Aduwa 14:1-35
14 Halʋ weyi ɛwɛnɩ lɔŋsɩnɖɛ siŋŋ yɔ, ɛmaɣ ɛ-ɖɩɣa;+Ɛlɛ halʋ kɩmɛlɛŋ yɔkʋʋ ɛ-ɖɩɣa nɛ ɛ-maɣmaɣ e-nesi.
2 Weyi ɛɖɔŋ siɣsiɣ wɛtʋ taa yɔ, eseɣ Yehowa sɔɔndʋ,Ɛlɛ weyi ɛ-nʋmɔŋ tɩtʋʋzɩ* yɔ, ɛlɛ ñeniŋ Ɛsɔ.
3 Tɩ kpazʋʋ ɖaʋ wɛ kɩmɛlɛŋ nɔɔ taa,Ɛlɛ lɔŋsɩnɖaa ndomee kaɣ pɔ-yɔɔ kandɩyʋʋ.
4 Ðenɖe nɔ nɔɔyʋ fɛyɩ yɔ, pulone taa wɛɣ cɩɖɩ cɩɖɩ,Ɛlɛ nɔ ɖoŋ yekina nɛ pakʋŋ tɔɔnaɣ sakɩyɛ.
5 Aseɣɖe tʋ siɣsiɣ tʋ ɛɛcɛtɩɣ,Ɛlɛ aseɣɖe tʋ cɛtɩyʋ nɔɔ hutuu cɛtɩm tɔm.+
6 Ɛyaa woŋiyu ñɩnɩɣ lɔŋsɩnɖɛ, ɛlɛ ɛɛnaɣ-ɖɩ;Ɛlɛ weyi ɛwɛnɩ tɔm taa nɩʋ lɛɣtʋ yɔ, ehikiɣ sɩmtʋ kɛlɛʋ yem.+
7 Posi ña-tɩ nɛ kɩmɛlɛŋ,Mbʋ pʋyɔɔ yɔ ŋŋkaɣ hiɣu sɩmtʋ e-ndomee yɔɔ.+
8 Lɔŋsɩnɖɛ sɩɣnɩ lɔŋsɩnɖʋ se ɛnɩɩ nʋmɔʋ ŋgʋ ɛkpaɣaa yɔ kɩ-tɔbʋʋ,Ɛlɛ kɩmɛlɛmɩŋ kɩmɛlɛndʋ peɣziɣ ɩ-maɣmaɣ.*+
9 Kɩmɛlɛmɩŋ kpakɩɣ ɩ-kɩwɛɛkɩm ɛzɩ aleɣya pʋyʋ yɔ,*+Ɛlɛ ɛyaa siɣsiɣ tɩnaa sɔɔlɩ ceɣu.
10 Laŋɩyɛ sɩmnɩ ɖɩ-maɣmaɣ ɖɩ-wɩzasɩ,*Agbaaɣdaa tʋ nɔɔyʋ ɛɛpɩzɩɣ nɛ ɛnɩɩ leleŋ weyi laŋɩyɛ nɩɣ yɔ.
11 Pakaɣ ɖɩzʋʋ kañatʋ tɩnaa ɖɩɣa,+Ɛlɛ pɩkaɣ ɖɔmnʋʋ camɩyɛ ɛyaa siɣsiɣ tɩnaa kizinziku.
12 Nʋmɔʋ nakʋyʋ pɩzɩɣ nɛ kɩtʋʋzɩ nɔɔyʋ ɛsɩndaa,+Ɛlɛ pɩtɛŋna se kiwokini sɩm taa.+
13 Ɛyʋ laŋɩyɛ pɩzɩɣ nɛ ɖɩwɛɛ siziŋ taa alɩwaatʋ ndʋ eɖiɣni hoŋuu yɔ,Nɛ taa leleŋ pɩzɩɣ nɛ ɛtɛmnɩ laŋwɛɛkɩyɛ.
