne wa vata. . . . Nĩ w’o, nĩneesĩ maandĩko onthe na ũndũ ndonya kũmaelesya. Ĩndĩ ĩla namanyie ũndũ kũkw’ĩĩwa kũsamaa, now’o neewie ngoo yakwa yathaka nĩ ũtanu wa kũmanya kĩla kĩkeanĩw’a nĩ wovosyo kwondũ witũ.” Vate nzika, ĩla tũkwĩyũmbanĩsya kũlilikana kĩkw’ũ kya Yesũ nũseo tũkasũanĩa mũno ũndũ nthembo yake ĩtwovoasya kumana na naĩ na ũmoa wa kĩkw’ũ.

10. Nĩ ũndũ ũngĩ wĩva tũtonya kwĩka ĩla tũkwĩyũmbanĩsya kũlilikana kĩkw’ũ kya Yesũ?

¹⁰ Ũndũ ũngĩ tũtonya kwĩka twĩyũmbanĩsye kũlilikana kĩkw’ũ kya Yesũ nĩ kwongela ĩvinda yĩla tũtũmĩaa ũthũkũminĩ witũ. Nzĩa ĩmwe ya kwĩka ũu nĩ kwosa ũvainia mũtetheesya. Ĩla twathokya amanyĩw’a maitũ ma Mbivilia na andũ angĩ kwondũ wa kũka kũlilikana kĩkw’ũ kya Yesũ, nĩtũtanaa mũno nũndũ nĩtwĩthĩawa twakwata ĩvinda ya kũneena ĩũlũ wa Ngai na Mwana wake na moathimo ala mathĩtwe andũ ala mamũtaĩaa Yeova na mekaa kwenda kwake.—Sav. 148:12, 13.

11. Nĩ kwa nzĩa yĩva Aklĩsto amwe ma Kolintho maĩsaa kĩmũtũ na kũnyw’a mbinyu ũndũ vataĩle?

¹¹ Ĩla ũkwĩyũmbanĩsya Kyaũya kya Wĩoo kya Mwĩaĩi, sũanĩa ndeto ila Vaulo waandĩkĩie kĩkundi kya Kĩklĩsto kya Kolintho. (Soma 1 Akolintho 11:27-34.) Vaulo aisye kana mũndũ ũla ũkũya kĩmũtũ na ainyw’a mbinyu ũndũ vataĩle, “eĩyosea ũsilĩlo wa ũla mwĩĩ na ĩla nthakame ya Mwĩaĩi,” Yesũ Klĩsto. Kwoou kĩla ũmwe wa etĩkĩw’a mauta aĩle kwamba ‘kwĩyĩosya’ atanesa kũya kĩmũtũ na kũnyw’a mbinyu. Alea kwĩka ũu, “aĩsaa na kũnyw’a ũsilĩlo wake mwene.” Nũndũ Aklĩsto aingĩ ma Kolintho maĩ na mwĩkalĩle mũthũku, aingĩ moo maĩ “syonze na awau, na ala makomete [kĩ-veva mayaĩ] avũthũ.” Nĩvatonyeka ũkethĩa amwe maĩsaa na kũnyw’a mũno matambĩte kũthi ũmbanonĩ wa kũlilikana kĩkw’ũ kya Yesũ nginya ũkethĩa ilĩko syoo nikomete na no makomete kĩ-veva. Kũya kĩmũtũ na kũnyw’a mbinyu kwa nzĩa ĩsu ĩtaĩle nĩkwatumie Aklĩsto asu matetĩkĩlwa nĩ Ngai.

12. (a) Nĩ ngelekany’o yĩva Vaulo watũmĩie ĩla waneeneaa Kyaũya kya wĩoo kya Mwĩaĩi? Nĩ ũkany’o wĩva wanengie ala maĩsaa kĩmũtũ na kũnyw’a mbinyu ĩvindanĩ yĩu? (b) Mũklĩsto ũĩsaa kĩmũtũ na kũnyw’a mbinyu aĩle kwĩka ata eeka naĩ ngito?

