Nɔɔɖɛyaa Ɛgbɛyɛ kɛnɩ Krɩstʋ mba cabɩ waa mba papɩ fezuu taa nɛ pawɩlɩɣ nʋmɔʋ ɛjaɖɛ kpeekpe yɔɔ Yehowa Aseɣɖe Tɩnaa yɔ. Pa-tʋmɩyɛ tayɩ hɔɔlɩŋ naalɛ taa:

•   Patɩŋɩɣnɩ Bibl kpɛlɩkʋʋ takayɩsɩ, kediɣzisi, nɛ sukulinaa yɔɔ nɛ pɔcɔŋnɩ Bibl wɩlʋʋ tʋmɩyɛ yɔɔ.​—Luka 12:42.

•   Mba ɖɛɣnɩ nɔɔ ɛjaɖɛ kpeekpe yɔɔ Yehowa Aseɣɖe Tɩnaa Ɛsɔ sɛtʋ tʋmɩyɛ nɛ pawɩlɩɣ-ɖʋ ɛzɩma ɖɩla samaɣ taa tɔm susuu yɔ, nɛ pɔcɔŋnɩ haɖɛ nɖɩ palakɩ yɔ ɖɩ-yɔɔ.

 Nɔɔɖɛyaa Ɛgbɛyɛ tɩŋɩɣ kɩɖaʋ ŋgʋ kajalaɣ pɩnzɩ mɩnʋʋ taa “apostoloowaa nɛ sɔsaa” paahawa yɔ. Mba kpakaɣnɩ lɩmaɣza se pɩwazɩ Krɩstʋ ɛgbɛyɛ kpeekpe. (Tʋma Labʋ 15:2) Ɛzɩ apostoloowaa nɛ sɔsaa paalabʋ yɔ, sɔnɔ Nɔɔɖɛyaa Ɛgbɛyɛ taa koobiya tɩkɛnɩ ɛgbɛyɛ ñʋndɩnaa. Bibl yɔɔ patɩŋɩɣna nɛ pakpakɩɣ lɩmaɣza, nɛ pana mbʋ se Yehowa Ɛsɔ lɩzɩ Yesu Krɩstʋ se ɛkɛ ɛgbɛyɛ ñʋʋdʋ.​—1 Kɔrɛntɩ 11:3; Efɛɛzɩ 5:​23.

 Janvier 2018 taa lɛ, mba pɛwɛ Nɔɔɖɛyaa Ɛgbɛyɛ taa yɔ mba yɔ: Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, nɛ David Splane. Palakɩ tʋmɩyɛ ɖa-tʋmɩyɛ ɖɩlaɖɛ sɔsɔɖɛ taa Warwick, Niyuu Yɔrɩkɩ, Etaazuunii ɛjaɖɛ taa.

 Nɔɔɖɛyaa Ɛgbɛyɛ lɩzɩ kɔɔmiitewaa loɖo nɛ ɖɩtɩŋɩɣnɩ pɔ-yɔɔ nɛ ɖɩcɔŋnɩ ɖɛ-Ɛsɔ sɛtʋ tʋma ndɩ ndɩ yɔɔ. Nɛ paa Nɔɔɖɛyaa Ɛgbɛyɛ taa koobu weyi lɛ, ɛlakɩ tʋmɩyɛ kɔɔmiitewaa mba pa-taa nakʋyʋ yaa pa-taa nabɛyɛ taa.

•   Ðʋtʋ yɔɔ cɔnɩyaa kɔɔmiite: Koobiya mba palakɩ tʋmɩyɛ kɔɔmiite kʋnɛ kɩ-taa yɔ, mba sɩɣnɩnɩ koobiya alɩwaatʋ ndʋ pɩpɔzʋʋ se palɩɩ tɔm hʋyaa ɛsɩndaa yɔ, nɛ ye asɛyʋʋ nakʋyʋ ɛlaba yaa kaɖɛ naɖɩyɛ ɛtalɩ ɖo-koobiya ɛjaɖɛ hɔɔlʋʋ nakʋyʋ taa kpɛdɛyɛ yɔ, mba cɔŋnɩnɩ pi-ɖeɖe.

•   Tʋmlaɖaa kɔɔmiite: Kɔɔmiite kʋnɛ kɩ-tʋmɩyɛ lɛ se kɩcɔnɩ Betɛɛlɩ hɔʋ taa mba yɔɔ.

•   Takayɩsɩ lɩzʋʋ kɔɔmiite: Mba palakɩ tʋmɩyɛ kɔɔmiite kʋnɛ kɩ-taa yɔ, mba cɔŋnɩnɩ tɔm susuu wondu labʋ nɛ ti-tiyinuu tʋma yɔɔ ɛjaɖɛ kpeekpe yɔɔ. Mba cɔŋnɩnɩ Kewiyaɣ Kpaamɩŋ nɛ ɛgbɛyɛ ɖamɩŋ lɛɛŋ maʋ tʋma yɔɔ ɛjaɖɛ kpeekpe yɔɔ.