14 Weyi ɛfɛyɩ siɣsiɣ ɛ-laŋɩyɛ taa yɔ, ɛkaɣ kʋm mbʋ ɛ-ɖɔnɛ lʋlʋʋ yɔ,+Ɛlɛ ɛyʋ kɩbanʋ hikiɣ ɛ-lakasɩ wazasɩ.+
15 Ɛyʋ weyi ɛfɛyɩnɩ lɛɣtʋ yɔ,* etisiɣ tɔm tɩŋa yem,Ɛlɛ lɔŋsɩnɖʋ maɣzɩɣ nɩŋgbanzɩ nzɩ payɩ ɛkpɛzɩɣ yɔ sɩ-yɔɔ camɩyɛ.+
16 Lɔŋsɩnɖʋ tɩlɩɣ labʋ, nɛ eseɣ kɩdɛkɛdɩm,Ɛlɛ kɩmɛlɛŋ paa fɛyɩnɩ natʋyʋ* nɛ kɩtaɣ kɩ-tɩ liu siŋŋ.
17 Ɛyʋ weyi ɛkɔʋ pana lɛɛ lɛɛ yɔ, ɛlakɩ kɩmɛlɛndʋ lakasɩ;+Ɛlɛ ɛyaa paɖɩɣ weyi ɛmaɣzɩɣ tɔm yɔɔ camɩyɛ yɔ.*
18 Mba pɛfɛyɩnɩ lɛɣtʋ yɔ,* kɩmɛlɛndʋ kaɣnɩ pɩsʋʋ pa-ñɩm,Ɛlɛ hulaɣ ŋga papaŋ lɔŋsɩnɖaa yɔ, ŋga lɛ sɩmtʋ.+
19 Ɛyaa kɩdɛkɛdaa kaɣ luŋuu ɛyaa kɩbama ɛsɩndaa,Nɛ kañatʋ tɩnaa kaɣ luŋuu ɛyaa siɣsiɣ tɩnaa nɔnɔsɩ tɛɛ.
20 Kʋñɔndʋ cɔlɔ mba maɣmaɣ paɖɩɣ-ɩ,+Ɛlɛ ñɩm tʋ wɛnɩ taabalaa sakɩyɛ.+
21 Weyi eniŋ ɛ-ɛgbaɣdʋ yɔ, ɛlabɩ kɩwɛɛkɩm,Ɛlɛ weyi ɛnaɣ ɛjam pʋtɔdɩyɛ yɔ, ɛkɛ koboyaɣ tʋ.+
22 Mba pataŋ tamasɩ kɩdɛkɛdɩsɩ yɔ, pɩtɩkɛ mba kaɣnɩ lebu na?
Ɛlɛ mba paɖʋ pa-taa se palakɩ kɩbandʋ yɔ, pakaɣ hiɣu sɔɔlɩm siɣsiɣ ñɩmbʋ nɛ siɣsiɣ wɛtʋ.+
23 Kɛzɛɣa wɛ paa tʋmɩyɛ ɖoŋ ñɩnɖɛ nɖɩ lɛ ɖɩ-labʋ taa,Ɛlɛ nɔɔ taa tɔm yem kɔŋnɩ kʋñɔndʋtʋ.+
24 Lɔŋsɩnɖʋ awiya hulaɣ kɛnɩ ɛ-ñɩm;Ɛlɛ kɩmɛlɛŋ tulutu kɛnɩ tulutu ɖeke.+
25 Aseɣɖe tʋ toovenim tʋ yakɩ ɛyaa* ñʋŋ,Ɛlɛ aseɣɖe tʋ cɛtɩyʋ nɔɔ hutuu cɛtɩm tɔm.
26 Ɛyʋ weyi eseɣ Yehowa sɔɔndʋ yɔ, ɛtaɣ-ɩ liu pɩtɩŋa pɩ-taa,+Nɛ sɔɔndʋ seu mbʋ pɩkaɣnɩ kɛʋ kʋyʋʋ ɖɩɖʋyɛ ɛyʋ ɛnʋ e-piya.+