 ¹² Vaulo aelekanilye Kyaũya kya Wĩoo kya Mwĩaĩi na kyaũya kĩna kĩkũĩsanĩwa. Nĩkyo kĩtumi wamakanisye akĩmea: “Mũtitonya kũnyw’a kĩkombe kya Mwĩaĩi, na kĩkombe kya ndaimoni: mũtitonya kũĩsanĩa mesanĩ ya Mwĩaĩi, na mesanĩ ya ndaimoni.” (1 Ako. 10:16-21) Kwoou, ethĩwa Mũklĩsto mũna ũĩsaa kĩmũtũ na kũnyw’a mbinyu ĩvindanĩ ya Kyaũya kya Wĩoo kya Mwĩaĩi nĩweeka naĩ ngito, nĩwaĩle kwona atumĩa mamũtetheesye. (Soma Yakovo 5:14-16.) Na ĩndĩ Mũklĩsto ũsu oonany’a “ũsyao ũla waĩle ũalyũlo wa ngoo,” ndetalĩlwa ta ũnũkũvũthya nthembo ya Yesũ ĩla ũkũya kĩmũtũ na kũnyw’a mbinyu ĩvindanĩ ya Kyaũya kya Wĩoo kya Mwĩaĩi.—Luka 3:8.

13. Nĩkĩ twaĩlĩte kũvoya ĩũlũ wa wĩkwatyo ũla tũnengetwe nĩ Ngai?

¹³ Nũseo ĩla ũkwĩyũmbanĩsya kũlilikana kĩkw’ũ kya Yesũ ũkavoya na ũisũanĩa mũno ĩũlũ wa wĩkwatyo ũla Ngai ũkũnengete. Vai mũthũkũmi wa Yeova mũvatise na wĩthĩĩtwe e mũatĩĩi mũĩkĩĩku wa Mwana wake ũtonya kwenda kũvũthya nthembo ya Yesũ kwa kũya kĩmũtũ na kũnyw’a mbinyu atesĩ nesa ki kana we nĩ mwĩtĩkĩw’a mauta. Kwoou mũndũ atonya kũmanya ata nĩwaĩle kana ndaĩle kũya kĩmũtũ na kũnyw’a mbinyu?

14. Ũtianĩo mweũ ũkonetye ata ĩvinda ya kũlilikana kĩkw’ũ kya Yesũ?

¹⁴ Ala maĩle kũya kĩmũtũ na kũnyw’a mbinyu ĩvindanĩ ya kũlilikana kĩkw’ũ kya Yesũ mayĩthĩawa na nzika kana me ũla ũtianĩonĩ mweũ. Yesũ aisye ũũ ĩũlũ wa mbinyu: ‘Kĩkombe kĩĩ nĩ ũtianĩo mweũ nthakamenĩ yakwa.’ (1 Ako. 11:25) Ngai nĩwamũtũmie mwathani Yelemia awete kana nũkaseũvya ũtianĩo mweũ wĩ kĩvathũkany’o na ũla ũtianĩo wa Mĩao watianĩĩte na Aisilaeli. (Soma Yelemia 31:31-34.) Ngai esie kũtianĩa ũtianĩo ũsu na Isilaeli ma kĩ-veva. (Aka. 6:15, 16) Nthembo ya Klĩsto nĩyo mũsingi wa ũtianĩo ũsu, nayo nthakame yake ĩla yetĩkie nĩyo yatumie ũtianĩo ũsu wambĩĩa kwĩanĩa. (Luka 22:20) Yesũ nĩwe Mwĩw’anĩthya wa ũtianĩo ũsu mweũ, namo Aklĩsto etĩkĩw’a mauta ala aĩkĩĩku nĩmo me nthĩnĩ wa ũtianĩo ũsu, na ũtiĩwa woo wĩ ĩtunĩ.—Aevl. 8:6; 9:15.

15. Naaũ me nthĩnĩ wa ũtianĩo kwondũ wa Ũsumbĩ? Mekala me aĩkĩĩku makakwata mũthĩnzĩo wĩva?

¹⁵ Ala maĩsaa kĩmũtũ na kũnyw’a mbinyu ĩvindanĩ ya kũlilikana kĩkw’ũ kya Yesũ nĩmesĩ kana me nthĩnĩ wa ũla ũtianĩo kwondũ wa Ũsumbĩ. Mesĩ ũu ata? (Soma Luka 12:32.) Ũtianĩo ũsu waĩ katĩ wa Yesũ na aatĩĩi make etĩkĩw’a mauta, ala nĩmo malũmanilye nake mathĩnanĩ make, na kwoou makasumbĩka nake ĩtunĩ. (Avi. 3:10) O ta ũu, etĩkĩw’a mauta ala methĩĩtwe me aĩkĩĩku ũmũnthĩ me nthĩnĩ wa ũtianĩo ũsu, na makasumbĩka vamwe na Klĩsto ĩtunĩ tene na tene. (Ũvu. 22:5) Asu nĩmo maĩlĩte kũya kĩmũtũ na kũnyw’a mbinyu ĩvindanĩ ya Kyaũya kya Wĩoo kya Mwĩaĩi.

