Ethĩwa nĩwĩmanyĩasya Mbivilia na ũmwe wa Ngũsĩ sya Yeova, nĩvatonyeka ũkethĩwa ũsomaa mbee ũvoo ũla mũkũka kwĩmanyĩsya. Nĩ kana ũtetheke vyũ, nĩ ũndũ ũseo kwĩka oou mbee wa kũthi maũmbanonĩ ma kĩkundi. Nĩtũtethekaa mũno tweethĩwa na mũvango mũseo wa kwĩmanyĩsya.

Nyuva saa na vandũ va kwĩmanyĩĩsya. Nĩ ĩvinda yĩva kĩlĩko kyaku kĩtonya kũkwatya maũndũ nesa? Nĩ kwakya tene, mbee wa kũthi wĩanĩ, kana nĩ wĩoo syana syakoma? O na ethĩwa ndũtonya kwĩmanyĩsya kwa ĩvinda ĩasa, nyuva ĩvinda yĩla ũtonya kũtũmĩa kwĩmanyĩsya, na ndũkaeke kĩndũ o na kĩva kĩũsiĩĩe. Mantha vandũ vauĩtye na ũivosya syĩndũ ila itonya kwelelũkya kĩlĩko ta kameme, televiseni, na simũ. Kũvoya mbee wa kwĩmanyĩsya kũkaũtetheesya ndũkethĩwe na mesilya maingĩ ĩũlũ wa mawĩmakĩo ma mũthenya ũsu. Kwa kwĩka ũu nũtonya kũelewa nĩ maũndũ ala ũũsoma kuma Ndetonĩ ya Ngai.​—Avilivi 4:6, 7.

Kulula kana wĩkĩe ũvano maũndũ mana ĩla ũũsoma, na ũyĩyũmbany’a kumya maelesyo. Ambĩĩa kwa kũsisya ũvoo w’onthe nĩ kana ũmanye ũvoo ũsu wĩneena ĩũlũ wa kyaũ. Sũanĩa ĩũlũ wa kyongo kya ũvoo ũsu, sisya ũndũ syongo nini ikonanĩtye na ũvoo w’onthe, na ũikunĩkĩla visa na makũlyo ma kũsyokeleela ala mekwonany’a nesa maũndũ ala manene. Weeka ũu soma kĩla ĩvungu, na ũimantha ũsũngĩo wa makũlyo ala monanĩtw’e. Soma maandĩko ala monanĩtw’e, na ũisũanĩa ũndũ mekwĩkĩa vinya ũvoo ũsu. (Meko ma Atũmwa 17:11) Wakwata ũsũngĩo wa ĩkũlyo, kulula kana wĩkĩe ũvano ndeto ila sya vata nthĩnĩ wa ĩvungu nĩ kana wĩthĩwe ũtonya kũlilikana ũsũngĩo ũsu. Na ĩndĩ ũmbanonĩ, nũtonya kũkĩlya kw’oko wenda na ũyumya maelesyo makuvĩ ũitumĩa ndeto syaku mwene.

Kwa kũkunĩkĩla maũndũ me kĩvathũkany’o ala maneeneawa kĩla kyumwa maũmbanonĩ, ũkongeleela maũndũ meũ “kyũmbanĩsyonĩ” kyaku kya ũmanyi wa Mbivilia.​—Mathayo 13:51, 52.

• Ũtonya kwĩthĩwa na mũvango mwaũ wa kwĩyũmbanĩsya maũmbano?

• Ũtonya kwĩyũmbany’a ata nĩ kana umye maelesyo ũmbanonĩ?