2 Vetelo 2:1-22
2 Ĩndĩ o na nĩkweethĩiwe athani ma ũvũngũ katĩ wa andũ, o tondũ kũkethĩwa amanyĩsya ma ũvũngũ katĩ wenyu. Asu makaete mũtilĩkangano mevithanĩtye nĩ kana manange mũĩkĩĩo wenyu, o na makamũkaĩa ũla wamathooie na kwĩyĩetee wanangĩko wa mĩtũkĩ.
2 O na ĩngĩ, andũ aingĩ makaendeea kwĩka maũndũ mavuku na ngũlũ,* na nũndũ woo nzĩa ya ũla w’o ĩkaneenewa naĩ.
3 Na nũndũ wa ĩtomo makatũmĩa ndeto sya ũvũngũ nĩ kana meyĩune. Ĩndĩ ũsilĩlo woo ũla watwiwe kuma tene, nĩwũkĩte na mĩtũkĩ, na wanangĩko woo ndũlea kũvika.
4 Vate nzika Ngai ndaamaekea alaĩka ala meekie naĩ, ĩndĩ amekisye Talitalo,* na amova na nyololo sya* kĩvindu kingĩ meteele ũsilĩlo woo.
5 Na ndaamĩekea nthĩ ya ĩvinda ya tene, ĩndĩ nĩwavonokisye Noa, mũtavany’a wa ũlũngalu, vamwe na andũ angĩ mũonza, yĩla waetie mbua ya kĩw’ũ kingĩ ĩũlũ wa andũ ala matamũkĩaa Ngai.
6 Na nĩwasilĩle ndũa sya Sotomo na Ngomola kwa kũitw’ĩkĩthya mũu, na kwa kwĩka ũu amony’a andũ ala matamũkĩaa Ngai ngelekany’o ya maũndũ ala mokĩte.
7 Na nĩwamũvonokisye Loto, mũndũ mũlũngalu, ũla wathĩnaw’a mũno ngoonĩ nĩ maũndũ mavuku ala atũli ma mĩao meekaa na ngũlũ,*
8 nũndũ kĩla mũthenya mũndũ ũsu mũlũngalu nĩwathĩnĩkaa mũno nũndũ wa ũtũli wa mĩao ũla woonaa na kwĩw’a, yĩla wekalaa katĩ wa andũ asu.
9 Kwoou Yeova nĩwĩsĩ kũvonokya andũ ala me na kĩkĩo kya Ngai kuma matatwanĩ, na kũmaia ala mate alũngalu meteele kwanangwa mũthenyanĩ wa sila,
10 na mũno mũno ala mendaa kũvukya mĩĩ ya ala angĩ, na mavũthasya ala me na ũkũmũ.
Na nũndũ andũ asu me ũkũmbaũ na me mĩtavyo, maikĩaa kũmaneenea naĩ ala Ngai ũkumĩtye,
11 ĩndĩ o na kau alaĩka me vinya na me ũtonyi mwingĩ kwĩ mo, maimasikataa maitũmĩa ndeto sya kũumana nũndũ nĩmamũnengete Yeova ndaĩa.
12 Ĩndĩ asu, o ta nyamũ itasũanĩaa, ila syĩkaa kwosana na ũndũ syoombiwe na isyaawa nĩ kana ikwatawe na kũawa, nĩmaneenaa naĩ ĩũlũ wa maũndũ matesĩ. Namo makakwata wanangĩko wumanĩte na mwĩkalĩle woo wa wanangĩko,
13 na makakwatwa nĩ maũndũ mathũku ta ĩtuvi ya mwĩkalĩle woo mũthũku.
Monaa ne ũndũ wa kwendeesya kwĩlikya mũno maũndũnĩ ma kwĩtanĩthya, o na mũthenya. Mo nĩ malanga na masola* na matanĩaa mũno momanyĩsyo moo ma ũvũngũ yĩla maendeee kũĩsanĩa nenyu mbokanĩ.
14 Metho moo mausũĩte ũlaalai na maitonya kũekana na naĩ, na nĩmakusasya ala mate alũmu. Me na ngoo imanyĩĩtw’e ĩtomo. Nĩ syana numanĩe.
15 Nĩmatiĩte nzĩa ĩla ndũngalu na nĩmelelũkĩtw’e. Nĩmaatĩĩte nzĩa ya Mbalaamu mwana wa Mbeoli, ũla wendie ĩtuvi ya kwĩka ũndũ mũthũku,
16 ĩndĩ nĩwakaniw’e nũndũ wa kũlea kwĩka ũla waĩle. Ĩng’oi, nyamũ ĩtaneenaa, nĩyaneenie na wasya wa mũndũ na yamũsiĩĩa ndakeke kĩko kya ndũũka.
17 Andũ asu nĩ nthongo ite kĩw’ũ na mũumbĩ ũtwaĩtwe nĩ kĩuutani kĩ na vinya, na kĩvindu kya ngokomi nĩkiĩtwe kwondũ woo.
18 Maneenaa maũndũ mekwoneka ta ma vata o na kau maitethya. Mekaa maũndũ mavuku na ngũlũ* na maituma andũ methĩwa na mawendi mathũku ĩngĩ, na ũu ũituma andũ meka maũndũ mathũku ala manaekete kwĩka.
19 O na kau nĩmathaa andũ ũthasyo, mo nĩ ngombo sya wanangĩko; nũndũ mũndũ ũla ũkĩlĩtw’e vinya nĩ ũngĩ, nĩ ngombo yake.*
20 Vate nzika, ethĩwa ĩtina wa kũtia maũndũ mavuku ma nthĩ ĩno nũndũ wa kwĩthĩwa na ũmanyi wa w’o ĩũlũ wa Mwĩaĩi na Mũtangĩĩi Yesũ Klĩsto, nĩmasyokeaa maũndũ ala matiie, mũminũkĩlyo woo wĩthĩawa mũthũku kwĩ mwambĩlĩlyo woo.
21 Nĩ kavaa ta kethĩwa mayaamanya nesa nzĩa ya ũlũngalu kwĩ kũmĩmanya na mayĩthyũũa matie mĩao mĩtheu ĩla makwatie.
22 Ũndũ ũsu wĩkĩkĩte kwoo nĩwosanĩte na ndeto sya nthimo ĩno: “Ngitĩ nĩsyokeete matavĩko mayo, na ngũlũe yamina kũthambw’a nĩsyokete kwiliita ndakanĩ.”
Maelesyo ma kwongeleela
^ Kĩkiliki, a·selʹgei·a. Sisya Maelesyo ma Ndeto.
^ Sisya Maelesyo ma Ndeto.
^ Kana nĩvatonyeka, “na amekya maimanĩ ma.”
^ Kĩkiliki, a·selʹgei·a. Sisya Maelesyo ma Ndeto.
^ Kana “manyũlũ.”
^ Kĩkiliki, a·selʹgei·a. Sisya Maelesyo ma Ndeto.
^ Kana “mũndũ ũla ũkĩlĩtw’e vinya nĩ kĩndũ, nĩ ngombo yakyo.”
