Neanĩie taoninĩ yĩtawa Puerto Limón, ĩla yĩ ũtee wa ũkanga ngalĩko ya wumĩlonĩ wa sua wa Costa Rica. Kwitũ twasyaĩtwe twĩ nyanya, na ninyie naĩ wa mũonza. Ĩthe wakwa akwie nĩ na myaka nyanya, na kwoou kuma vau inyia wakwa atũeie e weka.

Nĩnendete mũno kũthaũka mũvĩla wa baseball. Nĩnatanĩaa ĩthaũ yĩu kuma nĩ mũnini. Nĩ vakuvĩ myaka 20, nĩnalikile timũnĩ yathaũkaa mũvĩla wa kwĩtanĩthya wa baseball. Nĩ na myaka 20 na kĩndũ ndithaũka timũnĩ o ĩsu, mũndũũme ũmwe wamanthaa ala me na ũtũĩka wa kũthaũka mũvĩla wa baseball nĩwangũlilye nĩthaũkĩe timũ ĩmwe nene ya Nicaragua. Ĩndĩ nũndũ inyia wakwa aĩ mũwau ĩvindanĩ yĩu na ninyie namũsũvĩaa, ndyendaa kũthi nthĩ ya Nicaragua. Kwoou nĩnaleile kũthi kũthaũkĩa timũ ĩsu. Ĩtina wa ĩvinda, mũndũũme ũngĩ nĩwanthokisye nĩthaũkĩe timũ ĩla nene ya mũvĩla wa baseball ya nthĩ ya Costa Rica, ĩla athaũki mayo manyuvĩtwe timũnĩ ingĩ nini. Nĩneetĩkĩlile kũthaũkĩa timũ ĩsu. Nĩnathaũkĩie timũ ĩsu nene kuma mwaka wa 1949 kũvika 1952, na mavinda maingĩ nĩtwaendaa kũthaũkĩa Cuba, Mexico, na Nicaragua. Neethĩawa nĩ ũmwe wa ala makwataa mũvĩla ĩla wakũnwa, na naĩ mũkwati mũseo mũno. O na nĩnathaũkaa mavinda 17 ndekwĩka ĩvĩtyo o na yĩmwe. Neew’aa mũyo mũno ĩla ala mekwĩloela tũithaũka meũngathĩĩa!

Ũndũ wa kũmakya nĩ kana no neethĩawa na mwĩkalĩle ũte mũseo. O na kau naĩ na mwĩĩtu twaĩ ndũũ, no neethĩawa na aka angĩ. Nĩnanyusaa mũno vyũ. Ve mũthenya ũmwe nanywie mũno nginya wesa kwĩthĩa naamũka ũnĩ wake, ndyaamanya ũndũ navikie mũsyĩ! O na nĩnathaũkaa mathaũ ma kũtha kalata metawa domino na lottery.

Ĩvindanĩ yĩu neekaa maũndũ asu, inyia wakwa nĩwatw’ĩkie Ngũsĩ ya Yeova. Nĩwatatie kũndetheesya nendeew’e nĩ mũĩkĩĩo wake, ĩndĩ mbeenĩ nĩwaemiwe nũndũ nalikĩte mũno ĩthaũnĩ yĩla nendete. Ĩla nĩ kĩwanzanĩ nĩendeee na masoesi, ndyeew’aa nzaa o na saa sya kũya syavika. Kĩlĩko kyakwa  kyeethĩawa kĩlũmĩte ĩthaũnĩ yĩu. Nĩnendete kũthaũka mũvĩla wa baseball kwĩ kĩndũ kĩngĩ o na kĩva!

Ĩndĩ nĩ na myaka 29, tũithaũka nĩnaũmĩie mũno nĩsembete ngakwate mũvĩla. Ĩtina wa kũvoa, nĩnaekie kũthaũkĩa timũ nene ĩla neethĩawa. Ĩndĩ ndyaaekana na mũvĩla wa baseball vyũ nũndũ nĩnamanyĩasya athaũki ma timũ yaĩ vakuvĩ na mũsyĩ kwakwa.

Kwĩ mwaka wa 1957, nĩnathokiw’e ũmbanonĩ mũnene wa Ngũsĩ sya Yeova ũla weekĩiwe kĩwanzanĩ kĩmwe nathaũkĩie ĩthaũ ya baseball. Nĩilyĩ nthĩ nĩthukĩĩsye, nĩnendeeiw’e mũno vyũ nĩ kwona ũndũ Ngũsĩ sya Yeova syaĩ na mwĩkalĩle mũseo kĩvathũkany’o na ũndũ noonaa andũ me na kelele na nduuthĩ ĩla tũũthaũka mũvĩla wa baseball. Kĩla noonie ũmbanonĩ ũsu kyatumie nambĩĩa kwĩmanyĩsya Mbivilia na Ngũsĩ sya Yeova na kũthi maũmbanonĩ moo.

