Keɣa 18:1-50
Hendu teyaa ñʋʋdʋ. Yehowa lɩmɖʋyʋ Daviid hendu; ete hendu ndʋ Yehowa kɩyakʋ ŋgʋ Yehowa holi-i e-koyindinaa kpeekpe nesi tɛɛ nɛ Sɔɔlɩ nesi tɛɛ yɔ. Ɛyɔɔdaa se:+
18 Hayɩ Yehowa, mɔnsɔɔlɩ-ŋ, ñɛkɛnɩ mon-ɖoŋ.+
2 Yehowa kɛnɩ man-kaaʋ nɛ men-tilimiye ɖoŋ ñɩnɖɛ nɛ Weyi eholuu-m yɔ.+
Mɛ-Ɛsɔ kɛnɩ man-kaaʋ,+ ɛnʋ manɖʋʋ kʋyʋʋ,Man-kpayʋʋ nɛ ma-ñʋʋ yabʋ hɩlʋʋ,* man-ɖɩjɔzɩyɛ* nɖɩ ɖɩ-taa kaɖɛ naɖɩyɛ ɛɛtalɩɣ-m yɔ.+
3 Mayaɣ Yehowa, ɛnʋ weyi ɛmʋnɩ samtʋ yɔ;Nɛ ɛkaɣ yabʋ ma-ñʋʋ mon-koyindinaa nesi tɛɛ.+
4 Sɩm nimee kaacɔ-m nɛ ata;+Ɛyaa mba paawazɩɣ pʋyʋ yɔ, pawadɩ mɔ-yɔɔ tuda nɛ paɖʋ-m sɔɔndʋ.+
5 Pɩlaʋ* nimee cɔ-m nɛ ata;Sɩm kpacanaa lʋbɩnɩ-m.+
6 Man-kʋñɔŋ taa, maya Yehowa,Maawɛɛ nɛ mamakɩ kubusi nɛ mɛ-Ɛsɔ cɔlɔ kiŋ se ɛsɩnɩ-m.
Ɛnɩ mɔ-nɔɔ nɛ e-templo taa,+Nɛ kubusi nzɩ mamaba se ɛsɩnɩ-m yɔ, sɩsʋ ɛ-nɩŋgbaaŋ taa.+
7 Nɛ tɛtʋ paɣzɩ ñamsʋʋ nɛ ticiɣdiɣ;+Pʋŋ tigila selaaNɛ pɩcɛŋɛsɩ-yɛ, mbʋ pʋyɔɔ yɔ paaɖʋ-ɩ ɖɩwɩzɩyɛ.+
8 Ñɔsɩ lɩnɩ ɛ-mɔɔŋ tɛɛ nɛ sɩkpa,Nɛ miŋ weyi ɛɖɩzɩɣ wondu caɣ caɣ yɔ ɛlɩnɩ ɛ-nɔɔ taa;+Miŋ mamala cɩɩɩ mʋʋ ɛ-ɛsɩndaa.
9 Ɛlaba nɛ ɛsɔdaa koti alɩwaatʋ ndʋ etikaɣ yɔ,+Nɛ cɩkpɛndʋʋ sɔsɔʋ kaawɛ ɛ-nɩŋgbanzɩ tɛɛ.+
10 Ɛɛcaɣ kerebim nɔɔyʋ yɔɔ nɛ ɛkɔɔ, ɛkʋyaɣ ɛsɔdaa.+
Ɛɛcaɣ fezuu nakʋyʋ* keŋ yɔɔ nɛ etii lɛɛ lɛɛ.+
11 Ðɩnɛ ɛlɛ ehu ɛ-yɔɔ cɩkpɛndʋʋ,+Tɛʋ ŋgʋ kipiyi kpiɖi kpiɖi yɔ nɛ ɛsɔmɩndʋ sɔsɔtʋCɔ-ɩ nɛ pɩta ɛzɩ ɖɩjɔzɩyɛ yɔ.+
12 Ñalɩmɩyɛ nɖɩ ɖɩwɛ ɛ-ɛsɩndaa yɔ,Ðɩ-taa ɖɔmbɛɛ nɛ miŋ mamala wena asɛ cɩɩɩ yɔ alɩɣna nɛ atɛzɩɣ mɩndʋ.