16. Elesya kwa ũkuvĩ kĩla kyonanaw’a nĩ ĩandĩko ya Alomi 8:15-17.

¹⁶ Ala makũsĩĩwe nĩ veva kana mo nĩ syana sya Ngai, nomo maĩle kũya kĩmũtũ na kũnyw’a mbinyu ĩvindanĩ ya kũlilikana kĩkw’ũ kya Yesũ. (Soma Alomi 8:15-17.) Vaulo aisye mekaĩlaa mayasya “Nau, Asa.” Ĩla waisye “Nau,” atũmĩie ndeto ya Kĩalamu “Abba” ĩla ĩkuĩte maũndũ elĩ. Ndeto ĩsu no yonany’e mwana nĩwendete ĩthe o ta ĩla wamwĩta “tata,” na nũmũnete ndaĩa o ta ĩla wamwĩta “nau.” Ala manengetwe “veva wa kũtuwa ana,” nĩmo matw’ĩkĩte ana ma Ngai etĩkĩw’a mauta. Veva wake nũkũsĩaa vamwe na maveva moo, na ũu ũituma mamanya kana mo nĩ ana ma Yeova etĩkĩw’a mauta. Ĩndĩ ũu ti kwasya kana mekaa kũkola kwĩkala kũũ  nthĩ. Methĩawa na ũw’o ki kana mekala me aĩkĩĩku thayũnĩ woo w’onthe, makasumbĩka vamwe na Yesũ Ũsumbĩnĩ wa ĩtu. Ũmũnthĩ vatiele o anini katĩ wa ala aatĩĩi ma Klĩsto 144,000, ala “amenesye mauta kuma kwa ũla Mũtheu,” nake nĩ Yeova. (1 Yoa. 2:20; Ũvu. 14:1) Veva nĩw’o ũtumaa mekaĩla Yeova makyasya, ‘Nau, Asa.’ Ũsu ko te mũamba mũseo methĩawa naw’o vamwe na Yeova!

17. Etĩkĩw’a mauta me na wĩkwatyo wĩva, na methĩawa na woni mwaũ ĩũlũ wa wĩkwatyo ũsu?

¹⁷ Ethĩwa wĩ Mũklĩsto mwĩtĩkĩsye mauta, vate nzika nĩwonaa vata wa kũvoya mũno ĩũlũ wa wĩkwatyo waku wa kũthi ĩtunĩ. Ĩla Mbivilia yaweta ĩũlũ wa andũ ‘mevaĩw’e’ Mũtwaani wĩ ĩtunĩ, ũla nĩ Yesũ Klĩsto, nũmanyaa no uwe ũũwetwa, na ũyĩthĩwa na mea ma kwĩsa kũtw’ĩka ũmwe wa ala metawa “mũtwawa” wa Klĩsto. (2 Ako. 11:2; Yoa. 3:27-29; Ũvu. 21:2, 9-14) Ĩla Ngai waweta Ndetonĩ yake kana nĩwendete syana syake sya kĩ-veva, wĩtĩkĩĩasya, “Ũsu ninyie.” O na ĩla Ndeto yake yaweta maũndũ mana maĩle kwĩkwa nĩ etĩkĩw’a mauta, veva mũtheu nũtumaa wenda kũmwĩw’a na kwondũ wa ũu ũyasya ngoonĩ yaku, “Ninyie nĩandĩkĩwe ũvoo ũsu.” Na kwa nzĩa ĩsu veva wa Ngai ũikũsĩĩa vamwe na veva waku kana wĩ na wĩkwatyo wa kũthi ĩtunĩ.

18. “Malondu angĩ” me na wĩkwatyo wĩva, na we wĩthĩawa na woni mwaũ ĩũlũ wa wĩkwatyo ũsu?

