Pɩlabɩ pʋtɔdɩyɛ se mɔnkɔm nɛ mɛwɛɛnɩ ɛzɩ pɩnzɩ 13 mbʋ yɔ lɛ, taabalɩyɛ kɩbanɖɛ nɖɩ ɖɩɩwɛ ma nɛ Yehowa ɖɛ-hɛkʋ taa yɔ ɖɩpaɣzɩ hɛʋ. Pɩlakaɣ-m ɛzɩ mon-sukuli taa ñɩma wɛ pa-tɩ yɔɔ hɔɔlɩŋ sakɩyɛ taa yɔ, nɛ piyeba nɛ manpaɣzɩ maɣzʋʋ se nabʋyʋ wɛɛ nɛ pɩɖɛɣ mɔ-yɔɔ. Mamaɣzaɣ se paɣtʋ ndʋ ma-lʋlɩyaa ɖʋwaɣ-m yɔ nɛ Krɩstʋ ñɩma paɣtʋ kɩlɩ kaɖɛ. Nɛ pɩlakaɣ-m ɛzɩ fezuu taa tʋma kɩlɩ kaɖɛ yɔ. Paa wiɖiyi mantɩpɩtɩ kpa se Yehowa wɛɛ yɔ, maapaɣzɩ hɛʋ fezuu taa.

Mantaayele tɔm susuu, ɛlɛ alɩwaatʋ ndʋ mankpakaɣ nɛ monsusuu tɔm yɔ tɩtaatasɩ ɖɔʋ paa ññɩɩ. Alɩwaatʋ ndʋ mɛnɖɛɣ tɔm susuu yɔ, mantañɔɔzʋʋ man-tɩ kpa, pʋyɔɔ lɛ pɩɩwɛɣ-m kaɖɛ se ma nɛ ɛyaa ɖɩpaɣzɩ kɛdaɣ yaa ɖiwolo kɛdaɣ yɔɔ. Mbʋ pɩlɩ pɩ-taa yɔ lɛ se mɔn-tɔm susuu taalʋlʋʋ pee nɛ pɩtaahaɣ-m taa leleŋ, mbʋ kaayebina nɛ mantaatasɩ sɔɔlʋʋ tɔm susuu tʋmɩyɛ. Mɔnpɔzaɣ man-tɩ se: ‘Ɛzɩ ɛzɩma ɛyʋ pɩzɩɣ nɛ esusuu tɔm paa kpɩtaʋ ŋgʋ nɛ paa fenaɣ ŋga?’

Mɔnkɔm nɛ mɛwɛɛnɩ pɩnzɩ 17 lɛ, maasɔɔlaa se mɛwɛɛ man-tɩ yɔɔ. Pʋyɔɔ lɛ, menkpeɣli mo-wondu, malɩɩ ɖɩɣa nɛ mowolo mancaɣ Ositralii ɛjaɖɛ taa. Alɩwaatʋ ndʋ malɩ ɖɩɣa yɔ, pɩɩcɛyɩ  ma-lʋlɩyaa siŋŋ. Panɩɣzaɣ, ɛlɛ pamaɣzaɣ se mankaɣ wobu pɩ-yɔɔ nɛ malakɩ fezuu taa tʋma wena malakaɣ yɔ.

Maawɛ Ositralii lɛ, alɩwaatʋ ndʋ mankpakaɣ nɛ malakɩnɩ Yehowa tʋmɩyɛ yɔ tɩ-yɔɔ pasaa nɛ pɩkpaɖɩ. Maapaɣzɩ fɛʋ kediɣzisi. Maaɖʋ taabalɩyɛ nɛ piya evelisi. Ɛzɩ ma yɔ, sɩɩsɔɔlɩ wobu kediɣzisi nasɩyɩ nɛ alɩwaatʋ lɛɛtʋ lɛ, siwokaɣ ɖoo taa aleɣya lona (boîte de nuit waa) taa nɛ sɩñɔʋ sʋlʋm nɛ sɩpaɣ. Mamaɣzɩɣ me-wezuu caɣʋ taa alɩwaatʋ ndʋ tɩ-yɔɔ lɛ, menɖiɣziɣna se ma-nɩŋgbaŋaɣ kʋɖʋmaɣ kaawɛ toovenim taa nɛ lɛɛka wɛɛ ɛjaɖɛ yɔɔ, ɛlɛ toovenim taa lɛ mantaanɩɣ leleŋ ɖoli.

