1 Akolintho 11:1-34
11 Atĩĩai ngelekany’o yakwa o tondũ nyie nĩatĩĩaa ngelekany’o ya Klĩsto.
2 Nĩngũmũkatha nũndũ maũndũnĩ onthe nĩmũndilikanaa na nĩmũlũmĩtye vyũ ila syĩthĩo o tondũ namũmanyĩisye syo.
3 Ĩndĩ nĩenda mũmanye kana mũtwe wa kĩla mũndũũme nĩ Klĩsto, naw’o mũtwe wa mũndũ mũka nĩ mũndũũme; naw’o mũtwe wa Klĩsto nĩ Ngai.
4 Mũndũũme o na wĩva ũla ũvoyaa kana akaumya wathani avw’ĩkĩte mũtwe wake nĩwũũsonokasya;
5 na mũndũ mũka o na wĩva ũla ũvoyaa kana akathana atavw’ĩkĩte mũtwe wake nĩwũũsonokasya, nũndũ no ũndũ ũmwe na mũndũ mũka wĩ na mũtwe mwenze.
6 Nũndũ ethĩwa mũndũ mũka ndeũvw’ĩka mũtwe wake aĩlĩte kũtila nzw’ĩĩ yake; ĩndĩ ethĩwa nĩ nthoni kwa mũndũ mũka kũtila nzw’ĩĩ yake kana kwenza, aĩlĩte kũvw’ĩka mũtwe wake.
7 Nũndũ mũndũũme ndaĩlĩte kũvw’ĩka mũtwe wake, nĩkwĩthĩwa we nĩ mũvw’ano wa Ngai na onanasya ũnene wake, ĩndĩ mũndũ mũka onanasya ũnene wa mũndũũme.
8 Nũndũ mũndũũme ndaauma kwa mũndũ mũka, ĩndĩ mũndũ mũka aumie mũndũũmenĩ.
9 Na eka ũu, mũndũũme ndaaũmbwa kwondũ wa mũndũ mũka, ĩndĩ mũndũ mũka kwondũ wa mũndũũme.
10 Nĩkyo kĩtumi mũndũ mũka waĩle kwĩthĩwa na wonany’o wa ũkũmũ mũtwenĩ wake, nũndũ wa alaĩka.
11 Ũndũ ũngĩ nĩ kana, nthĩnĩ wa Mwĩaĩi, mũndũ mũka ndethĩwa vate mũndũũme, na mũndũũme ndethĩwa vate mũndũ mũka.
12 Nũndũ o tondũ mũndũ mũka waumie mũndũũmenĩ, o ta ũu, mũndũũme asyaawa nĩ mũndũ mũka; ĩndĩ syĩndũ syonthe syaumie kwa Ngai.
13 Tw’ai inyw’ĩ ene: Nĩ ũndũ waĩle mũndũ mũka kũvoya kwa Ngai atavw’ĩkĩte mũtwe wake?
14 W’o mũmbĩle wa mũndũ ndwonanasya nesa kana ti ũndũ wa ndaĩa kwa mũndũũme kwĩthĩwa na nzw’ĩĩ ndaasa,
15 na ethĩwa mũndũ mũka e na nzw’ĩĩ ndaasa nĩ ndaĩa kwake? Nũndũ nũnengetwe nzw’ĩĩ vandũ va kĩndũ kya kũvw’ĩka mũtwe.
16 Ĩndĩ ethĩwa mũndũ eenda kũleana na ũndũ ũsu nũndũ wa kĩthĩo kĩngĩ, ithyĩ tũi na kĩthĩo kĩngĩ, o na ikundi sya Ngai ii na kĩngĩ.
17 Ĩndĩ ngĩmũnenga motao aa ndiũmũkatha, nũndũ mũyũmbanaa kwondũ wa ũseo ĩndĩ mũmbanaa kwondũ wa ũthũku.