¹⁸ Ethĩwa wĩ nthĩnĩ wa yĩla “ĩkomano ĩnene” ya “malondu angĩ,” Ngai nũkũnengete wĩkwatyo wa kwĩkala kũũ nthĩ. (Ũvu. 7:9; Yoa. 10:16) Nũndũ wa ũu, nĩwendaa kwĩkala tene na tene Nthĩ Nzaũ, na nũtanĩaa mũno kũvindĩĩsya kĩla Mbivilia ĩwetete ĩũlũ wa ũndũ maũndũ makethĩwa mailyĩ kũũ nthĩ. Nĩwĩthĩawa na mea ma kwĩsa kũtanĩa mũuo mwingĩ wĩ vamwe na andũ ma mũsyĩ na andũ angĩ alũngalu. Nĩweteele mũno ĩvinda yĩla andũ matakanyamaw’a nĩ mayũa, ũkya, mowau, kĩkw’ũ, na maũndũ angĩ. (Sav. 37:10, 11, 29; 67:6; 72:7, 16; Isa. 33:24) Wĩ na mea ma kũthokya ala makathayũũkw’a me na wĩkwatyo wa kwĩkala tene na tene kũũ nthĩ. (Yoa. 5:28, 29) Mwa no nginya wĩthĩwe ũmũtũngĩaa Yeova mũvea mũno nũndũ wa ũkũathima na wĩkwatyo wa kwĩkala tene na tene ĩũlũ wa nthĩ! O na kau we ndũĩsaa kĩmũtũ na ndũnyusaa mbinyu, nũendaa ũmbanonĩ wa kũlilikana kĩkw’ũ kya Yesũ nĩ kenda wonany’e kana nũtũngaa mũvea nũndũ wa nthembo ya wovosyo ĩla yaumiw’e nĩ Yesũ Klĩsto.

19, 20. (a) No nginya wĩke ata ethĩwa nũkwenda wĩkwata ũathimo ũla Ngai ũkwathĩte? (b) Nĩkĩ we ũkombana na angĩ kwondũ wa Kyaũya kya Wĩoo kya Mwĩaĩi?

¹⁹ Nĩ kana wĩkwata ũathimo ũla wathĩtwe nĩ Ngai, wĩthĩwe nĩ kwĩkala ĩtunĩ kana nĩ kwĩkala kũũ nthĩ, no nginya wonany’e kana nũĩkĩĩaa Yeova Ngai, Yesũ Klĩsto, na nthembo ya wovosyo. Wathi ũmbanonĩ wa kũlilikana kĩkw’ũ kya Yesũ, ũkakwata mwanya wa kũsũanĩa mũno ĩũlũ wa wĩkwatyo ũla wĩ naw’o na ũndũ kĩkw’ũ kya Yesũ ne kya vata mũno. Kwoou tata mũno wĩĩthĩwa ũmwe katĩ wa andũ milioni mbingĩ ala makethĩwa mombene Nyũmbanĩ sya Ũsumbĩ na kũndũ kũngĩ ĩũlũ wa nthĩ yonthe kwondũ wa Kyaũya kya Wĩoo kya Mwĩaĩi, kĩla kĩkethĩwa syũa yamina kũthũa mũthenya wa Wakatano, Matukũ 3, Mwei wa 4, 2015.

²⁰ Kũthi ũmbanonĩ wa kũlilikana kĩkw’ũ kya Yesũ nĩkũtonya kũũtetheesya wone nthembo ya Yesũ ya wovosyo yĩ ya vata mũno kwĩ ũndũ ũnoonaa. Na ĩndĩ kwĩthukĩĩsya nesa ũvoo ũla ũkaumw’a, nĩkũtonya kũũtetheesya wĩthĩwe na mea ma kwony’a atũi maku ũndũ ũmendete. Ata? Kwa kũmatavya kĩla wĩmanyĩĩtye ĩũlũ wa wendo wa Yeova na kĩeleelo kĩseo kĩla wĩ nakyo kwondũ wa andũ. (Mt. 22:34-40) Kwoou kwĩ kwiũ na kwĩ kweũ, ndũkaatĩe kũmbana na angĩ kwondũ wa Kyaũya kya Wĩoo kya Mwĩaĩi.