Mitenga vyambone vyaloka kumwe Yeova, Nnungu wa lipuwilo; nae ankulota pakati pa likola lipagwe lipuwilo. (1 Timoti 1:11) Nnungu ni atunduvenge pakulota shipagwe shitamu. Ni shinu shikumene kwandikisha shitamu pakulota likola livenavo lipuwilo na vana vashungigwe shana. Vaklistu inkuvavaikila vaigwilile malamulo amushilambo shavo pakati pa kwandikisha shitamu.—Shomya Lukashi 2:1, 4, 5.

Nnungu aona dashi shitamu? Nae alota nnume na nkongwe vakalombana, vaname pamo maduva uti, na vakulupilanile. (Vabalaniya 13:4) Nnungu inannyatila kulakananga. (Malakiya 2:16) Kanji nae ankuneka nnume alakane na ndyagwe au nkongwe alakane na ntwagwe ikava kenga munu jumo anditenda ugoni.—Shomya Mateu 19:3-6, 9.

Yeova animumba nnume na nkongwe pakulota vapwashelane pakati pa shitamu shavo. (Kutunduvanga 2:18) Ntwamunu ni muti wa palikola. Nae ibidi alishe likola lyake na apundisha vyake Nnungu. Nae ibidi annagwaledye ndyagwe kwa umwiu. Ntwamunu na ndyamunu inkuvavaikila kuishimiyania na kunagwaledyania. Nnume na nkongwe ni vanu vanakowanga, nadoni vanavo ibidi vamanye kulivalilanila makosha lavo pakulota likola lyavo livenavo lipuwilo.—Shomya Vaepeshu 4:31, 32; 5:22-25, 33;1 Patulu 3:7.

Wako ukava kenga unkuvanavo matatisho pa shitamu shako, uti mwenu ibidi mulikanyalidye kutataliyania kwa linagwaledyo. (1 Vakolintu 13:4, 5) Ibibiliya hainatuma shinu  pakati pa nkongwe na nnume pakulota vapumulanile, kanji vanavo inkuvavaikila kwangangalana shana lakaumilila matatisho pa shitamu shavo.—Shomya 1 Vakolintu 7:10-13.

Nnungu alota vana vavenavo lipuwilo. Nae ankuvapa midimu vyambone pakulota vaname shana mushinemba shavo. Yeova ankulota vana vavenavo limanyilo na umanyimanyi wa vatatavavo. (Vakoloshu 3:20) Nae yadavo ankulota vana vavenavo lipuwilo pavatenda malotelo a Nnungu na lamwanagwe, Yesu.—Shomya Nkúvalanga 11:9–12:1; Mateu 19:13-15; 21:15, 16.

Vatatamunu ivaikidile valikanyalidye mushimadengo pakulota vavapatiye vanavavo shakulya, lyutu lyakunama na dinguvo. (1 Timoti 5:8) Kanji, pakulota vanavenu vavenavo lipuwilo, ibidi kuvapundisha vya Nnungu pakulota vannagwaledye. (Vaepeshu 6:4) Mpano wenu wakunnagwaledya Nnungu unavapwashela vanavenu kutandedya momo. Mukavapundisha vanavenu kupitila lilove lya Nnungu, Ibibiliya, kunavapwashela vana kuvanavo makumbukililo ambone.—Shomya Kumbukumbu 6:4-7; Mikong’o 22:6.

Vana vanaligwa shana wakati vatatamunu pavavalambwalela na kuvapa dimongo. Vana momo inkuloteka kuvalingula na kuvaduma. Kutenda vinu kenga avi kwa upandi wa vana, kunauka natadya vana kuleka kutenda vinu vilota ata kumya lipuwilo lyavo. (Mikong’o 22:15) Kanji, kuduma hakunave kwakwidopa au kwaukalau.—Shomya Vakoloshu 3:21.

Mashaidi va Yeova vankukandyanga mabuku lakuvilingananga landikigwe pakulota kuvapwashela vatatamunu na vana. Mabuku alo lankuma shalowa mu Ibibiliya.—Shomya Dimu 19:7, 11.