Paa mbʋ yɔ, ɛyaa sakɩyɛ maɣzɩɣ se pɩɩkaɣ-wɛ ɖenuu cee wayɩ ɛzɩ pɔsɔɔlʋʋ yɔ, mbʋ pʋyɔɔ yɔ pɛwɛɛ nɛ panaɣ wɛtʋ kɩdɛkɛdɩtʋ ndɩ ndɩ ndʋ patɩɖʋna yɔ. Tɩ-taa natʋyʋ lɛ COVID-19 kʋdɔŋ ŋgʋ kɩlɩ yem tuda nɛ kɩkɔnɩ kaɖɛ ɛyaa wezuu caɣʋ yɔɔ, kiyele nɛ papɩsɩ kʋñɔndɩnaa nɛ halɩ kɩkʋ ɛyaa sakɩyɛ yɔ. Piyeba nɛ pamaɣzɩɣ se pɩɩkaɣ-wɛ ɖenuu cee wayɩ paa ññɩɩ.

Ɛyaa ɛsɩyɛ sɛnɩ ñɩnʋʋ mbʋ pɩsɩnɩ-wɛ nɛ piɖeni-wɛ cee wayɩ camɩyɛ yɔ, mbʋ pʋyɔɔ yɔ, paasɩŋ mbʋ ɖeyi ɖeyi pɩkaɣ labʋ nɛ ɛsɩndaa yɔ. Ɛyaa nabɛyɛ taɣ liu ɖoŋ weyi paanaɣ-ɩ yɔ ɛzɩ ñʋʋ leleŋ yaa mbʋ pamaɣzɩɣ se pɩlɩɣnɩ pa-lɩm taa yɔ. Ɛyaa sakɩyɛ ɛsɩyɛ sɛnɩ sukuli labʋ nɛ ñɩm ñɩnʋʋ mbʋ pʋyɔɔ yɔ, pamaɣzɩɣ se ye pañɩtaa nɛ pala mbʋ yɔ, pehikiɣ mbʋ pañɩnɩɣ yɔ. Lalaa lɛ, pamaɣzɩɣ se ɛyʋ ɛkɛ kɩbanʋ yɔ, piyeki nɛ piɖeni-i e-wezuu caɣʋ taa.

Mbʋ pɩ-tɔm ɖɩyɔɔdaa yɔ, pɩ-taa nabʋyʋ kaɣ yebu nɛ piɖeni-ŋ cee wayɩ ɛzɩ ŋsɔɔlʋʋ yɔ? Pɩsa nɛ ŋhiɣ tɔm cosuu lɛ, maɣzɩ tɔm tʋnɛ tɩ-yɔɔ:

• Ɛbɛ ɖeyi ɖeyi yeki se ŋna mbʋ pɩkaɣ-ŋ tɛmnʋʋ cee wayɩ yɔ?

• Sukuli nɛ liidiye pɩzɩɣ piyele nɛ piɖeni-ŋ ñe-wezuu caɣʋ taa?

• Ye ŋkɛ ɛyʋ kɩbanʋ piyeki se piɖeni-ŋ cee wayɩ?

• Le ŋpɩzɩɣ nɛ ŋhiɣ mbʋ pɩpɩzɩɣ pɩsɩnɩ-ŋ nɛ piɖeni-ŋ cee wayɩ yɔ?

Feŋuu Tilimiye takayaɣ kanɛ kakaɣ-ŋ sɩnʋʋ nɛ ŋcosi tɔm ndʋ tɩ-yɔɔ.