Mbumbi wedu u na buchenjedu gu no pinda gwedu. Se Tate ba na ludo, u no ti thokomela. Kakale ha ba zobe ba ti bumbila ku zwichilila kuzhe kwabo. (Jeremiya 10:23) Koga se ngwana u ntikinini e sheta butungamili gwe bazwadzi, tose to sheta butungamili gwe Ndzimu. (Izaya 48:17, 18) Milayontewo ye Baibili i no pa butungamili i li chipo chino dwa ku Ndzimu.​—Bala 2 Timoti 3:16.

Milayo ne milayontewo ya Jehova, i no ti diya zila dzi pezhugwi dze buchilo ngwenu, ne se kwa ti nga wana buchilo gu singa pele mu chibaka chi no zha. Ngobe Ndzimu a ka ti bumba, ko fanila kuti ti amuchile ne ku bokela butungamili gugwe.​—Bala Pisalema 19:7, 11; Zumbunulo 4:11.

Milayontewo ye Baibili ndiyo ntewo we malebeswa. Milayo iyo i nga thamigwa zwimo zwingwe zwa ka tini. (Ditironomi 22:8) Ta ka fanila shingisa bukhoni gwedu gwe ku kumbula ku hwisisa kuti nlayontewo u nga shingisiwa chini mu chimo cha ka tini. (Zwiani 2:10-12) Ku lakidzila, Baibili i no diya kuti buchilo i chipo chi no dwa ku Ndzimu. Ntewo iwoyo ndiwo nlayontewo u nga ti tungamila ha ti li ku mishingo, ku mizi yedu ne tili mu gwendo. Go ti diya kuti ti ele njele se kwa ti nga zwibakilila.​—Bala Mishingo 17:28.

Jesu wa ka leba ne kwe milayontewo mibili ya ka fanila tolegwa pezhugwi. We kutanga u no chenesa kuti nthu u no chililani—ku ziba Ndzimu, ku nda, ne ku nshingila ne malebeswa. Nlanyontewo iwoyu we kutanga wa ka fanila ku alakanigwa mu thambo dzose dza ti no tola. (Zwiani  3:6) Ba no shingisa nlayontewo iwoyo ba no wo be bakhwinya be Ndzimu, be be ne ku shatha kwe malebeswa, ne buchilo gu si nga pele.​—Bala Matewu 22:36-38.

Nlayontewo we bubili u nga ti tungamila mu ku shingidzana ne bangwe ne mbakiso. (1 Bakorinta 13:4-7) Ku shingisa nlayontewo iwoyo we bubili ko shanganyila ku yedza se kwa Ndzimu e shingidzana ne bathu.​—Bala Matewu 7:12; 22:39, 40.

Milayontewo ye Baibili i no diya misha se kwa i nga chila i wanana ne ku lakidzana ludo. (Bakolosa 3:12-14) Dama le Ndzimu lo vikilila misha ne ku diya ungwe nlayontewo u nga sagwa shule, kuti ndobolo ya ka fanila galila chose.​—Bala Genesisi 2:24.

Ha ti shingisa milayontewo ye Baibili ti nga vikilila zwa ti no sheta ha ku zha mu zwithu zwedu ne njalakangwa dzedu. Ha ti lakidzila, bahiri ba no shaka bathu ba no chila ne milayontewo ye Baibili ye ku thembeka ne ku shinga ne masimba. (Zwiani 10:4, 26; Bahebera 13:18) Dama le Ndzimu kakale lo ti diya ku shathila zwithu zwa ti nazo, ne ku tolela bukhwinya gwedu na Jehova pezhugwi ku pinda zwithu zwi no boneka.​—Bala Matewu 6:24, 25, 33; 1 Timoti 6:8-10.

Ku shingisa milayontewo ye Baibili ku nga vikilila mamuko edu. (Zwiani 14:30; 22:24, 25) Ku lakidzila, ha ti shingisa nlayo we Ndzimu u no leba ne kwe budakwa, kowo ti vikilila mu magwele a ka bipa ne dzi ngozi. (Zwiani 23:20) Jehova u no ti dumilila ku ngwa busukwa ne zila ya ka lizanila koga. (Pisalema 104:15; 1 Bakorinta 6:10) Milayontewo ye Ndzimu i no ti batsha ne ku ti diya ku zwilisa ku si mu mazwibato edu koga, ngono ne mu mikumbulo yedu. (Pisalema 119:97-100) Ngono Bakirisiti be malebeswa ha ba to tolela milayo ye Ndzimu pezhugwi ku zwishakila cha ba no da koga ne bukwabo. Ba no i tolela pezhugwi ku hlonipha Jehova.​—Bala Matewu 5:14-16.