Nu debe sforsa pa rekupera faxi óras ki kontise algun kuza mariadu. Un algen ta ganha kel kapasidadi li ku spiriénsia. Sima un kriansa ta prende anda sô dipôs ki el kai alguns bês, un algen sô ta prende vive dretu sô dipôs ki el pasa pa alguns prubléma.

Alguns kriansa ta krê dizisti óras ki es ta fadja na algun kuza, óras ki es ta pasa pa algun difikuldadi ô óras ki otus algen ta kritika-s. Otus ta dizisti própi. Má é inportanti es ntende ma:

• Tudu algen ta fadja na algun kuza. — Tiago 3:2.

• Nos tudu pode ben pasa pa situasons difísil na vida. — Eclesiastes 9:11.

• Sô nu ta konsigi midjora si un algen fla-nu kuzê ki nu faze mariadu. — Provérbios 9:9.

Si bu fidju ka ta dizisti óras ki el pasa pa un prubléma, el ta konsigi lida midjór ku prublémas óras ki el bira grandi.

Óras ki el fadja.

PRINSÍPIU DI BÍBLIA: ‘Sikrê justu kai 7 bês, el ta torna labanta otu bês’. — Provérbios 24:16.

Djuda bu fidju prende modi ki el pode odja si un prubléma é gravi ô nau. Pur izénplu, kuzê ki el ta faze si el ka ten bon nóta na próva? Talvês el pode dizisti i fla: “N ka ta sirbi pa nada!”

Pa inxina bu fidju lida ku un prubléma, djuda-l pensa na kuzê ki el pode faze pa el midjora di prósimu bês. Di kel manera li, el ta tenta rezolve prubléma i para di xinti tristi.

Má tanbê, ivita rezolve prubléma di bu fidju. Envês di kel-li, djuda-l atxa un manera di rezolve prubléma di el pa el. Talvês bu pode pergunta-l: “Kuzê ki bu pode faze pa ntende kel matéria midjór?”

Óras ki kuzas mariadu kontise.

PRINSÍPIU DI BÍBLIA: ‘Nhos ka sabe modi ki ta ser nhos vida manhan’. — Tiago 4:14.

Ningen ka sabe kuzê ki ta kontise manhan. Un algen ki oji sta riku manhan el pode fika póbri. Un algen ki oji tene bon saúdi, manhan el pode duense.  Bíblia ta fla: ‘Algen ki ta kóre faxi nen sénpri ka ta ganha korida, i nen sénpri é kes algen fórti ki ta ganha géra; pamodi ténpu i kuzas ki algen ka sta spéra ta kontise ku tudu es.’ — Eclesiastes 9:11.

Pai ku mai sénpri ta faze tudu kel ki es pode pa es proteje ses fidju di prigu. Má, bu ka ta konsigi proteje bu fidju di tudu prublémas.

É klaru ki bu fidju ka ten spiriénsia ki ta da pa el lida ku kuzas sima perde trabadju ô prublémas di dinheru. Má, bu pode djuda-l lida ku otus prubléma, sima óras ki el ka sta da dretu ku un amigu ô el perde un família ki el ta ama. a

Óras ki bu fidju fladu ma el meste midjora.

PRINSÍPIU DI BÍBLIA: ‘Obi konsedju, pa bu pode bira sábiu na futuru.’ — Provérbios 19:20.

Óras ki un algen fla bu fidju ma el meste midjora na algun kuza, é ka pamodi el krê magua-l. Má, el krê djuda-l odja ma ten algun kuza ki el meste midjora.

Óras ki bu ta inxina bu fidju seta kel koreson, bu ta popa nhos dôs di txeu dór di kabésa. Un pai, ki txoma John, fla: “Si bus fidju nunka ka koriji ses éru, nunka es ka ta prende. Es ta ben ten kada bês más prubléma, i bu ta pasa bu vida ta kóre ses trás pa rezolve ses prubléma. I kel-li ta poi vida ta fika más difísil pa pai ku mai i tanbê pa fidju.”

Modi ki bu pode djuda bu fidju óras ki el korijidu? Óras ki bu fidju resebe un koreson, ka ta nporta si é na skóla ô si é na otu lugar, ka bu fla-l ma kel koreson é injustu. Envês di kel-li, pergunta bu fidju:

• “Pamodi ki bu ta atxa ma bu resebe kel koreson?”

• “Modi ki bu pode midjora?”

• “Kuzê ki bu ta faze si kontise mésmu kuza otu bês?”

Lenbra ma óras ki bu fidju korijidu, kel-li ta djuda-l gósi i tanbê óras ki el bira más grandi.