Pɩnzɩ naalɛ mbʋ yɔ wayɩ lɛ, mankatɩ koobu halɩñɩnʋ nɔɔyʋ alɩwaatʋ natʋyʋ pazɩ nɛ eeyeba nɛ manpaɣzɩ maɣzʋʋ wezuu ŋgʋ mancakaɣ yɔ kɩ-yɔɔ, ɛlɛ ɛ-maɣmaɣ ɛtaaɖiɣzina. Ma nɛ koobiya halɩñɩma aɖamɛɛ kagbanzɩ ɖɩɩwɛnɩ ɖɩɣa kʋɖʋmaɣ taa, nɛ ɖɩɩmʋ egeetiye yɔɔ cɔnɩyʋ nɔɔyʋ nɛ ɛ-halʋ Tamara se pacaɣ ɖɔ-cɔlɔ kpɩtaʋ kʋɖʋmʋʋ. Alɩwaatʋ ndʋ Tamara walʋ ɛsɩyɛ sɛɣnɩ ɛgbɛyɛ taa tʋma naayɛ yɔ, ɛkpakaɣ alɩwaatʋ nɛ ɖa nɛ ɩ ɖɩcakɩ nɛ ɖɩkʋʋ tanaʋ nɛ ɖihoŋuu. Mbʋ maasɔɔlaa. Ɛɛkɛ ɛyʋ weyi ekeŋni ɛyaa camɩyɛ yɔ, nɛ pɩwɛ kɛlɛʋ se ɛyʋ ɛyɔɔdɩnɩ-ɩ. Pɩɖɩɣzɩ-m se ɛyʋ weyi ɛ-ɛsɩyɛ sɛnɩ Yehowa sɛtʋ yɔ, ɛpɩzɩɣ nɛ ɛkpaɣ ɛ-alɩwaatʋ nɛ ɖa nɛ ɩ ɖileɣyiɣ.

Tamara kaawɛ kpekpeka siŋŋ. Ɛɛsɔɔlɩ toovenim nɛ tɔm susuu tʋmɩyɛ, nɛ ɛ-wɛtʋ ndʋ tɩɩwɛnɩ ɖoŋ mɔ-yɔɔ. Ɛ-taa kaawɛ leleŋ se ɛwɛɛ nɛ ɛhaɣ Yehowa mbʋ ɛwɛna nɛ pɩkpaɖɩ ɖeu yɔ. Ɛlɛ ma lɛ, man-taa taawɛɛ leleŋ mbʋ pʋyɔɔ yɔ, mantaalakɩ mon-ɖoŋ ɖeɖe. Ɛ-wɛtʋ kɩbandʋ nɛ taa leleŋ weyi ɛɛwɛna yɔ, pɩɩwɛnɩ ɖoŋ siŋŋ me-wezuu caɣʋ yɔɔ. Ɛ-kɩɖaʋ sɩnɩ-m nɛ mamaɣzɩ toovenim tɔm kɩcɛyɩtʋ tʋnɛ tɩ-yɔɔ: Yehowa sɔɔlaa se ɖa-tɩŋa ɖɩɖʋ-ɩ lɩm “laŋhʋlʋmɩyɛ taa” nɛ “woŋgbamɩyɛ nɛ leleŋ wondu.”—Keɣa 99:2.

Maasɔɔlaa se mehiɣ taa leleŋ weyi Tamara hikaɣ yɔ, ɛlɛ pʋcɔ nɛ mehiɣ taa leleŋ ɛnɩ lɛ pɩɩwɛɛ se mala lɛɣzɩtʋ sɔsɔtʋ natʋyʋ. Pɩɩkpaɣ-m alɩwaatʋ, ɛlɛ pazɩ pazɩ lɛ manpaɣzɩ kpɛzʋʋ nɩŋgbanzɩ cikpesi nasɩyɩ. Maapaɣzɩ man-tɩ ñɔɔzʋʋ pʋcɔ nɛ mɛnɖɛɣ tɔm susuu nɛ nabʋyʋ taa malakaɣ nʋmɔʋ lɩzʋʋ sɩnɩyʋ tʋmɩyɛ. Pɩɩsɩnɩ-m nɛ sɔɔndʋ taakɩlɩɣ-m  kpaʋ nɛ mantaɣaɣ man-tɩ liu nɛ pɩkpaɖɩɣ. Malakaɣnɩ tʋmɩyɛ Bibl tɔm susuu taa nɛ pɩkɩlɩɣ, piyeba nɛ mɔnsɔɔlɩ tɔm susuu tʋmɩyɛ nɛ pɩkpaɖɩ. Pitileɖi lɛ, manpaɣzɩ labʋ nʋmɔʋ lɩzʋʋ sɩnɩyʋ tʋmɩyɛ paa fenaɣ ŋga.