27 Yehowa sɔɔndʋ seu kɛnɩ wezuu hiɖe,Nɛ piyeki se ɛyʋ ɛtaatɔlɩ sɩm kaamɩŋ taa.
28 Wiyaʋ weyi ɛ-samaɣ ɖɔwa yɔ, paɖʋʋ-ɩ hɩɖɛ kpem;+Ɛlɛ wiyaʋ weyi ɛfɛyɩnɩ samaɣ yɔ, pɩɖʋzʋʋ-ɩ.
29 Weyi ɛɛkɔʋ pana lɛɛ lɛɛ yɔ, ɛwɛnɩ lɛɣtʋ kpem,+Ɛlɛ weyi ɛfɛyɩnɩ suuɖu yɔ, ɛwɩlɩɣ ɛ-kɩmɛlɛndʋ kaɣlaa.+
30 Laŋɩyɛ nɖɩ ɖɩwɛ hɛɛɛ yɔ, ɖɩhaɣ wezuu* ɛyʋ tomnaɣ,Ɛlɛ sʋsɩ lakɩ nɛ mɔɔ pʋkɩ.+
31 Weyi emuluu ɛjam yɔ, ɛtʋʋ ɛ-Mayʋ;+Ɛlɛ weyi ɛnaɣ kʋñɔndʋ pʋtɔdɩyɛ yɔ, ɛɖʋʋ hɩɖɛ ɛ-Mayʋ.+
32 Kañatʋ tʋ maɣmaɣ ɛzaɣtʋ kaɣnɩ-ɩ tuzuu nɛ ɛtɔlɩ,Ɛlɛ ɛyʋ siɣsiɣ tʋ cɩŋgɩlɩm wɛtʋ kaɣnɩ kɛʋ ɛ-ɖɩmɛlɩyɛ.+
33 Lɔŋsɩnɖɛ cakɩ ɖiɣ ɖiɣ weyi ɛwɛnɩ tɔm taa nɩʋ lɛɣtʋ yɔ ɛ-laŋɩyɛ taa,+Ɛlɛ kɩmɛlɛmɩŋ ñɩnɩɣ se ɩwɩlɩ ɩ-lɔŋsɩnɖɛ.
34 Ɛjaɖɛ naɖɩyɛ siɣsiɣ wɛtʋ yeki nɛ paɖʋ-ɖɩ hɩɖɛ,+Ɛlɛ kɩwɛɛkɩm ɖʋʋ samaɣ fɛyɛ.
35 Lɩmɖʋyʋ weyi ɛlakɩ lɔŋsɩnɖɛ lakasɩ yɔ, ɛ-tɔm kɛdɩɣnɩ wiyaʋ;+Ɛlɛ wiyaʋ kɔʋ pana kpem nɛ weyi ɛlakɩ fɛyɛ lakasɩ yɔ.+
Pɩ-tɛɛ tɔm
^ Yaa «kotaa.»
^ Pɩpɩzɩɣ pɩkɛ, «kɩmɛlɛmɩŋ peɣziɣ lalaa nɛ ɩ-kɩmɛlɛndʋ.»
^ Yaa «Kɩmɛlɛmɩŋ paa fɛyɩnɩ mbʋ ɩwɛɛkaa yɔ pɩ-ñɔɔzʋʋ.»
^ Yaa «ɖɩ-kalɩzaɣ wɩzasɩ.»
^ Yaa «Kɩɩsɩŋɩyʋ.»
^ Yaa «kɩmɛlɛŋ kɔʋ pana.»
^ Yaa «weyi ɛwɛnɩ lɛɣtʋ ndʋ tɩsɩɣnɩ-ɩ se ɛmaɣzɩ camɩyɛ yɔ.»
^ Yaa «Mba pɛkɛ kɩɩsɩŋɩyɩŋ yɔ.»
^ Yaa «kalɩzasɩ.»
^ Yaa «alaafɩya.»
