Sakɩyɛ wɛɛ nɛ panɩɣzɩɣ ɛzɩma ɛyaa mba pɛwɛ tɛtʋ yɔɔ yɔ, pɛwɛɛ nɛ pɛwɛɛkɩɣ-tʋ, nɛ pɛwɛɛkɩɣ ɖɔɖɔ wondu ndʋ tɩwɛ tɩ-yɔɔ yɔ pɩ-yɔɔ. Lɔŋsɩnɖaa nabɛyɛ yɔɔdaa se ɛyaa lakasɩ wɛɛ nɛ sɩwɛɛkɩɣ wondu sakɩyɛ tɛtʋ yɔɔ nɛ pɩkpaɖɩ alɩwaatʋ ndʋ tɩɖɛwa yɔ tɩ-taa nɛ halɩ piyeba nɛ lɛɛtʋ wɛɛ nɛ tɩmʋkɩ.

 Ɛzɩ ɛyaa kaɣ wɛɛkʋʋ tɛtʋ caɣ caɣ? Yaa pɛlɛɣzɩɣ nɛ pacaɣ wezuu ŋgʋ kɩmʋnaa yɔ nɛ pɩtaatasɩ wɛɛkʋʋ kedeŋa na?

 Lɔŋsɩnɖaa sakɩyɛ maɣzɩɣ se ɛyaa pɩzɩɣ nɛ pakandɩyɩ tɛtʋ yɔɔ nɛ pacaɣ wezuu ŋgʋ kɩɩwɛɛkɩɣ kedeŋa yɔ. Lalaa ñɔyɔɔdʋʋ se, pɩsa nɛ patalɩ kaɖʋwa ŋga lɛ, pɩpɔzʋʋ se pala lɛɣzɩtʋ kedeŋa hɔɔlɩŋ nɩɩyɩ taa alɩwaatʋ kʋɖʋmtʋ yɔɔ. Lɛɣzɩtʋ ndʋ tɩ-taa natʋyʋ yɔ:

•   Pɩwɛɛ se paɖaɣnɩ cɔnʋʋ tɛtʋ, laŋ, lona wena a-taa niɣdaa yɔ, nɛ teŋgunaa yɔɔ camɩyɛ nɛ pɩkpaɖɩ.

•   Palabɩnɩ tʋmɩyɛ haɖaʋ lɛɣtʋ ndɩ ndɩ nɛ kedeŋa ɖoŋ ndɩ ndɩ weyi ɩwazɩɣ yɔ.

•   Ɛyaa ɩlɛɣzɩ nɛ pɔtɔkɩ tɔɔnasɩ nzɩ sɩ-taa nɛ ɖozi hatʋ nɛ tɩŋ pee yɔ. Pɔtɔkɩ nandʋ nɛ kpakpasɩ nɛ pɩmakɩna. Piyeki nɛ papasɩ mbʋ ɛyaa tɔkɩ paa evemiye nɖɩ yɔ pɩ-yɔɔ nɛ paawɛɛkɩɣ tɔɔnasɩ.

•   Ɛyaa ɩnɩɩ pɩ-taa se pɩtɩpɔzɩ-wɛ tomnaɣ yɔɔ wondu sakɩyɛ pʋcɔ nɛ pacaɣ wezuu kɩbaŋʋ.

 Suwe ŋmaɣzɩɣ? Ɛzɩ pɩmʋnaa se ɛyʋ ɛtaa liu kominawaa, tadɩyɛ agbaa, nɛ ɖa-taa paa anɩ se ɛpɩzɩɣ nɛ ɛɖʋ nesi nɛ pɔɖɔ tɔm tʋnɛ tɩ-yɔɔ? Yaa ŋmaɣzɩɣ se pɩɩpɩzɩɣ nɛ pɩla mbʋ mbʋ pʋyɔɔ yɔ ɛyaa mba pɛkɛ hiluu tɩnaa, piɖeni men-ɖeke tɩnaa nɛ mba paamaɣzɩɣ cee wayɩ yɔɔ yɔ pɛkpɛndɩ pɛwɛɛ?—2 Timootee 3:1-5.

 Bibl heyi-ɖʋ se paakaɣ wɛɛkʋʋ tɛtʋ caɣ caɣ. Kɩlɩzɩ-ɖʋ pɩ-taa mbʋ pʋyɔɔ pana wena ɛyaa wɛɛ nɛ pañakɩ yɔ aapɩzɩɣ nɛ aya tɛtʋ ñʋʋ yɔ nɛ kiheyi-ɖʋ ɖɔɖɔ mbʋ pɩpɩzɩɣ nɛ pɩlɛɣzɩ wɛtʋ ndʋ tɩ-taa tɛtʋ wɛɛ yɔ pɩ-tɔm. Kiheyi-ɖʋ ɖɔɖɔ ɛzɩma pɩkaɣ labʋ nɛ lɛɣzɩtʋ ndʋ tɩkɔɔ yɔ.