18 Ũndũ wa mbee, nĩĩw’a kana yĩla mwoombana kĩkundinĩ, nĩkwĩthĩawa na mũaanĩko katĩ wenyu; na no nĩĩkĩĩe ũndũ ũsu.
19 Nũndũ vate nzika vakeethĩwa mũtilĩkangano katĩ wenyu, nĩ kana ala metĩkĩlĩkĩte katĩ wenyu mamanyĩke.
20 Yĩla mwoombana vamwe, kwa w’o mũyĩthĩawa mũiya Kyaũya kya Wĩoo kya Mwĩaĩi.
21 Nũndũ mũtanamba kũkĩya, kĩla ũmwe wenyu ambaa kũya kyaũya kyake kya wĩoo, na ũyĩthĩa ũmwe e na nzaa ĩndĩ ũngĩ nĩ mũmile.
22 No mwĩthĩawa na nyũmba mũtonya kũĩĩa na kũnyw’ĩĩa? Kana mũvũthasya kĩkundi kya Ngai, na mũituma ala mate na kĩndũ mew’a nthoni? Yu ndonya kwasya ata? Nĩnaĩle kũmũkatha? Ndyamba kũmũkatha ũndũnĩ ũsu.
23 Nũndũ kĩla noosie kuma kwa Mwĩaĩi nĩnamũmanyĩisye, kana ũtukũ ũla Mwĩaĩi Yesũ waĩ avũnyanĩwe oosie mũkate,
24 na ĩtina wa kũtũnga mũvea aũtilanga, na asya: “Ũũ wĩonany’a mwĩĩ wakwa, ũla wĩnenganwe kwondũ wenyu. Ĩkaai ũu kwondũ wa kũndilikana.”
25 Na ũu now’o weekanie na kĩkombe, ĩtina wa kũya kyaũya kya wĩoo, akyasya: “Kĩkombe kĩĩ kĩonany’a ũtianĩo mweũ kwĩsĩla nthakame yakwa. Ĩkaai ũu yĩla mũũkĩnyw’a kwondũ wa kũndilikana.”
26 Nũndũ o yĩla mũũya mũkate ũũ na mũũnyw’a kĩkombe kĩĩ, mũendeeaa kũtangaasa kĩkw’ũ kya Mwĩaĩi nginya yĩla wĩũka.
27 Kwoou ũla ũĩsaa mũkate kana akanyw’a kĩkombe kya Mwĩaĩi ũndũ vataĩle, ethĩawa aivĩtĩsya mwĩĩ na nthakame ya Mwĩaĩi.
28 Mbee eka kĩla mũndũ eyĩosye we mwene asisye kana nĩwaĩle, na amina kwĩka ũu aiya mũkate na ainyw’a kĩkombe.
29 Nũndũ ũla ũĩsaa na ũnyusaa ate kũmanya vata wa mwĩĩ, aĩsaa na ainyw’a ũsilĩlo ĩũlũ wake.
30 Kĩu nĩkyo kĩtumi aingĩ katĩ wenyu nĩ onzu na nĩ awau na aingĩ nĩmakwie.*
31 Ĩndĩ tũkeyĩosya nesa ũndũ tũilye, tũitonya kũsilĩlwa.
32 Ĩndĩ yĩla twasilĩlwa, twĩthĩawa twakanw’a nĩ Yeova, nĩ kana tũikese kwosewa ĩtambya vamwe na nthĩ.
33 Kwoou ana-a-asa, yĩla mwoombana vamwe nĩ kana mũye kyaũya kĩu, eteelanaai.
34 Ethĩwa mũndũ o na wĩva e na nzaa, nĩ aye mũsyĩ, nĩ kana yĩla mwoombana vamwe mũikethĩwe mwoombana kwondũ wa ũsilĩlo. Maũndũ ala matiala ngamalũngalya nooka.
Maelesyo ma kwongeleela
^ Veonekana kĩkw’ũ kĩĩ kĩũwetwa vaa nĩ kya kĩ-veva.
