Ndʋ ɖɩmaɣzɩɣ yɔ titukuuni Ɛsɔ. (Yereemii 17:10) Pɩtasɩnɩ se pɩpɔzʋʋ se ɖikizi paɖɩyɛ tɔm yɔɔdʋʋ nɛ paɖɩyɛ lakasɩ lɛ, pɩwɛɛ se ɖɩla nabʋyʋ ɖɔɖɔ. Paɖɩyɛ lɩmaɣza paɣzɩɣnɩ maɣzɩm taa nɛ laŋɩyɛ taa na. Pʋyɔɔ lɛ, pɩcɛyaa se kpɛdɛyɛ taa lɛ ɖiyele maɣzʋʋ mbʋ piseɣtiɣ-ɖʋ se ɖɩwɛɛnɩ paɖɩyɛ lakasɩ yɔ pɩ-yɔɔ. Pi-ɖeke pɩ-labʋ kaɣnɩ yebu se ɖɩpɩsɩ ɖa-maɣ zɩm kɩfam nɛ pɩsa nɛ ɖɩwa paɖɩyɛ.

Tazɩ camɩyɛ nɛ ŋna lɩmaɣza wena ŋwɛnɩ lalaa yɔɔ yɔ kɔzɩ kɔzɩ mba ña nɛ wɛ ɩtɩkaa tomnaɣ tɔlɩm yaa mba pɛ-ɛjaɖɛ wɛ ndɩ nɛ ña-ñɩnɖɛ yɔ. Pɔzɩ ñatɩ se: ‘Lɩmaɣza wena mɛwɛnɩ pɔ-yɔɔ? Ndʋ ma-maɣmaɣ mansɩm pɔ-yɔɔ yɔ ndʋ yebina nɛ mɛwɛɛnɩ lɩmaɣza ana? Yaa tɛɛ yɔɔ tɛɛ yɔɔ wɛtʋ yebina nɛ mɛwɛɛnɩ lɩmaɣza ana?’ Taawolo intɛrnɛɛtɩ lona, taacɔnɩ filimwaa yaa taala aleɣya wena a-taa pawɩlɩɣ paɖɩyɛ nɛ puuyaɣ lakasɩ yɔ.

Pɩfɛyɩ kɛlɛʋ paa ɛzɩmtaa se ɖɩtazɩ nɛ ɖɩna se lɩmaɣza wena ɖa-maɣmaɣ ɖɩwɛna yɔ atʋʋzaa yaa atɩtʋʋzɩ. Ɛlɛ Ɛsɔtɔm pɩzɩɣ tɩsɩnɩ-ɖʋ nɛ ɖɩtɩlɩ “lɩmaɣza nɛ ɖʋtʋ ndʋ tɩwɛ laŋɩyɛ taa yɔ.” (Ebree mba 4:12) Ye mbʋ wolo pɩ-yɔɔ nɛ ŋkpɛlɩkɩɣ Bibl. Kpaɣ kɩ-wɩlɩtʋ nɛ ŋmaɣzɩnɩ ña-maɣzɩm, nɛ ñaɣ pana siŋŋ nɛ ña-maɣzɩm la nɔɔ kʋɖʋmaɣ nɛ ndʋ Bibl wɩlɩɣ yɔ. Ɛsɔtɔm pɩzɩɣ tɩsɩnɩ-ɖʋ nɛ ɖɩkpɛzɩ paɖɩyɛ lɩmaɣza ɖa-ñʋʋ taa nɛ ɖɩlɔ paa akam ɖa-maɣzɩm nɛ ɖa-laŋɩyɛ taa ɛzɩma yɔ.—2 Kɔrɛntɩ mba 10:4, 5.