NA TÉNPU ki Bíblia skrebedu, tinha un enkaregadu ki ta tomaba kónta di kaza ô di propriadadi di otu algen.

Kantu Juzé, fidju di Jakó, éra skravu na Ijitu, el bira enkaregadu di kaza di se patron. Na verdadi, se patron ki éra di Ijitu ‘dexa tudu kuza ki éra di sel na mô di Juzé’. (Gén. 39:2-6) Dipôs, kantu Juzé bira un governanti poderozu na Ijitu, el skodje un enkaregadu pa toma kónta di se própi kaza. — Gén. 44:4.

Na ténpu di Jizus, txeu bês kes dónu di téra ta moraba na sidadis lonji di ses plantason. Nton, es ta skodjeba algen pa tomaba kónta di trabadju ki ta fazedu na ses téra.

Ken ki ta staba priparadu pa ser un enkaregadu? Un skritor di Roma ki txomaba Columella, ki vive na primeru séklu, fla ma un skravu ki éra diziginadu pa ser enkaregadu, tinha ki sérba un algen ki “prende faze kel trabadju dretu”. El tinha ki sérba un algen ku “kapasidadi di mostra autoridadi, má ka di manera kruel”. Tanbê el fla: “I más inportanti, el ka debe pensa ma el sabe un kuza ki el ka sabe, i el debe sta sénpri prontu pa prende.”

Palavra di Deus ta uza izénplu di un enkaregadu pa mostra trabadju ki ta fazedu na kongregason. Pur izénplu, apóstlu Pedru nkoraja kada kriston pa uza ses kapasidadi ki Deus da-s pa ‘sirbi otus, sima un bon enkaregadu di bondadi di Deus ki ka meresedu’. — 1 Ped. 4:10.

Jizus uza izénplu di un enkaregadu na ilustrason ki ta parse na Lucas 16:1-8. Tanbê, na un profesia ki el faze sobri sinal di se prezénsa kómu Rei, Jizus garanti se sigidoris ma el ta skodjeba un ‘skravu fiel i prudenti’ ô un ‘enkaregadu fiel’. Trabadju prinsipal di kel enkaregadu éra pa sénpri el daba kumida spritual pa sigidoris di Kristu duránti ténpu di fin. (Mat. 24:45-47; Luc. 12:42) Nu ta fika kontenti di sta na meiu di kes ki ta resebe publikasons ki enkaregadu fiel ta pripara i ki sta prontu pa kalker algen na mundu interu.