Bibl tɩkɛ kʋdɔmɩŋ waʋ takayaɣ, ɛlɛ kɩtasɩɣ lɔŋ kɩbaŋ weyi ɩwɛ wazaɣ yɔ. Kɩ-lɔŋ tasʋʋ sɩɣnɩ ɛyaa mba pɛwɛnɩ lɩmaɣza taa kʋdɔŋ yɔ. Kɩɖaŋ nɩɩyɩ yɔ.

«Ɛyaa mba pɛwɛnɩ pa-alaafɩya yɔ, pɩtɩkɛ mba pɩpɔzʋʋ ɖɔkɔtɔ, ɛlɛ kʋdɔndɩnaa pɩpɔzʋʋ ɖɔkɔtɔ.»—MAATIYEE 9:12.

Bibl yɔɔdʋʋ se nabʋyʋ taa pɩpɔzʋʋ se ɖiwolo fɛɖaa tɛ. Ɛyaa mba pɛwɛnɩ lɩmaɣza taa kʋdɔŋ yɔ, pa-taa sakɩyɛ wobi fɛɖaa tɛ lɛ, pasɩnɩ-wɛ nɛ patɩlɩ tɔm sakɩyɛ mbʋ pɩcɛyɩɣ-wɛ yɔ pɩ-yɔɔ nɛ pɩsɩnɩ-wɛ.

«Tomnaɣ falɩsʋʋ wɛnɩ wazaɣ.» —1 TIMOOTEE 4:8.

Ye ɖɩkpakɩɣ alɩwaatʋ nɛ ɖɩlakɩ mbʋ pɩsɩɣnɩ-ɖʋ se ɖɩwɛɛnɩ tɔnʋʋ taa alaafɩya yɔ, piyeki nɛ ɖɩwɛɛnɩ maɣzɩm taa alaafɩya. Mbʋ ɖɩpɩzɩɣ nɛ ɖɩla yɔ, pɩ-taa nabʋyʋ lɛ se ɖɩlakɩ hola aleɣya ɖoŋ ɖoŋ, ɖɩtɔkɩ tɔɔnasɩ nzɩ sɩhaɣ-ɖʋ tɔnʋʋ taa alaafɩya yɔ nɛ ɖiɖoo camɩyɛ.

«Laŋɩyɛ nɖɩ ɖɩ-taa nɛ leleŋ yɔ, ɖɩlakɩ nɛ weyi ɛsɔsaa yɔ ɛnɛɣdɩɣ.»—ADUWA 17:22.

Alɩwaatʋ ndʋ ɖɩkalɩɣ Bibl masɩ nzɩ sɩkpazɩɣ ɖoŋ nɛ ɖɩɖʋʋ ɖa-tɩ kaɖʋsɩ nzɩ sɩwɛ kɛlɛʋ nɛ ɖɩpɩzɩɣ nɛ ɖɩtalɩ-sɩ yɔ, pɩsɩɣnɩ-ɖʋ nɛ ɖihiɣ taa leleŋ. Ye ɖɩkaŋ  ɖa-lɩmaɣza mbʋ pɩwɛ ɖeu yɔ pɩ-yɔɔ nɛ ɖɩtaɣ liu se pɩkaɣ-ɖʋ ɖenuu cee wayɩ yɔ, pɩpɩzɩɣ pɩsɩnɩ-ɖʋ nɛ ɖɩlʋbɩnɩ kala wena lɩmaɣza taa kʋdɔŋ kɔŋna yɔ.

«Lɔŋ wɛ ajamaa cɔlɔ.»—ADUWA 11:2.

