Deus ta obi nos orason?
Dja bu kustuma pergunta si Deus ta obi bus orason? Si kel-li dja kontise, é ka sô bo. Txeu algen dja faze orason pa Deus pamodi ses prubléma, má simé es kontinua ku prubléma. Kel-li krê fla ma Deus ka ta liga nos orason? Klaru ki nau! Bíblia ta da-nu sertéza ma Deus ta obi-nu óras ki nu ta faze orason pa el di manera ki el ta krê. Nu ben odja kuzê ki Bíblia ta fla.
DEUS TA OBI BUS ORASON.
‘Ó Kel ki ta obi orason, na bo ta txiga algen di tudu tipu.’ — Salmo 65:2.
Alguns algen ta faze orason pamodi kel-li ta djuda-s xinti más midjór, mésmu ki es ta atxa ma ningen ka sta ta obi-s. Má, orason é ka un kuza ki nu ta faze sô pa nu xinti dretu i pa nu konsigi lida ku nos prublémas. Bíblia ta da-nu sertéza ma ‘Jeová * sta pértu di tudu kes ki ta pâpia di el, di tudu kes ki ta pâpia verdadi sobri el. El ta obi-s óras ki es pidi ajuda’. — Salmo 145:18, 19.
Pur isu, nu pode ten sertéza ma Jeová Deus ta obi orason di se sérvus. El ta fla ku amor: ‘Nhos ta txoma-m i nhos ta txiga na mi na orason, i N ta obi nhos.’ — Jeremias 29:12.
DEUS KRÊ PA BU FAZE ORASON PA EL.
‘Ka nhos para di faze orason.’ — Romanos 12:12.
Bíblia ta insentiva-nu pa nu ‘ora sénpri’ i ‘tudu óra.’ Kel-li ta mostra klaru ma Jeová krê pa nu faze orason pa el. — Mateus 26:41; Efésios 6:18.
Pamodi ki Deus krê pa nu faze orason pa el? Pensa na kel-li: Ki pai ki ka ta fika kontenti óras ki se fidju pikinoti ta fla-l: “Papá, djuda-m”? É klaru ki kel pai dja sabe kuzê ki se fidju meste ô kuzê ki el ta xinti. Má, óras ki el ta obi kes palavra li, kel-li ta mostra-l ma se fidju ta kunfia na el i ma el ten un amizadi ku el. Di mésmu manera, óras ki nu ta faze orason pa Jeová Deus, nu ta mostra-l ma nu ta kunfia na el i ma nu krê ten un amizadi ku el. — Provérbios 15:8; Tiago 4:8.
DEUS TA PREOKUPA KU BO DI VERDADI.
‘Bota tudu nhos preokupason riba di el, pamodi el ta kuida di nhos.’ — 1 Pedro 5:7.
Deus krê pa nu faze orason pa el pamodi el ta ama-nu i el ta preokupa ku nos. El sta sienti di prublémas i preokupasons ki nu ten i el krê djuda-nu.
Duránti tudu se vida, Rei Davidi faze orason pa Jeová Deus djuda-l, i el fla-L kuzê ki el ta pensa i kuzê ki el ta xinti. (Salmo 23:1-6 ) Kuzê ki Deus ta xintiba pa Davidi? El ta amaba Davidi i el ta obiba se orason. (Atos 13:22 ) Di mésmu manera, Deus ta obi nos orason pamodi el ta preokupa ku nos.
‘N TA AMA JEOVÁ, PAMODI EL TA OBI NHA VÓS’
Kes-li é palavras di un skritor ki skrebe un di kes salmo ki sta na Bíblia. El tinha sertéza ma Deus ta obiba se orason, i kel-la djuda-l txeu. El xinti más amigu di Deus i el atxa forsa pa lida ku prublémas i tristézas na vida. — Salmo 116:1-9.
Óras ki nu ten sertéza ma Deus ta obi nos orason, nu ta kontinua ta faze orason. Odja izénplu di Pedru ki ta mora na nórti di Spanha. El perde se fidju di 19 anu na un asidenti di karu. Na se dizusperu, Pedru abri se korason pa Deus ta pidi txeu bês pa el konsola-l i djuda-l. Kuzê ki kontise? Pedru fla: “Jeová responde nhas orason. El uza irmons di kongregason pa konsola i djuda mi ku nha mudjer.”
Txeu bês respósta di nos orason ta ben através di konsolu i ajuda ki nos amigus ta da-nu
Nbóra orasons di Pedru ka traze se fidju di vólta, el djuda Pedru ku se família txeu. Se mudjer, María Carmen ta lenbra: “Orason djuda-m aguenta nha tristéza. N sabia ma Jeová Deus ta ntendeba mi, pamodi óras ki N ta fazeba orason N ta xintiba trankilu i un pas déntu mi.”
Bíblia i kuzas ki nu ta pasa na vida ta mostra klaru ma Deus ta obi nos orason. Má é klaru ki Deus ka ta responde tudu orason. Pamodi ki Deus ta responde alguns orason, má otus el ka ta responde?
^ par. 5 Jeová é nómi di Deus. — Salmo 83:18.
Bu pode gosta di kes-li tanbê
ESSENTIAL BIBLE TEACHINGS
Deus ta obi tudu orason?
I si un algen ta faze orason ta pensa sô na se kabésa? I si un ómi ta maltrata se mudjer i dipôs el ta pidi Deus pa abensua-l?
ENSINUS DI BÍBLIA
Sprimenta studa Bíblia ku nos
Ten un studu di Bíblia djuntu ku un algen ki ta djuda-u ntende-l.
