Yesu tɩɖʋ ɛ-wayɩ tɩŋɩyaa paɣtʋ se palʋlɩ piya yaa pataalʋlɩ. Ɛ-tɔm kpɛlɩkɩyaa taa nɔɔyʋ tɩɖʋ paɣtʋ ndʋ ɖɔɖɔ. Bibl ɖɩyɔɔdɩ ɖoli kpayɩ se pɩfɛyɩ ɖeu se ɛyʋ ɛlabɩnɩ tʋmɩyɛ wondu yaa kɔɔ wena ayeki se halʋ ɛtaahaɣ hoɣa yɔ. Hɔɔlʋʋ ŋgʋ kɩ-taa, Bibl paɣtʋ kiɖe nɖɩ ɖɩwɛ Roma 14:12 taa yɔ, ɖɩpɩzɩɣ nɛ ɖɩsɩnɩ-ɖʋ. Ðɩtɔŋ se: “Ða-taa paa weyi lɛ, ɛkaɣ Ɛsɔ ɛzɩdaa sɩŋʋʋ se pahʋʋnɩ-ɩ ɛ-maɣmaɣ ɛ-ñʋʋ taa tɔm.”

 Ye mbʋ, Krɩstʋ ñɩma mba pɔɖɔkɩ nesi yɔ, papɩzɩɣ nɛ palɩzɩ se paɖʋʋ hɔʋ yaa paaɖʋʋ. Mba lɩzɩɣna ɖɔɖɔ piya ɛzɩma pañɩnɩɣ lʋlʋʋ nɛ alɩwaatʋ ndʋ pañɩnɩɣ-sɩ lʋlʋʋ yɔ. Ye halʋ nɛ ɛ-walʋ palɩzaa se palakɩnɩ tʋmɩyɛ wonuu nakʋyʋ yaa kɔyɛ naɖɩyɛ se pɩsa nɛ halʋ ɛtaahaɣ hoɣa, ɛlɛ wonuu ŋgʋ kɩɩlɩzɩɣ hoɣa yɔ, pɔ-tɔm nɛ pa-sʋʋtʋ pɩkɛnaa. Pɩtɩmʋna se nɔɔyʋ ɛhʋʋnɩ-wɛ tɔm.?—Roma 14:4, 10-13.