 Ɛbɛ yɔɔ pana wena ɛyaa wɛɛ nɛ pañakɩ yɔ aapɩzɩɣ nɛ aya tɛtʋ ñʋʋ? Ɛsɔ Yehowa a lɩzɩnɩ tɛtʋ nɛ ɛɖʋ ɛyaa tʋmɩyɛ se pɔcɔnɩ tɩ-yɔɔ. (Kiɖe Tɛɛ Tɔm 1:28; 2:15) Ye paaɖɔm paɣtʋ ndʋ pa-Lɩzɩyʋ ɖʋ-wɛ yɔ tɩ-yɔɔ nɛ peyele nɛ eɖiyi-wɛ yɔ paapɩzaa nɛ pala pa-tʋmɩyɛ nɖɩ camɩyɛ. (Aduwa 20:24) Ɛlɛ pekizi Yehowa nɛ pala mbʋ pa-maɣmaɣ pɔsɔɔlaa yɔ. (Eklesɩyastɩ 7:29) Ɛyaa ɩɩpɩzɩɣ nɛ pa-maɣmaɣ pɔcɔnɩ tɛtʋ yɔɔ, nɛ paa pañakɩ pana yɔ, mbʋ pɛlɛɣzɩɣ yɔ pɩɩɖɔʋ.—Aduwa 21:30; Yereemii 10:23.

 Lɛɣzɩtʋ ndʋ pɩpɔzʋʋ yɔ. Ɛsɔ ɖʋwa se eeyeki nɛ ɛyaa tɛzɩ tɛtʋ wɛɛkʋʋ caɣ caɣ. (Natʋ 11:18) Ɛɛkɔŋ se ɛsɩnɩ kominawaa nɛ agbaa wena awɛɛ nɛ awɛɛkɩɣ tɛtʋ yɔ. Ɛlɛ ɛkɔŋ se ɛlɛɣzɩ po-lone taa. (Natʋ 21:1) Lɩmaɣzɩyɛ nɖɩ ɖɩ-yɔɔ Yehowa yɔɔdaa se: “Na! Menɖiɣni labʋ wondu tɩŋa se tɩkɛ kɩfatʋ.”—Natʋ 21:5.

 Ɛzɩma lɛɣzɩtʋ ndʋ tɩkaɣ labʋ? Yehowa lɛɣzɩɣ ɛyaa kominawaa lone taa ɛsɔdaa komina ŋgʋ payaɣ se Ɛsɔ Kewiyaɣ yɔ. Komina ŋgʋ, ŋgʋ kaɣnɩ ɖiyuu tɛtʋ nɛ kɩ-ñʋʋdʋ lɛ Yesu Krɩstʋ.—Danɩyɛɛlɩ 2:44; Maatiyee 6:10.

 Ɛsɔ Kewiyaɣ kaɣ ɛyaa falɩsʋʋ nɛ pacaɣ wezuu ɛzɩ Ɛsɔ paɣtʋ pɔzʋʋ yɔ. Alɩwaatʋ ndʋ ɛyaa luzuu pa-tɩ pa-Lɩzɩyʋ tɛɛ nɛ pɔɖɔ ɛ-paɣtʋ yɔɔ lɛ, pakaɣ pɩzʋʋ nɛ pacaɣ wezuu ŋgʋ kɩɩwɛɛkɩɣ tɛtʋ yɔ. (Izaayii 11:9) Bibl lɩzɩ-ɖʋ pɩ-taa ɛzɩma Ɛsɔ komina kaɣ yebu nɛ ɛyaa caɣ wezuu kɩbaŋʋ ŋgʋ kɩɩwɛɛkɩɣ tɛtʋ yɔ. Mbʋ kɩkaɣ labʋ yɔ mbʋ yɔ:

•   Kɩhaɣ ɛyaa tɩŋa tɔɔnaɣ.—Keɣa 71:16.

•   Kɔñɔɔzʋʋ kedeŋa yɔɔ ñɩm mbʋ pɩɩwɛɛkaa yɔ.—Izaayii 35:1, 2, 6, 7.

•   Kiyeki nɛ laŋhɛzɩyɛ wɛɛ ɛyaa nɛ kpɩna pɛ-hɛkʋ taa.—Izaayii 11:6-8; Ozee 2:18.

•   Kiyeki nɛ asɛyɩŋ sɩɩ tɩnaɣ.—Maarkɩ 4:37-41.

 Ŋpɩzɩɣ nɛ ŋwɛɛnɩ lidaʋ se Ɛsɔ komina kaɣ kɔnʋʋ lɛɣzɩtʋ tʋnɛ tɩ-tɩŋa. Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ tɔm ñʋʋ “Ðooye Ɛsɔ Kewiyaɣ kaɣ paɣzʋʋ ɖiyuu tɛtʋ?”