THUTO 2
Ndzimu Ndi Yani?
1. Ini ta ka fanila namata Ndzimu?
Ndzimu we malebeswa ndiye Mbumbi we zwithu zose. Ha a na pa a ka tangisa kakale ha a nga be ne bupelo. (Pisalema 90:2) Ndiye Nthami we ndebo mbuya dzi no wangwa mu Baibili. (1 Timoti 1:11) Ne kuti Ndzimu a ka ti pa buchilo, ta ka fanila namata iye koga.—Bala Zumbunulo 4:11.
2. Ndzimu u no lingika chini?
A kuna nthu wa ka tongo bona Ndzimu ne kuti Meya, ku no dwa kuti nchili we mamo a pezhugwi ku pinda zwichili zwi no chila mu shango. (Johani 1:18; 4:24) Ne kwa ka jalo, ti nga khona bona buthu gwe Ndzimu mu zwithu zwa a ka bumba. Chilakidzilo, michelo ya ka siyasiyana ne maluba zo ti lakidza ludo ne buchenjedu gugwe. Bukulu gwe libumbo go ti lakidza masimba awe.—Bala Baroma 1:20.
Ti nga zwidiya kwa ka paphidzika ne kwe buthu gwe Ndzimu ne ku bala Baibili. Chilakidzilo, i no ti lakidza chi no diwa ne Ndzimu ne cha a singa de, se kwa e bata bathu, ne zila ya a no zwibata nayo mu mamo a singa fanane.—Bala Pisalema 103:7-10.
3. A Ndzimu u na zina?
Jesu wa kati: “Tate bedu ba kudzimu, zina lenyu nga li yengamadziwe.” (Matewu 6:9) Nenguba Ndzimu a na mitupo minjinji, zina lile li ngompela koga. Lo dangwa ne zila i singa fanane mu lulimi gungwe ne gungwe. Ne Ikhuwa ka njinji lo dangwa kuyi “Jehovah.” Ngono bangwe ba no li dana be ti “Yahweh.”—Bala Pisalema 83:18.
Zina le Ndzimu la ka dusiwa mu Dzibaibili njinji li be li misigwa ne mitupo Tetshi kene Ndzimu. Ngono ha Baibili i kwagwa, ya ka be i na zina le Ndzimu ka 7,000. Jesu wa ka thama kuti zina le Ndzimu li zigwe ne ku diya bathu ne kwe Ndzimu.—Bala Johani 17:26.
Lingilila vidiyo Does God Have a Name?
4. A Jehova u no khathazeka ne kwedu?
Se tate ba na ludo sa ikoko, Ndzimu u no thama kuti ti lulwamigwe cha chose
A ku andama kwe ku dziyidzika ko dwa kuti Jehova i Ndzimu u singa khathazeke ne kwedu? Bathu bangwe ba no alakana kuti u no ti dziyidza ku ti lika, ngono a ku zo jalo.—Bala Jakuba 1:13.
Ndzimu wa ka thama kuti nthu a zwishalulile cha a no da. A ha ti to bokela ku zwishalulila ku shingila Ndzimu ta ka shaladuka? (Joshua 24:15) Ngono bathu banjinji ba no thamila bangwe zwithu zwa ka bipa, ku dziyidzika ku be ku paphidzika. Ko hwisa Jehova zogwadza ku bona ku sina ndulamo.—Bala Genesisi 6:5, 6.
Jehova i Ndzimu u no ti thokomela. U no shaka ti shathila buchilo. U nowo pedzisa ku dziyidzika ne ba no ku thama chinyolocho. Ne kwa ka jalo, u na libaka gu no hwika gwe ku lechedzela ku dziyidzika ne chibakanyana. Mu thuto 8, towo zwidiya kuti libaka igogo i ni.—Bala 2 Pita 2:9; 3:7, 13.
5. Ti nga be pejo kwazo ne Ndzimu chini?
Jehova u no ti koka ku sedzela pejo naye ne ku lebeleka naye ne ntembezelo. U no da nthu ungwe ne ungwe. (Pisalema 65:2; 145:18) Wa ka zwimisila ku zwibatigwa. U no ela njele mazwimisilo edu e ku nshathisa nenguba ti kongwa mu zwibaka zwingwe. Ngono ne ti sa ka zwilizanila, ti nga shathila ku wanana kwazo ne Ndzimu.—Bala Pisalema 103:12-14; Jakuba 4:8.
Ne kuti Jehova wa ka ti pa buchilo, ta ka fanila ku nda ku pinda nngwe ne nngwe. (Mako 12:30) Ha u lakidza ludo gugo mu Ndzimu ne ku zwidiya kwa ka paphidzika ne kukwe ne ku thama cha a no shaka, u nowo be pejo naye kwazo.—Bala 1 Timoti 2:4; 1 Johani 5:3.