Maapaɣzɩ taabalɩyɛ ɖʋʋ nɛ ɛyaa mba pa-pɩnzɩ wɛ ndɩ ndɩ yɔ. Ɛyaa mba, palakaɣ po-ɖoŋ ɖeɖe Yehowa sɛtʋ taa nɛ pehikaɣ taa leleŋ ɛ-tʋmɩyɛ taa. Pa-kɩɖaʋ kɩbaŋʋ kaasɩnɩ-m nɛ manɖaɣnɩ maɣzʋʋ mbʋ pɩ-tɔm kɩlɩ cɛyʋʋ me-wezuu caɣʋ taa yɔ pɩ-yɔɔ, nɛ pɩɩsɩnɩ-m nɛ mɛwɛɛnɩ fezuu taa ɖʋtʋ kɩbandʋ. Maaɖaɣnɩ paɣzʋʋ hiɣu taa leleŋ tɔm susuu taa nɛ pɩkɩlɩɣ, nɛ alɩwaatʋ wɛɛ nɛ tɩɖɛɣ lɛ, manpaɣzɩ paa ɖooye nʋmɔʋ lɩzʋʋ tʋmɩyɛ. Pɩnzɩ sakɩyɛ wayɩ, man-kajalaɣ ɖeɖe lɛ manawa se mankam lila ɛgbɛyɛ taa, mehiɣ taa leleŋ nɛ ɛgbɛyɛ wɛ-m ɛzɩ man-ɖɩɣa yɔ.

Pɩnaɣ kʋɖʋmaɣ wayɩ lɛ, mankatɩ Alex. Ɛlakɩ camɩyɛ lakasɩ, ɛyɔɔdʋʋ toovenim nɛ ɛsɔɔlɩ Yehowa nɛ tɔm susuu tʋmɩyɛ. Ɛɛkɛ ɛgbɛyɛ taa tʋmlaɖʋ nɛ ɛɛkɛʋ paa ɖooye nʋmɔʋ lɩzɩyʋ yɔ, pɩɩlabɩ pɩnzɩ loɖo. Pɩtasɩ lɛ, Alex kaakpaɣ alɩwaatʋ natʋyʋ nɛ ɛɖʋ nesi tɔm susuu tʋmɩyɛ Malaawii; pɩɩpɔzɩ tɔm susuyaa peeɖe. Ɛɛwɛ peeɖe lɛ, ɛɖʋ taabalɩyɛ nɛ Ɛsɔtɔm tiyiyaa nɛ pɛ-wɛtʋ kaawɛnɩ ɖoŋ siŋŋ ɛ-yɔɔ, nɛ paaseɣti-i se ewolo pɩ-yɔɔ nɛ ɛsɩɣ Kewiyaɣ tʋma kajalaɣ lone taa.

Pɩnaɣ 2003 taa ma nɛ Alex ɖɩɖɔkɩ nesi, nɛ kpaɣnɩ mbʋ lɛ ɖiwobi pɩ-yɔɔ nɛ ɖɩlakɩ alɩwaatʋ tɩŋa Ɛsɔ sɛtʋ tʋmɩyɛ. Ðɩkpɛlɩkɩ lɔŋ kɩbaŋ sakɩyɛ, nɛ Yehowa wazɩ-ɖʋ hɔɔlɩŋ sakɩyɛ taa.

Pɩnaɣ 2009 taa, paha-ɖʋ waɖɛ se ɖɩkɛ Ɛsɔtɔm tiyiyaa Timor oriental. Pɩkɛ Ɛndoneezii lɩm hɛkʋ taa tɛtʋ cikpetu natʋyʋ. Pɩɩɖɩɣzɩ-ɖʋ kpem nɛ pɩtaalakɩ-ɖʋ lɛɛ lɛɛ, ɛlɛ sɔɔndʋ kpaɣaɣ-ɖʋ ɖɔɖɔ alɩwaatʋ kʋɖʋmtʋ ndʋ tɩ-taa. Fenasɩ kagbanzɩ wayɩ lɛ, ɖɩtalɩ tɛtʋ sɔsɔtʋ ndʋ payaɣ se Dili yɔ tɩ-taa.