13 Nɛ Yehowa la nɛ pɩnazɩ ɛsɔdaa;+Kɩlɩm tɩŋnɩ ɖɔmbɛɛ nɛ miŋ mamala wena asɛ cɩɩɩ yɔ a-yɔɔNɛ eyele nɛ panɩɩ ɛ-nɔɔ.+
14 Ɛtɔ ɛ-tɔʋ ñɩma nɛ ɛmɩzɩ mon-koyindinaa;+Etiyini ɛ-tɛʋ ñɩlɩsʋʋ nɛ eyele nɛ pisidi-wɛ.+
15 Pɩna lɩm cukaŋ tɛɛ;*+Oo Yehowa, tɛtʋ tigila yɔɔ kuli alɩwaatʋ ndʋ ŋkalaa yɔ,Alɩwaatʋ ndʋ ŋlɩzɩ helim nɛ ñɔ-mɔɔŋ tɛɛ yɔ.+
16 Etisi e-nesi nɛ ɛsɔdaa;Ɛɖɔkɩ-m nɛ ɛhɔmɩ-m nɛ lɩm cukaŋ ñɩmbʋ tɛɛ nɛ ɛlɩzɩ.+
17 Eholi-m mon-koyindu ɖoŋ tʋ nesi tɛɛ,+Eholi-m mba papaɖaɣ-m nɛ paakɩlɩ-m ɖoŋ yɔ pe-nesi tɛɛ.+
18 Paalʋbɩnɩ-m man-kʋñɔŋ kɩyakʋ wiye,+Ɛlɛ Yehowa kaakɛnɩ man-sɩnɩyʋ.
19 Ɛlɩzɩ-m nɛ ewoni-m ɖenɖe kaɖɛ naɖɩyɛ ɛɛpɩzɩɣ nɛ ɖɩtalɩ-m yɔ;*Eholi-m mbʋ pʋyɔɔ yɔ mɔn-tɔm kaakɛdɩnɩ-ɩ.+
20 Yehowa hɛyɩɣ-m nɛ pɩlakɩ nɔɔ kʋɖʋmaɣ nɛ men-siɣsiɣ wɛtʋ;+Ɛhɛyɩɣ-m mbʋ pʋyɔɔ yɔ me-nesi tɩɖɔɔ wɛɛ.*+
21 Mbʋ pʋyɔɔ yɔ mɔnɖɔkɩ Yehowa nʋmɔŋ,Nɛ mantɩla kañatʋ lakasɩ nɛ maha mɛ-Ɛsɔ siɣye.
22 Ɛ-tɔm hʋʋ kpeekpe wɛ mɛ-ɛsɩndaa;Maakaɣ nim ɛ-paɣtʋ.
