ĨSOMO YA 10
Ũtonya Kũmanya Ũthaithi wa W’o Ata?
1. Kwĩ ndĩni o ĩmwe ya w’o?
“Ĩsũvĩei athani ma ũvũngũ.” —MATHAYO 7:15.
Yesũ amanyĩisye aatĩĩi make ĩũlũ wa ndĩni o ĩmwe ya w’o. Nĩ ta nzĩa ĩelete thayũnĩ ũtathela. Yesũ aisye: “Nĩ avũthũ ala mamyonaa.” (Mathayo 7:14) Ngai etĩkĩlaa ũthaithi o ũla wosanĩte na Ndeto yake ya w’o. Athaithi onthe ma w’o makwatanĩtw’e nĩ mũĩkĩĩo o ũmwe.—Soma Yoana 4:23, 24; 14:6; Aeveso 4:4, 5.
Ĩloele vitio yĩ na kyongo, We Ngai Nĩwĩtĩkĩlaa Mĩthemba Yonthe ya Ũthaithi?
2. Yesũ aisye ata ĩũlũ wa Aklĩsto ma ũvũngũ?
“Maasya kana nĩmesĩ Ngai; ĩndĩ mekonĩ moo nĩmeũmũkaĩa.”—TITO 1:16.
Yesũ awetie kana athani ma ũvũngũ makavukya Ũklĩsto. Kwa kũsiw’a tũ, monekaa ta athaithi ma w’o. Ndĩni syoo syaasya nĩ sya Kĩklĩsto. Ĩndĩ nũtonya kũmanya kana mo ti Aklĩsto ma w’o. Ata? No ũthaithi wa w’o wĩthĩawa na Aklĩsto ma w’o ala methĩawa na meko na nguma nzeo.—Soma Mathayo 7:13-23.
3. Ũtonya kũmanya athaithi ma w’o ata?
Sũanĩĩa movano aa atano:
-
Athaithi ma w’o nĩmamĩnengete Mbivilia ndaĩa ta Ndeto ya Ngai. Nĩmatataa kwĩkala kwosana na myolooto yayo. Kwoou, ndĩni ya w’o yĩ kĩvathũkany’o na ndĩni ila imanyĩasya momanyĩsyo ma andũ. (Mathayo 15:7-9) Athaithi ma w’o mekalaa kwosana na momanyĩsyo moo.—Soma Yoana 17:17; 2 Timotheo 3:16, 17.
-
Aatĩĩi ma w’o ma Yesũ nĩmayĩnengete ndaĩa syĩtwa ya Ngai, Yeova. Yesũ nĩwayĩnengie syĩtwa ya Ngai ndaĩa kwa kũyĩmanyĩthya. Nĩwatetheeisye andũ kũmũmanya Ngai na amamanyĩsya kũvoya syĩtwa ya Ngai yĩtaĩwe. (Mathayo 6:9) Ndũanĩ kwenyu, nĩ ndĩni yĩva ĩmanyĩthasya syĩtwa ya Ngai?—Soma Yoana 17:26; Alomi 10:13, 14.
-
Aklĩsto ma w’o nĩmatavanasya ĩũlũ wa Ũsumbĩ wa Ngai. Yesũ nĩwatũmiwe nĩ Ngai atavany’e ũvoo mũseo wa Ũsumbĩ. Ũsumbĩ wa Ngai now’o wĩkwatyo w’oka wa andũ. Yesũ nĩwaendeeie kũũtavany’a kũvika mũthenya wake wa kũkw’a. (Luka 4:43; 8:1; 23:42, 43) Nĩwawetie kana aatĩĩi make makatavany’a ĩũlũ wa Ũsumbĩ ũsu. Mũndũ akoka kũũtavya ĩũlũ wa Ũsumbĩ wa Ngai, we wona ta wa ndĩni yĩva?—Soma Mathayo 24:14.
-
Aatĩĩi ma Yesũ ti ma nthĩ ĩĩ nthũku. Nũtonya kũmamanya nũndũ mayĩlikasya siasanĩ kana ithokoonĩ sya mbaĩ. (Yoana 17:16; 18:36) O na maiatĩĩaa meko na mawoni mathũku ma nthĩ.—Soma Yakovo 4:4.
-
Aklĩsto ma w’o nĩmendanĩte mũno. Nĩmemanyĩĩtye kuma Ndetonĩ ya Ngai kũmanenga ndaĩa andũ ma mbaĩ syonthe. O na kau mavinda maingĩ ndĩni sya ũvũngũ nĩsyĩlikasya mũno makaũnĩ ma mbaĩ, athaithi ma w’o mayĩkaa ũu. (Mika 4:1-3) Vandũ va ũu, Aklĩsto ma w’o matũmĩaa ĩvinda yoo na malĩ syoo kũtetheesya na kwĩkĩa angĩ vinya.—Soma Yoana 13:34, 35; 1 Yoana 4:20.
4. Nũtonya kũmanya ndĩni ĩla ya w’o?
Nĩ ndĩni yĩva ĩla momanyĩsyo mayo onthe maumaa Mbivilianĩ, ĩnengae syĩtwa ya Ngai ndaĩa, na ĩtavanasya Ũsumbĩ wa Ngai kana now’o wĩkwatyo w’oka wa andũ? Nĩ ndĩni yĩva yonanasya wendo na ĩtelikasya kaũnĩ? We wĩona ata?—Soma 1 Yoana 3:10-12.
