Romanus 2:1-29
2 Pur isu, ka ta inporta ken ki bo é, si bu julga otus algen, bu ka ten diskulpa. Pamodi óras ki bu ta julga, bu ta kondena bu kabésa, pamodi abo ki ta julga, bu ta faze kes mésmu kuza.
2 Má, nu sabe ma Deus ta julga di akordu ku verdadi, i el ta kondena kes algen ki ta faze kes kuza li.
3 Má, bu ta atxa ma bu ta skapa di julgamentu di Deus, óras ki bu ta julga kes algen ki ta faze kes kuza ki abo tanbê bu ta faze?
4 Ô bu sta ta dispreza kel grandi bondadi, mizerikórdia* i paxénxa di Deus? Bu ka da kónta ma Deus, na se bondadi, sta ta tenta djuda-u rapende?
5 Má pamodi bu temozia i bu korason ki ka ta rapende, di serteza Deus ta ben kastiga-u na dia di se raiba, óras ki el mostra se julgamentu justu.
6 I el ta ben da kada un di akordu ku kuzê ki el faze.
7 El ta ben da vida pa tudu ténpu pa kes ki ta kontinua* ta faze kel ki é dretu. Kes algen li sta ta buska glória, ónra i vida ki ka ta kaba.
8 Má, Deus ta ben mostra se fúria i se raiba kóntra kes ki gosta di ranja konfuzon, i kes ki ka ta obi ku verdadi, má es ta obi ku injustisa.
9 Ta ben ten difikuldadi* i frónta pa tudu kel* ki ta faze kuzas mariadu, primeru pa judeu i tanbê pa gregu.
10 Má ta ben ten glória, ónra i pas pa tudu kenha ki ta faze kel ki é dretu, primeru pa judeu i tanbê pa gregu.
11 Pamodi pa Deus tudu algen é igual.
12 Pamodi tudu kes ki peka sen konxe lei tanbê ta móre sikrê es ka konxe lei, má tudu kes ki konxe lei i peka ta julgadu di akordu ku lei.
13 Pamodi é ka kes ki ta obi lei ki é justu dianti di Deus, má é kes ki ta kunpri lei ki Deus ta ben fla ma é justu.
14 Enbóra pesoas di nason ka konxe lei di Deus, es ta faze kes kuza ki lei ta fla. Enbóra es ka konxe kes lei, kes lei sta na ses korason.
15 Es ta prova ma kuzê ki lei ta inxina sta skrebedu na ses korason, i ses konsénsia ta konkorda ku es. Ses própi pensamentu ta akuza-s ô ti mésmu ta diskulpa-s.
16 Kel-li ta ben kontise na dia ki Deus, através di Kristu Jizus, ben julga kes kuza ki ómi tene sukundidu. Tudu kel-li ta faze párti di kes notísia sábi ki N ta pâpia.
17 Má, si bu ta fla ma abo é judeu, bu ta kunfia na lei i bu ten orgulhu di Deus,
18 si bu konxe se vontadi i bu ta seta kes kuza ki é dretu pamodi bu inxinadu ku bazi na Lei,
19 si bu sta konvensidu ma bu pode gia ségu i da lus pa kes ki sta na sukuru,
20 ma bu pode koriji algen tolu, inxina kriansas, intende kes ensinu i verdadis prinsipal di Lei,
21 nton, abo ki ta inxina otus, bu ka ta inxina bu kabésa? Abo ki ta prega: “Ka bu furta”, bu ta furta?
22 Abo ki ta fla: “Ka bu faze adultériu”, bu ta faze adultériu? Abo ki ta ôdia imajen, bu ta furta na ténplu?
23 Abo ki ten orgulhu pamodi bu konxe lei, bu ta dizonra Deus óras ki bu ta viola Lei?
24 Pamodi sima sta skrebedu: “Sta ta papiadu mal di nómi di Deus entri nasons pamodi nhos.”
25 Na verdadi, sirkunsizon sô ten valor si bu obi ku lei. Má si abo, bu ta viola lei, é sima si nunka bu ka sirkunsidadu.
26 Pur isu, si un algen ki é ka sirkunsidadu ta obi ku kes kuza ki lei ta fla, Deus ka ta odja-l sima un algen ki é sirkunsidadu?
27 I kel algen ki é ka sirkunsidadu, óras ki el ta kunpri Lei, el ta julga-u, abo ki ta viola lei, sikrê abo é sirkunsidadu i bu konxe lei.
28 Pamodi judeu é ka kel ki é di pa fóra, nen sirkunsizon é ka kel ki ta fazedu na korpu.
29 Má judeu é kel ki é di pa déntu, i se sirkunsizon é kel ki ta fazedu na korason através di spritu santu, ka através di lei. É ka ómi ki ta lova kel algen, má é Deus.
Nótas di rodapé
^ Ô: “toleránsia”.
^ Na gregu ta fla: “aguenta firmi”.
^ Na gregu ta fla: “tribulason”.
^ Ô: “pa alma di tudu ómi”.