23 Mankaɣ ɖɔkʋʋ man-cɩŋgɩlɩm wɛtʋ ɛ-ɛsɩndaa,+Nɛ mankaɣ man-tɩ ɖɔkʋʋ se mantaala kɩwɛɛkɩm.+
24 Tɛtɛ nɛ Yehowa hɛyɩ-m nɛ pɩla nɔɔ kʋɖʋmaɣ nɛ men-siɣsiɣ wɛtʋ,+Tɛtɛ nɛ ɛhɛyɩ-m, mbʋ pʋyɔɔ yɔ me-nesi tɩɖɔɔ wɛɛ ɛ-ɛsɩndaa.+
25 Weyi ɛwɛ siɣsiɣ yɔ, ŋlakɩ-ɩ mbʋ pɩwɛ siɣsiɣ yɔ;+Weyi ɛwɛ cɩŋgɩlɩm yɔ, ŋwɩlɩɣ-ɩ ña-cɩŋgɩlɩm wɛtʋ;+
26 Weyi ɛwɛ kele kele yɔ, ŋwɩlɩɣ-ɩ se ŋwɛ kele kele,+Ɛlɛ weyi ɛkɛ pɩ-tɛɛ nɛ pɩ-yɔɔ tʋ yɔ, ŋwɩlɩɣ-ɩ se ŋwɛ lɛɣtʋ.+
27 Mbʋ pʋyɔɔ yɔ ŋyakɩ ajamaa* ñʋʋ+Ɛlɛ ŋluzuu tɩ kpazɩyaa.*+
28 Mbʋ pʋyɔɔ yɔ, Oo Yehowa, ñɔsɔkɩnɩ man-kanɖʋ,Ñɛkɛnɩ mɛ-Ɛsɔ weyi ɛñandɩɣ man-cɩkpɛndʋʋ yɔ.+
29 Ñakaɣnɩ-m sɩnʋʋ nɛ moyooni mɩlaa;*+Ɛsɔ ɖoŋ taa lɛ, manpɩzɩɣ nɛ mamaa koloŋa nɛ ka-wayɩ.+
30 Ɛsɔ toovenim tʋ nʋmɔʋ talɩ pilim;+Yehowa tɔm wɛ kele kele.+
Ɛkɛ kpayʋʋ mba payɩ paɖʋʋ-ɩ kʋyʋʋ yɔ.+
31 Mbʋ pʋyɔɔ yɔ akɛ Ɛsɔ nɛ pɩtasɩnɩ Yehowa?+
Nɛ akɛ kaaʋ nɛ pɩtasɩnɩ ɖɛ-Ɛsɔ?+
32 Ɛsɔ toovenim tʋ lɛ weyi esuu-m ɖoŋ yɔ,+Nɛ ɛkaɣ labʋ nɛ ma-nʋmɔʋ tʋʋzɩ.+
33 Ɛlakɩ nɛ ma-nɩŋgbanzɩ wɛɣ ɛzɩ hɩŋ ñɔɔɔ tʋ* nɩŋgbanzɩ yɔ;Ɛlakɩ nɛ mansɩŋɩɣ lona wena akʋyaa yɔ a-taa.+
34 Ɛfalɩsɩɣ me-nesi se sɩla you;Me-nesi pɩzɩɣ nɛ sikoti tɔʋ ŋgʋ palabɩnɩ ñɩɣyʋʋ kɩsɛɛmʋʋ yɔ.
35 Ŋhaɣ-m ña-kpayʋʋ ŋgʋ kɩyakɩ ma-ñʋʋ yɔ,+Ñe-nesi kɩbanzɩ ɖɔkʋʋ-m,*Nɛ ña-tɩ luzuu yeki nɛ manpɩsɩɣ sɔsɔ.+
36 Ŋwalɩsɩɣ ma-nʋmɔʋ;Pɩɩkaɣ tuu ma-nɩŋgbanzɩ.*+
37 Mankaɣ ɖʋʋ mon-koyindinaa wayɩ nɛ mehiɣ-wɛ;Maakaɣ pɩsʋʋ nɛ mantɩɖɩzɩ-wɛ.
38 Mankaɣ-wɛ tɔyɩtʋʋ nɛ paapɩzɩɣ nɛ pakʋyɩ;+Pakaɣ tɔlʋʋ ma-nɩŋgbanzɩ tɛɛ.
39 Ŋkaɣ-m haʋ ɖoŋ nɛ mala you;Ŋkaɣ labʋ nɛ mon-koyindinaa tɔlɩ mɛn-tɛɛ.+
40 Ŋkaɣ labʋ nɛ mon-koyindinaa se mɛ-ɛsɩndaa,*Nɛ mankaɣ ɖɩzʋʋ mba papaɖɩɣ-m yɔ.*+