Pɩtɩla yɔ, ŋkaɣ ɖiɣzinuu se ñe-ɖeke ŋŋpɩzɩɣ nɛ ŋla mbʋ payɩ ŋsɔɔlaa se ŋlakɩ yɔ. Ye mbʋ, tisi faaa nɛ lalaa sɩnɩ-ŋ. Pɩtɩla yɔ, ña-taabalaa nɛ ñɔ-hɔʋ taa mba sɔɔlaa se pasɩnɩ-ŋ ɛlɛ paasɩŋ ɛzɩma pala yɔ. Yele nɛ patɩlɩ mbʋ ɖeyi ɖeyi papɩzɩɣ pala nɛ pasɩnɩ-ŋ yɔ. Taakɩlɩ ɖɛlɛsʋʋ niye mbʋ ŋñɩnɩɣ se palabɩ-ŋ yɔ pɩ-hɔɔlʋʋ taa, nɛ wɛɛnɩ ɛsɩmɩyɛ paa ɛzɩmtaa mbʋ palakɩ nɛ pasɩɣnɩ-ŋ yɔ pɩ-yɔɔ.

«Pɩlakaɣ-m ɛzɩ nabʋyʋ ɛɛɖɔŋ camɩyɛ yɔ, pʋyɔɔ mowobi fɛɖʋ nɔɔyʋ cɔlɔ se ɛsɩnɩ-m. Ɛsɩnɩ-m nɛ mantɩlɩ mbʋ pɩwɛɛ nɛ pɩcɛyɩɣ-m yɔ. Pɩsɩnɩ-m nɛ mantɩlɩ wɛtʋ ndʋ tɩ-taa ɖeyi ɖeyi mɛwɛɛ yɔ; nɛ ɛwɩlɩ-m kɔɔ ndɩ ndɩ wena apɩzɩɣ asɩnɩ-m nɛ malʋbɩnɩ kʋdɔŋ ŋgʋ yɔ.»—Nicole a weyi ɛwɛnɩ lɩmaɣza taa kʋdɔŋ ŋgʋ kiyeki nɛ ɛwɛɣ taa leleŋ yaa laŋwɛɛkɩyɛ taa kadadayaɣ yɔ.

«Mɔnkɔm nɛ menɖiɣzina se alɩwaatʋ ndʋ ma nɛ ma-halʋ ɖɩkalɩɣ Bibl ɖoŋ ɖoŋ yɔ, pɩsɩɣnɩ-m nɛ mɛwɛɣnɩ lɩmaɣza kɩbana wena akpazɩɣ-m ɖoŋ evemiye taa yɔ. Nɛ ɖoŋ ɖoŋ lɛ alɩwaatʋ ndʋ pitiki mon-toma taa avema naayɛ yɔ, Bibl mayaɣ nakɛyɛ kpazɩɣ-m ɖoŋ.»—Peter, weyi ɛlʋkɩnɩ lɩmaɣza taa kʋdɔŋ yɔ.

«Pɩɩwɛ-m kaɖɛ se meheyi ɛyaa lalaa kaɖɛ nɖɩ mɛwɛɛ nɛ malʋkɩna yɔ ɖɩ-tɔm mbʋ pʋyɔɔ yɔ fɛyɛ kpaɣ-m siŋŋ. Man-taabalʋ nɔɔyʋ kaawelisini-m camɩyɛ nɛ ɛñaɣ pana nɛ ɛnɩɩ ɛzɩma pɩlakaɣ-m yɔ pɩ-taa. Ɛsɩnɩ-m kpem nɛ pɩlabɩ-m sooci nɛ manɩɩ pɩ-taa se mɛnfɛyɩ men-ɖeke.»—Ji-yoo weyi ɛlʋkɩnɩ kʋdɔŋ ŋgʋ kiyeki nɛ ɛɛtɔkɩ camɩyɛ yɔ.

«Bibl sɩnɩ-m nɛ mɛwɛɛnɩ lɩmaɣza kɩbana alɩwaatʋ ndʋ pɩwɛɛ se mala tʋmɩyɛ nɛ alɩwaatʋ ndʋ pɩwɛɛ se mɛhɛzɩ yɔ tɩ-yɔɔ. Kɩ-taa lɔŋsɩnɖɛ sɩnɩ-m nɛ malʋbɩnɩ lɩmaɣza taa kʋdɔŋ ŋgʋ kɩcɛyɩɣ-m yɔ.»—Timothy weyi ɛwɛnɩ lɩmaɣza taa kʋdɔŋ ŋgʋ kiyeki nɛ ɛmʋʋ pana lɛɛ lɛɛ yɔ.