Ɛzɩma ɖɩlɛɣzɩ lone yɔ pʋyɔɔ lɛ, pɩɩpɔzaa se ɖɩla lɛɣzɩtʋ sakɩyɛ ɖe-wezuu caɣʋ taa. Pɩɩpɔzaa se ɖɩñaɣ pana nɛ peeɖe sɔnzɩ, kʋnʋŋ, tɔɔnaɣ nɛ wezuu caɣʋ malɩnɩ-ɖʋ. Tɔm susuu taa, ɖoŋ ɖoŋ  ɖɩkataɣ ɛyaa mba pɛkɛ kʋñɔndɩnaa siŋŋ yɔ, mba palabɩ sukuli pazɩ yaa mba patɩla sukuli paa ññɩɩ yɔ, nɛ mba palabɩ-wɛ kañatʋ lakasɩ yɔ. Nɛ ɖɩkataɣ ɛyaa sakɩyɛ mba you yaa ñam ñam lakasɩ yeba nɛ pɩcamɩ-wɛ tomnaɣ yɔɔ nɛ maɣzɩm taa yɔ. *

Tɔm susuu kaawɛ ɖeu kpem. Kɩɖaʋ nakʋyʋ yɔ: Kɩyakʋ nakʋyʋ mankatɩ halɩbɩɣa nakɛyɛ, kaawɛnɩ pɩnzɩ 13 nɛ ka-taa taawɛɛ leleŋ. Payaɣ-kɛ se Maria. * Ko-ɖoo kaasɩbʋ yɔ, pɩɩlabɩ pɩnzɩ pazɩ yem nɛ kaataanaɣ ka-caa ɖoŋ ɖoŋ. Ɛzɩ pɩɩwɛʋ Maria ɖaɣʋnaa sakɩyɛ hɔɔlʋʋ taa yɔ, Maria taatɩlɩ mbʋ ɛsɔɔlaa se ɛla e-wezuu caɣʋ taa yɔ. Mɔntɔzʋʋ se kɩyakʋ nakʋyʋ eheyaɣ-m ɛzɩma pɩlakaɣ-ɩ yɔ lɛ, ewi siŋŋ. Ɛlɛ, mantaanɩɣ ndʋ ɛwɛɛ nɛ ɛyɔɔdʋʋ yɔ tɩ-taa mbʋ pʋyɔɔ yɔ, mantaatɩɩpaɣzɩtɩ yɔɔdʋʋ ɛ-kʋnʋŋ camɩyɛ. Peeɖe mantɩmnɩ Yehowa nɛ mɔnpɔzɩ-ɩ se ɛsɩnɩ-m nɛ mankpazɩ-ɩ ɖoŋ, nɛ pʋwayɩ lɛ manpaɣzɩ-ɩ kalʋʋ masɩ nzɩ sɩhɛzɩɣ ɛyʋ laŋɩyɛ yɔ. Pɩnzɩ pazɩ nzɩ sɩtɩŋ pʋwayɩ yɔ sɩ-taa, menɖiɣzinaa se toovenim lɛɣzɩ Maria wɛtʋ, e-wondu suu nɛ e-wezuu caɣʋ. Ɛha ɛ-tɩ nɛ pamɩyɩsɩ-ɩ lɩm nɛ lɛɛlɛɛyɔ ɛ-maɣmaɣ ɛwɛnɩ Bibl kpɛlɩkɩyaa. Sɔnɔ, Maria wɛnɩ fezuu taa hɔʋ sɔsɔʋ nakʋyʋ, nɛ eɖiɣzinaa se kɩ-taa ñɩma sɔɔlɩ-ɩ siŋŋ.

Yehowa wɛɛ nɛ ɛwazɩɣ tɔm susuu tʋmɩyɛ yɔɔ Timor oriental ɛjaɖɛ taa. Peeɖe tɔm susuyaa sakɩyɛ ha pa-tɩ nɛ pamɩyɩsɩ-wɛ lɩm pɩnzɩ hiu nzɩ sɩɖɛwa pitileɖita yɔ sɩ-taa, paa mbʋ yɔ pa-taa sakɩyɛ pɩsɩ nʋmɔʋ lɩzɩyaa, ɛgbɛyɛ taa tʋmlaɖaa yaa ɛgbɛyɛ taa ɛzʋtʋyaa. Lalaa ñalakɩ tʋmɩyɛ tɔm ɖɛzʋʋ ɖɩsɩ taa, nɛ paɖʋʋ nesi nɛ patayɩɣ fezuu taa tɔɔnaɣ pe-egeetiye taa kʋnʋmɩŋ taa. Peteɣ hendu kediɣzisi taa nɛ manɩɣ, manaɣ pɛ-ɛsɩndaa nɛ amʋʋya nɛ ɛzɩma pɛɖɛɣnɩ ɛsɩndaa fezuu taa yɔ lɛ, pɩhaɣ-m taa leleŋ siŋŋ.

