Ɛgbɛyɛ taa koobiya wɩlɩ-wɛ sɔɔlɩm
YOMARA nɛ e-newaa Marcelo nɛ Hiver pɛwɛ Guwatemala tɛtʋ cikpetu natʋyʋ taa. Yomara nɛ Yehowa Aseɣɖe Tɩnaa papaɣzɩ Bibl kpɛlɩkʋʋ nɛ pʋwayɩ lɛ e-newaa ɖɔɖɔ paɣzɩ Bibl kpɛlɩkʋʋ. Ɛlɛ kaɖɛ naɖɩyɛ kaawɛɛ. Pa-naadozo paakɛ yʋlʋmaa nɛ pataatɩlɩ yʋlʋmaa kʋnʋŋ kalʋʋ. Pʋyɔɔ weyi ɛkpɛlɩkaɣnɩ-wɛ Bibl yɔ ɛkalaɣ-wɛ hɔɔlʋʋ ŋgʋ pɛkpɛlɩkɩɣ yɔ nɛ masɩ nzɩ sɩwɛ pɩ-taa yɔ.
Pɩɩwɛ-wɛ kaɖɛ ɖɔɖɔ se powolo ɛgbɛyɛ taa kediɣzisi. Kewiyaɣ Kpaaŋ ŋgʋ kɩkɩlɩ-wɛ ñɔtɩnʋʋ yɔ, pɩɩwɛɛ se pɔɖɔ cɛcɛsɩ 40 pʋcɔ nɛ patalɩ kɩ-taa, nɛ pa-maɣmaɣ pataapɩzɩɣ se pɔɖɔ pe-ɖeke nɛ powolo. Ɛlɛ ɛgbɛyɛ taa koobiya labɩ ɖʋtʋ nɛ pakpakɩɣ-wɛ nɛ powokini kediɣzisi tɩŋa. Nɛ alɩwaatʋ ndʋ papaɣzɩ tʋmɩyɛ labʋ kpɩtaʋ hɛkʋ taa kediɣzaɣ taa yɔ, koobiya sɩɣaɣnɩ-wɛ nɛ pɔɖɔkʋʋ pa-tʋma pa-ñʋʋ taa.
Mai 2019 taa papaɣzɩ kediɣzisi labʋ pɛ-tɛ tɛtʋ cikpetu taa. Kpaɣnɩ alɩwaatʋ ndʋ abalʋ nɔɔyʋ nɛ ɛ-halʋ pakʋyɩ pɛ-tɛ nɛ powolo pacaɣ tɛtʋ cikpetu ndʋ tɩ-taa; paakɛ paa ɖooye nʋmɔʋ lɩzɩyaa. Paa pa-maɣmaɣ pataatɩlɩ yʋlʋmaa kʋnʋŋ kalʋʋ nɛ kɩ-maʋ yɔ, paɖʋ pa-tɩ kaɖʋwa se pasɩɣnɩ yʋlʋmaa mba nɛ pɛkpɛlɩkɩ yʋlʋmaa kʋnʋŋ. Powobi takayɩsɩ ɖɩzɩyɛ naɖɩyɛ taa nɛ pɛkpɛlɩkɩ yʋlʋmaa kʋnʋŋ nɛ nʋmɔŋ weyi ɩ-yɔɔ patɩŋna nɛ pawɩlɩ-kʋ lalaa yɔ.
Marcelo wɛɛ nɛ ecosuu tɔm ɛgbɛyɛ taa kediɣzaɣ nakɛyɛ taa
Pɩlabɩ fenasɩ pazɩ lɛ, yʋlʋmaa mba pa-naadozo papaɣzɩ kalʋʋ yʋlʋmaa kʋnʋŋ kɛlɛʋ yem, nɛ pɩɩha-wɛ waɖɛ nɛ pɛɖɛɛnɩ ɛsɩndaa fezuu taa nɛ pɩkɩlɩ. Lɛɛlɛɛyɔ Yomara, Marcelo, nɛ Hiver papɩsɩ paa ɖooye nʋmɔʋ lɩzɩyaa. Marcelo kɛ ɛgbɛyɛ taa tʋmlaɖʋ. Kpɩtaʋ kpeekpe taa lɛ, pɛ-ɛsɩyɛ sɛɣnɩ fezuu taa tʋma labʋ siŋŋ. Ɛzɩma pɛwɛ kpekpeka Yehowa sɛtʋ taa yɔ, piyeba nɛ mba pɔcɔ-wɛ nɛ pata yɔ pɛwɛɛ kpekpeka ɖɔɖɔ Yehowa sɛtʋ taa.
Yʋlʋmaa mba pa-naadozo pɛwɛnɩ ɛsɩmɩyɛ siŋŋ ɛzɩma ɛgbɛyɛ taa koobiya sɩɣnɩ-wɛ nɛ sɔɔlɩm yɔ pɩ-yɔɔ. Yomara yɔɔdaa se: «Kpaɣnɩ kɩyakʋ ŋgʋ ɖɩcalɩ katʋʋ Yehowa Aseɣɖe Tɩnaa yɔ, pawɩlɩ-ɖʋ sɔɔlɩm mbʋ pɩwɛ toovenim Krɩstʋ ñɩma hɛkʋ taa yɔ.» Marcelo ñɔyɔɔdaa se: «Ðɩwɛnɩ taabalaa kɩbama siŋŋ ɖɛ-ɛgbɛyɛ taa, nɛ ɖɩwɛ ɛjaɖɛ kpeekpe yɔɔ hɔʋ ŋgʋ sɔɔlɩm yeba nɛ kɩwɛɛ nɔɔ kʋɖʋmaɣ taa yɔ kɩ-taa. Yomara nɛ e-newaa paɖaŋ kpam se pana ɛzɩma Yehowa kaɣ ñɔɔzʋʋ tɛtʋ nɛ tɩpɩsɩ Paradisuu yɔ.—Keɣa 36:10, 11; Iza. 35:5.
Kalɩ ɖɔɖɔ....
ƐZƖMA PALAKƖNƖ ÑA-HAÐƐ TƲMƖYƐ YƆ
Masɩ cikpesi nzɩ sɩlɛɣzɩ ɛyaa wezuu caɣʋ yɔ
Pɩtasɩna se ɖɩlɩzɩɣ takayɩsɩ yʋlʋmaa kʋnʋŋ taa lɛ, ɖɩwɩlɩɣ ɛyaa ɖɔɖɔ yʋlʋmaa kʋnʋŋ kalʋʋ.
