Yesũ atanamba kũsyoka Kalilii nĩwaendie kũmwona Yoana, ũla wamũvatisie. Eekie ũu ĩtina wa kũmina mĩthenya 40 weũnĩ. Yĩla Yoana woonie Yesũ okĩte, atavisye ala waĩ namo atĩĩ: “Sisyai, Kalondu ka Ngai kala kavetaa naĩ ya nthĩ! Ũũ nĩwe naneenie ĩũlũ wake yĩla naisye: ‘Ĩtina wakwa nĩvokĩte mũndũ mũnene kwĩ nyie, nũndũ aĩ kw’o mbee wakwa.’” (Yoana 1:29, 30) O na kau Yoana aĩ mũkũangũ kwĩ Yesũ, nĩweesĩ kana Yesũ aĩ kw’o mbeenĩ e kyũmbe kya veva ĩtunĩ.

Ĩvinda yĩla Yesũ wookie kũvatiswa, Yoana ndeesĩ nesa ki kana Yesũ nĩwe waĩ atw’ĩke Masia. Nĩkyo kĩtumi waisye atĩĩ: “O nakwa ndyamwĩsĩ, ĩndĩ nookie kũvatisa na kĩw’ũ nĩ kana atonye kũvuanw’a kwa Isilaeli.”—Yoana 1:31.

Yoana nĩwaendeeie kũelesya ala mamwĩthukĩĩsye ĩũlũ wa ũndũ kweethĩiwe yĩla wamũvatisie Yesũ. Aisye atĩĩ: “Nĩnoonie veva ũtheeete ta ĩvũĩ kuma ĩtunĩ, na wekala ĩũlũ wake. Nyie o nakwa ndyamwĩsĩ, ĩndĩ Ũla wandũmie kũvatisa na kĩw’ũ nĩwandavisye ũũ: ‘Ũla ũkona veva ũtheeete na kwĩkala ĩũlũ wake, ũsu nĩwe ũvatisaa na veva mũtheu.’ Na nĩnonete ũu, na nĩnumĩtye ũkũsĩ kana ũsu nĩwe Mwana wa Ngai.”—Yoana 1:32-34.

Mũthenya ũla waatĩĩe, Yesũ nĩwookie ĩngĩ vala ve Yoana na amwĩthĩa e na amanyĩw’a make elĩ. Yĩla Yoana wamwonie, aisye atĩĩ: “Sisyai, Kalondu ka Ngai!” (Yoana 1:36) Ĩtina wa kwĩw’a ndeto isu, amanyĩw’a asu elĩ ma Yoana Mũvatisi nĩmamũatĩĩie Yesũ. Ũmwe wa amanyĩw’a asu eetawa Endelea. Mũmanyĩw’a wa kelĩ nũtonya kwĩthĩwa aĩ ũla waeleisye ngewa ĩno, na eetawa Yoana. Veonekana mũmanyĩw’a ũsu weetawa Yoana aĩ wa mũsyĩ ũmwe na Yesũ. Nĩkĩ tũkwasya ũu? Kĩtumi nũndũ inyia wa Yoana eetawa Salome, na nĩvatonyeka akethĩwa asyaanĩw’e na Meli. Nake mũũme wa Salome eetawa Sevetii.

Yĩla Yesũ weethyũũie na oona Endelea na Yoana mamũatĩĩe, amakũlilye atĩĩ: “Mwĩmantha kyaũ?”

Namo mamũkũlya: “Lavai, wĩkalaa va?”

Yesũ amasũngĩie amea atĩĩ: “Ũkai, na nĩmũũvona.”—Yoana 1:37-39.

Yoana na Endelea nĩmaendanisye na Yesũ na mekalany’a nake kuma kĩndũ saa kũmi nginya wĩoo. Endelea nĩwatanie mũno nũndũ yĩla wamwonie mwana-a-inyia Simoni, ũla weetawa Vetelo, amwĩie, “Nĩtwamwona Masia.” (Yoana 1:41) Endelea nĩwamũtwaie Vetelo vala ve Yesũ. Namo maũndũ ala mesie kwĩkĩka ĩtina nĩmonanasya kana Yoana nĩwoonie mwana-a-inyia Yakovo na amũtwaa vala ve Yesũ, ĩndĩ Yoana ndaaweta ũndũ ũsu maũndũnĩ ala waandĩkie.

 Mũthenya ũla waatĩĩe, Yesũ nĩwamwonie Vilivu, ũla waĩ wa kuma Vethisaita. Ndũa ĩsu ya Vethisaita yaĩ ngalĩko ya ĩũlũ ya Ũkanga wa Kalilii, na nĩkw’o Endelea na Vetelo maumĩte. Yesũ amwĩie Vilivu atĩĩ: “Ĩthĩwa mũatĩĩi wakwa.”—Yoana 1:43.

Nake Vilivu nĩwamũmanthie Nathanaeli, ũla weetawa Valitholomayo, na amwĩa atĩĩ: “Nĩtwamwona ũla Mose waandĩkie ĩũlũ wake Mĩaonĩ, na Mavukunĩ ma Athani: Yesũ, mwana wa Yosevu, kuma Nasaleti.” Nathanaeli aĩ na nzika na ndeto isu wataviw’e nĩ Vilivu, na amũkũlya: “Ve kĩndũ kĩseo kĩtonya kuma Nasaleti?”

Vilivu amũsũngĩie amwĩa atĩĩ: “Ũka ũkeyonee.” Yesũ nĩwoonie Nathanaeli okĩte na asya, “Sisyai, Mũisilaeli wa w’o ũla vate ũkengani nthĩnĩ wake.”

Yĩla Nathanaeli weewie ndeto isu sya Yesũ, amũkũlilye atĩĩ: “Ũmbĩsĩ ata?”

Yesũ amũsũngĩie amwĩa: “Nĩngwonie yĩla wĩĩ ungu wa mũkũyũ, Vilivu atanakwĩta.”

Nathanaeli nĩwaseng’iw’e mũno nĩ ndeto sya Yesũ na amwĩa atĩĩ: “Lavai, we nue Mwana wa Ngai, wĩ Mũsumbĩ wa Isilaeli.”

Ĩndĩ Yesũ amũkũlya: “We waĩkĩĩa nũndũ nakwĩa nĩngwonie wĩ ungu wa mũkũyũ?” Aendeeie kũmwĩa atĩĩ: “Ũkoona maũndũ manene kwĩ aa.” Ĩtina wa ũu, Yesũ asya, “Nĩmũtavya w’o ki inyw’ĩ andũ, mũkoona ĩtu yĩ ĩvingũe na alaĩka ma Ngai mayambata na kũtheea vala ve Mwana wa mũndũ.”—Yoana 1:45-51.

Ĩvinda ĩnini ĩtina wa maũndũ asu, Yesũ na amanyĩw’a ala waĩ ananyuva nĩmaumie Mwandanĩ wa Yolotani na mathi Kalilii.