•   Ɛsɔ sɛtʋ tʋmɩyɛ kɔɔmiite: Kɔɔmiite kʋnɛ kɩ-taa koobiya cɔŋnɩnɩ “Kewiyaɣ tɔm kɩbandʋ” susuu tʋma kpeekpe yɔɔ.​—Maatiyee 24:14.

•   Tɔm wɩlʋʋ kɔɔmiite: Kɔɔmiite kʋnɛ kɩñɔɔzʋʋnɩ tɔm ndʋ pawɩlɩɣ kediɣzisi nɛ sukulinaa taa yɔ. Pɩtasɩ lɛ, kɩcɔŋnɩ ɖɔɖɔ videowaa nɛ tatasɩ labʋ tʋma yɔɔ.

•   Tɔm maʋ kɔɔmiite: Koobiya mba palakɩ tʋmɩyɛ kɔɔmiite kʋnɛ kɩ-taa yɔ, mba cɔŋnɩnɩ fezuu taa tɔɔnaɣ ŋga pamaɣ takayɩsɩ taa yaa ŋga paɖʋʋ ɖɛ-tɛ intɛrnɛɛtɩ lone yɔɔ yɔ ka-labʋ tʋma yɔɔ; mba cɔŋnɩnɩ ɖɔɖɔ ɛjaɖɛ kpeekpe yɔɔ tɔm ɖɛzɩyaa tʋmɩyɛ yɔɔ.

 Pɩtasɩnɩ kɔɔmiitewaa mba pɔ-yɔɔ Nɔɔɖɛyaa Ɛgbɛyɛ tɩŋɩɣna nɛ ɖɩlakɩ tʋmɩyɛ yɔ lɛ, pekpeɣliɣ nɛ palakɩ kediɣzaɣ paa kpɩtaʋ ŋgʋ nɛ patazɩɣ mbʋ pɩkɛ ɛgbɛyɛ kɩcɛyɩm yɔ pɩ-taa. Kediɣzisi nzɩ sɩ-taa lɛ, Nɔɔɖɛyaa Ɛgbɛyɛ tazɩɣ ndʋ Masɩ Kiɖeɖesi wɩlɩɣ yɔ tɩ-taa, nɛ peyeki pa-tɩ se Ɛsɔ fezuu kiɖeɖeu eɖiyi-wɛ, nɛ pañakɩ pana se pala nɔɔ kʋɖʋmaɣ lɩmaɣza wena pakpakɩɣ yɔ a-taa.​—Tʋma Labʋ 15:25.

 Pɛkɛ koobiya Krɩstʋ ñɩma mba papɩzɩɣ pataa-wɛ liu yɔ; paɖʋʋ nesi Nɔɔɖɛyaa Ɛgbɛyɛ kɔɔmiitewaa. (1 Kɔrɛntɩ 4:2) Pɛkɛ mba pɛwɛ niye nɛ lɛɣtʋ tʋma wena palakɩ yɔ a-taa yɔ. Nɛ powoki ɖɔɖɔ kediɣzisi nzɩ palakɩ kɔɔmiitewaa mba pa-taa paa kpɩtaʋ ŋgʋ yɔ. Paa pɩtɩkɛ sɩnɩyaa kpakɩɣnɩ lɩmaɣza yɔ, patasɩɣ Nɔɔɖɛyaa Ɛgbɛyɛ taa mba lɔŋ kɩbaŋ nɛ pasɩɣnɩ-wɛ se papɩzɩ patɩlɩ tɔm ndʋ tɩpɩzɩɣ tɩsɩnɩ-wɛ pakpaɣ lɩmaɣza kɩbana yɔ. Palakɩnɩ tʋmɩyɛ lɩmaɣza wena pakpakɩɣ kɔɔmiitewaa taa yɔ nɛ pɔcɔŋna nɛ panaɣ ɛzɩma tʋmɩyɛ ɖɔŋ yɔ. Nɔɔɖɛyaa Ɛgbɛyɛ pɩzɩɣ nɛ paɖʋ-wɛ tʋmɩyɛ se pekilimi koobiya yɔɔ ɛjaɖɛ hɔɔlɩŋ ndɩ ndɩ taa yaa se pɔyɔɔdɩ samaɣ taa tɔm natʋyʋ pɩnaɣ taa kediɣzaɣ taa yaa alɩwaatʋ ndʋ paacɛlɩɣ Gileyaadɩ sukuli piya sɩ-takayɩsɩ yɔ.