Wezuu ŋgʋ ɖɩcaɣ Timor oriental ɛjaɖɛ taa yɔ, kɩwɛ ndɩ kpem nɛ Ositralii ñɩŋgʋ. Ɛlɛ mehiɣ taa leleŋ siŋŋ peeɖe nɛ mantaamaɣzɩ pɩ-yɔɔ. Nabʋyʋ taa, pañɩkaɣ ɖa nɛ ɛyaa sakɩyɛ lɔɔɖɩyɛ cikpeɖe naɖɩyɛ taa, nɛ paɖʋwaɣ ɖɩ-taa ɖɔɖɔ kpakpasɩ nzɩ pawɩsaa yɔ nɛ ɖozi wondu ndʋ payabɩ peeɖe kɩyakʋ taa yɔ. Avema naayɛ, ɖɩkpɛlɩkaɣnɩ ɛyaa Bibl ɖɩsɩ cikpesi taa. Soŋaɣ lakaɣ kpem, kʋzɔɔtʋ ñɛwɛɣ tataa nɛ kalimee seɣaɣ nɛ acɔʋ-ɖʋ nɛ ataŋ. Ɛlɛ, paa ɖɩkatɩ kala yɔ, ɖoŋ ɖoŋ lɛ mamaɣzaɣ se: ‘Pɩwɛ ɖeu kpem!’

Mamaɣzɩɣ pɩnzɩ nzɩ sɩɖɛwa yɔ sɩ-yɔɔ lɛ, mɛwɛnɩ ɛsɩmɩyɛ siŋŋ ma-lʋlɩyaa yɔɔ. Paalabɩ po-ɖoŋ ɖeɖe nɛ pawɩlɩ-m Yehowa nʋmɔŋ nɛ paaɖʋ-m nesi, halɩ pɩkpɛndɩnɩ alɩwaatʋ ndʋ taabalɩyɛ nɖɩ ɖɩwɛ ma nɛ Yehowa ɖɛ-hɛkʋ taa yɔ ɖɩpasaa yɔ. Tɔm ndʋ tɩwɛ Aduwa 22:6 taa yɔ tɩkɛ toovenim mɔ-hɔɔlʋʋ taa. Paaba nɛ Daada pa-taa wɛnɩ ma nɛ Alex leleŋ, pa-taa wɛ leleŋ se Yehowa wɛɛ nɛ ɛlakɩnɩ-ɖʋ tʋmɩyɛ. Kpaɣnɩ pɩnaɣ 2016 lɛ, paha-ɖʋ waɖɛ nɛ ɖɩlakɩ egeetiye yɔɔ cɔnʋʋ tʋmɩyɛ Ositralazii ɛgbɛyɛ piliŋa taa.

Pɩwɛ-m kaɖɛ se mentisi se alɩwaatʋ natʋyʋ, mamaɣzaɣ se tɔm susuu tʋmɩyɛ kɛ sʋʋtʋ. Lɛɛlɛɛyɔ mɔnsɔɔlɩ tɔm susuu tʋmɩyɛ! Mɔnkɔm nɛ menɖiɣzina se paa ɛbɛ ɛtɩɩtalɩɣ-ɖʋ ɖe-wezuu caɣʋ taa yɔ, ye ɖɩsɛɣ Ɛsɔ nɛ ɖa-laŋɩyɛ pilim yɔ, pi-ɖeke piyekina nɛ ɖihiɣ taa leleŋ siŋŋ. Toovenim taa lɛ, pɩnzɩ 18 nzɩ ma nɛ Alex ɖɩtɛm kpaɣʋ nɛ ɖɩsɛɛnɩ Yehowa yɔ, sɩ-taa mankɩlɩ hiɣu taa leleŋ siŋŋ me-wezuu caɣʋ taa. Lɛɛlɛɛyɔ, menɖiɣzinaa se tɔm ndʋ Keɣa maɖʋ Daviid heyi Yehowa yɔ, tɩkɛ toovenim. Ɛyɔɔdaa se: “Mba paɖʋ-ŋ kʋyʋʋ yɔ, pehiɣ laŋhʋlʋmɩyɛ, ɛɛɛ, pa-taa ɩhʋlʋmɩ kaalɛyɩtʋ. . . . Nɛ papaɣnɩ-ŋ, mba pɔsɔɔlɩ ña-hɩɖɛ yɔ.”—Keɣa 5:12.