Valao eewʼa kana Aisilaeli nĩmaumie Misili mathi, ambĩĩie kũsũanĩa kana ndeeaĩle kũmalekya mathi. Eeie asikalĩ make atĩĩ: ‘Ũmbanyʼai makasya makwa ma kaũ na tũithi tũatĩĩe andũ asu! Tũyĩĩaĩle kũmalekya mathi.’ Na ĩndĩ Valao oosana na andũ make na maatĩĩa Aisilaeli.

Yeova atongoeasya andũ make mũthenya aitũmĩa ĩtu, na ũtukũ aitũmĩa mwaki. Amatwaie nginya Ũkanganĩ Mũtune na amea mekale vau.

Aisilaeli masisya ĩtina nĩmoonie Valao amaatĩĩe na asikalĩ make. Yu maĩ vau katĩ mavinganĩwʼe, nũndũ ũkanga waĩ mbee woo namo asikalĩ ma Misili maĩ ĩtina woo mamaatĩĩe. Moona ũu, mambĩĩie kũĩĩa Mose maimwĩa: ‘Nĩtũũkwʼa! Tũyĩĩaĩle kuma Misili.’ Ĩndĩ Mose amea atĩĩ: ‘Mũikakĩe. Eteelai mwone ũndũ Yeova ũkũtũtangĩĩa.’ We nũkwona ũndũ Mose wamwĩkwatĩtye Yeova?

Yeova nĩweeie Aisilaeli maume vau maendeee na savalĩ. Na ũtukũ o ũsu nĩwaumisye ĩtu yake mbee woo na ayĩtwaa ĩtina woo yamaaanyʼa na Amisili. Ngalĩko ĩla Amisili maĩ yaĩ kĩvindu. Ĩndĩ ngalĩko ya Aisilaeli yaĩ na kyeni.

Na ĩndĩ Yeova eea Mose atambũũkye kwʼoko kwake ĩũlũ wa ũkanga. Yĩla weekie ũu, Yeova nĩwaetie kĩseve kingĩ kyauutanie ũtukũ wʼonthe.  Kĩseve kĩu nĩkyaanisye kĩwʼũ kyatema nzĩa ũkanganĩ katĩ. Ĩtina wa ũu Aisilaeli onthe me milioni mbingĩ nĩmesĩile vau katĩ ũkanganĩ ve vanyau vyũ matwʼĩkanĩwʼe nĩ kĩwʼũ kwʼoko kwa aũme na kwʼoko kwa aka.

Asikalĩ ma Valao nĩmaatĩĩie Aisilaeli vau ũkanganĩ. Ĩndĩ Yeova amavũavũanyʼa. Nasyo ndĩa sya makasya moo syambĩĩa kuma. Nũndũ wa ũu, asikalĩ asu mambĩĩie kua mbu mayasya: ‘Mwa twĩvetangei vaa! Yeova akwetye ũmokitĩa.’

Maũndũ asu o maendeee, Yeova eeie Mose atĩĩ: ‘Tambũũkya kwʼoko kwaku ũkanganĩ.’ Akililye eeka ũu, kĩla kĩwʼũ kyaĩ kũũ ũtee kyeetũngĩanĩa na kyavwʼĩka asikalĩ ma Misili. Valao na andũ make onthe nĩmakwʼĩĩe vau. Vayaavĩta o na ũmwe.

Namo Aisilaeli maingie nesa nginya maumaala na mambĩĩa kũmwinĩa Ngai. Mainaa atĩĩ: “Nĩngũmwinĩa Yeova, nũndũ nĩwakĩlilye vinya na ũkĩlyo mũnene: mbalasi na ũla ũmĩtũlĩte nĩwĩkĩtye ũkanganĩ.” Andũ maendeee kwina, namo aka masũngaa makũnĩte tũthembe. Kĩla mũndũ eewʼaa e mũtanu mũno nũndũ nĩmatangĩĩwa.