“Kes Tistimunha di Jeová ta trataba tudu algen dretu i nhas katxor tanbê. Un dia, Elaine, ki staba sakédu na ladu di un karinhu di publikason, da nhas katxor uns bolinhu pa es kume. Désdi kel dia, sénpri ki nu ta txigaba pértu di kel karinhu di publikason, nhas katxor ta puxaba mi pa kes Tistimunha di Jeová pa es ba tomaba más bolinhus.

“Ténpu ba ta pasa i nhas katxor ta staba sábi ta kume ses bolinhus. Ami N fika ta gosta di pâpia ku Tistimunhas di Jeová, má N ka krê papiaba txeu ku es. N tinha más di 70 anu i N ka sabia na kuzê ki Tistimunhas di Jeová ta kriditaba na el. Dja ki N staba diziludidu ku txeu igreja, N krê studaba Bíblia mi sô.

“Duránti kel ténpu la, N ta odjaba otus Tistimunha di Jeová na otus lugar sakédu na ladu di ses karinhu. Es tanbê, es ta trataba algen dretu. Sénpri es uza Bíblia pa responde nhas pergunta i kel-li pô-m ta xinti más kunfiansa na es.

“Un dia, Elaine pergunta-m: ‘Bu ta atxa ma animal é un prezenti ki Deus da-nu?’ N responde-l: ‘É klaru ki sin!’ Dipôs Elaine mostra-m kuzê ki Isaías 11:6-9 ta fla. Désdi kel dia N fika ku más gana di prende sobri Bíblia. Má simé, inda N ka krê tomaba ninhun publikason pa N lé.

“Sima ténpu ba ta pasa, N fika ta gosta txeu di kes konbérsu ki N ta tinha ku Elaine i ku se maridu ki txoma Brent. Es fla-m pa N lé livru di Mateus ti livru di Atos, pa N pode ntende kuzê ki siginifika ser un kriston di verdadi. Nton, N faze sima es fla-m. Dipôs di poku ténpu, N seta studa Bíblia ku es. Kel-li kontise na veron di 2016.

“N gostaba txeu di studa Bíblia i di sistiba runion na Salon di Reinu. N fika txeu kontenti di prende kuzê ki Bíblia ta inxina di verdadi. Dipôs di un anu, N bira un Tistimunha di Jeová. Gósi ki dja N tene 79 anu, N sabe ma dja N atxa kel relijion verdaderu. N sta txeu kontenti pamodi Jeová da-m priviléjiu di faze párti di se família.”