41 Pamakɩ kubusi se pasɩnɩ-wɛ, ɛlɛ nɔɔyʋ fɛyɩ se ɛya pa-ñʋʋ;Halɩ pamakɩ kubusi nɛ Yehowa cɔlɔ kiŋ, ɛlɛ eecosuu-wɛ.
42 Mankaɣ-wɛ sɔbʋ nɛ pakpɩzɩ ɛzɩ mʋzʋʋ ŋgʋ helim kpakɩɣ yɔ;Mankaɣ-wɛ lɔʋ ɛzɩ habɛɛ yɔɔ ahɔya yɔ.
43 Ŋkaɣ-m holuu samaɣ ŋga kakʋʋ mɔn-tɔm yɔ ke-nesi tɛɛ.+
Ŋkaɣ-m sɩʋ ajɛɛ ñʋʋdʋ.+
Samaɣ ŋga mantɩtɩlɩ-kɛ yɔ, kakaɣ-m ɖʋʋ lɩm.+
44 Kañɩtɩɣ nɛ kanɩɩ mɔ-yɔɔ tɔm lɛ, kakaɣ-m ñam;Agɔma kaɣ kɔm nɛ poluŋ mɛn-tɛɛ nɛ sɔɔndʋ.+
45 Agɔma kaɣ lesuu abalɩtʋ;*Pakaɣ lɩnʋʋ pe-tilima ɖoŋ ñɩna taa nɛ peseliɣ kɔm yɔɔ.
46 Yehowa wɛ wezuu! Pasa man-Kaaʋ!+
Pɔñɔkɩ ma-ñʋʋ yabʋ tɛ Ɛsɔ.+
47 Ɛsɔ toovenim tʋ kpaɣ man-kɩmɩyɛ;+Eluzuu samasɩ mɛn-tɛɛ.
48 Eholuu-m mon-koyindinaa mba pɔkɔ pana yɔ pe-nesi tɛɛ;Ŋkpazɩɣ-m mba poyouni-m yɔ pa-ñʋʋ yɔɔ;+Ŋyakɩ ma-ñʋʋ puuyaɣ tʋ nesi tɛɛ.
49 Pʋyɔɔ lɛ, Oo Yehowa, mankaɣ-ŋ sam ajɛɛ hɛkʋ taa,+Nɛ mankaɣ teu ña-hɩɖɛ samtʋ hendu.*+
50 Ɛlakɩ tʋma sɔsɔna se ɛya e-wiyaʋ ñʋʋ;*+Ɛwɩlɩɣ sɔɔlɩm siɣsiɣ ñɩmbʋ ɛ-tɛ patam num,+
Ɛwɩlɩɣ-pʋ Daviid nɛ ɛ-lʋlʋʋ taa tʋ* tam.+
Pɩ-tɛɛ tɔm
^ Yaa «ma-ñʋʋ yaɖʋ ɖoŋ tʋ»; Cɔnɩ Tɔm pee sɔsɔna tɔbʋʋ lɩzʋʋ (Hɩlʋʋ).
^ Yaa «mo-lone kʋkʋyɩyɛ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «Ɛɛcaɣ helim.»
^ Yaa «Pɩna lɩm lɔɔŋ.»
^ Yaa «ewoni-m lone nɖɩ ɖɩwalaa yɔ ɖɩ-taa.»
^ Piye piye, «me-nesi wɛ kele kele.»
^ Yaa «mba pɛwɛ kʋñɔŋ taa yɔ.»
^ Piye piye, «ŋluzuu ɛsa wena akpazɩɣ a-tɩ yɔ.»
^ Yaa «ɛtɛlɛmwaa.»
^ Hɩŋ ñɔɔɔ tʋ kɛnɩ nam weyi ɛwɛnɩ hɩŋ sakɩyɛ yɔ.
^ Yaa «teɣliɣ-m.»
^ Yaa «ma-nɩŋgbanzɩ ɛsa.»
^ Yaa «Ŋkaɣ-m cɛlʋʋ mon-koyindinaa siɣye.»
^ Piye piye, «suluu mba papaɖɩɣ-m yɔ pɔ-nɔsɩ.»
^ Yaa «kaɣ lou.»
^ Yaa «mankaɣ minziiki mabʋ ña-hɩɖɛ.»
^ Yaa «Ɛhaɣ wabɩtʋ sɔsɔtʋ e-wiyaʋ.»
^ Piye piye, «e-ɖomaɣ.»