Nĩnendeeiw’e mũno nĩ momanyĩsyo ma Mbivilia ala namanyĩiw’e. Kwa ngelekany’o, Yesũ nĩwathanĩte kana mĩthenyanĩ ya mũminũkĩlyo, amanyĩw’a make makatavany’a ũvoo mũseo wa Ũsumbĩ wa Ngai ĩũlũ wa nthĩ yonthe. (Mathayo 24:14) O na nĩnamanyie kana Aklĩsto ma w’o maitavanasya nĩ kenda maĩvwe. Yesũ aisye atĩĩ: “Nĩmwosete mana, nenganai mana.”—Mathayo 10:8.

O nĩendeee na kwĩmanyĩsya Mbivilia, nĩnasianĩisye ũndũ yaĩtye na ũndũ Ngũsĩ sya Yeova iilyĩ. Nĩnendeeiw’e nĩ kĩthito kyoo kya kũtavany’a ĩũlũ wa ũvoo mũseo wa Ũsumbĩ wa Ngai nthĩ yonthe ite kũeka. Nĩnoonie maiatĩĩa mwĩao ũla Yesũ wanengie Aklĩsto wa kwĩthĩwa me alau. Kwoou ĩla nasomie Maliko 10:21 na noona ũndũ Yesũ ũtũthoketye ‘tũmũatĩĩe,’ nĩnendie kwĩthĩwa Ngũsĩ.

Ĩndĩ o na ũu wĩ o vo, nĩvavĩtie ĩvinda ndyĩsa kwĩanĩsya wendi ũla naĩ naw’o. Kwa ngelekany’o, kwa myaka mingĩ nĩnathaũkaa na namba yakwa ya “vaati” kĩla kyumwa ĩthaũnĩ ya kalata yĩtawa lottery. Ĩndĩ nĩneemanyĩisye Mbivilianĩ kana Ngai ndendeeaw’a nĩ athaithi ma “ngai yĩtawa Ũthwii [kana, vaati, NWT]” na ndendeeaw’a nĩ ala me ĩtomo. (Isaia 65:11; Akolosai 3:5) Kwoou nĩnatwie kũeka kũtha kalata. Wakyumwa wa mbee kuma naeka, ĩla namba yakwa ya “vaati” nĩyasindie! Andũ aingĩ nĩmanthekeeie nũndũ ndyaathaũka kyumwa kĩu, o na nĩmanthing’ĩĩasya nĩthaũke ĩngĩ, ĩndĩ ndyaaĩtĩkĩla. Ndyaasyoka ĩngĩ kũtha kalata.

O na kau nĩnatw’ĩte kwĩvw’ĩka “mũndũ mweũ,” nĩnakwatiwe nĩ ĩtatwa yĩngĩ mũthenya o ũla navatisĩwe ũmbanonĩ mũnene wa Ngũsĩ sya Yeova. (Aeveso 4:24) Wĩoo ũsu, nĩnasyokie ũtelinĩ vala nakomaa na neethĩa mwĩĩtu ũla twaĩ ndũũ tene ambeteele mũomonĩ wa nyũmba yakwa. Mwĩĩtu ũsu ambĩie atĩĩ: “Ũka naku Sammy twĩtanĩthye!” Ĩndĩ namũsũngĩie mĩtũkĩ namwĩa, “Aiee!” Nĩnamũlilikanilye kana nĩkalaa kwosana na myolooto ya Mbivilia. (1 Akolintho 6:18) Mwĩĩtu ũsu angũlilye ũũ na wasya mũnene, “Aĩ kyaũ?” Na ĩndĩ nĩwambĩĩie kũvũthĩĩsya woni wa Mbivilia ĩũlũ wa kũlaalaa na anthing’ĩĩsya tũsyokeanĩe. Ĩndĩ neekie kũlika nyũmba na navinga mũomo. Ũmũnthĩ nĩ na ũtanu kwasya kana kuma ĩla natw’ĩkie Ngũsĩ mwaka wa 1958, nĩnĩlũmanĩtye na moalyũku ala neekie thayũnĩ wakwa.

Yu nĩĩw’a ta ndonya kũandĩka ĩvuku yĩeleetye moathimo ala nĩkwatĩte nũndũ wa kũatĩĩa myolooto ya Mbivilia! Amwe ma moathimo ala ngwatĩte nĩ kwĩthĩwa na anyanya aingĩ aseo, kwĩkala kwa nzĩa ĩla yaĩle, na kwĩthĩwa na ũtanu wa w’o.

Ũmũnthĩ no nĩtanĩaa kũthaũka ĩthaũ ya baseball, ĩndĩ yu ndithaũkaa nĩ na kĩeleelo kĩthũku. Tene ĩla nathaũkaa nĩnakwataa nguma na mbesa, ĩndĩ syĩndũ isu iyaaĩkala ĩvinda yĩasa. Ĩndĩ ngwatanĩo yakwa na Ngai vamwe na ana-a-asa ndĩkathela. Mbivilia yaĩtye atĩĩ: “Nthĩ nĩnĩũvĩta, na wendi wayo: ĩndĩ ũla wĩkaa kwenda kwa Ngai ekalaa tene na tene.” (1 Yoana 2:17) Ũmũnthĩ, nĩnĩmwendete Yeova Ngai na andũ make kwĩ kĩndũ kĩngĩ o na kĩva!