1-2. Pamodi ki Jeová kria-nu pa nu xinti más alegria na da di ki na resebe?

 KANTU Jeová kria-nu, el faze-nu ku kapasidadi di xinti más alegria na da di ki na resebe. (Atus 20:35) Má kel-li krê fla ma nu ka ta xinti kontenti óras ki nu ta resebe algun kuza? Nau. Nos tudu nu ta xinti sábi óras ki nu resebe un prezenti. Má, nu ta xinti más sábi inda si é nos ki da kel prezenti. Na verdadi, Jeová faze-nu di kel manera li pamodi el sabe ma kel-li é bon pa nos. Pamodi?

² Pamodi Jeová sabia ma di kel manera li, nu ta pode poi nos kabésa ta fika más filís. Nu pode ser más filís óras ki nu ta djobe oportunidadis pa da otus algen kel ki nu ten. Nu ta fika dimiradu pamodi Jeová faze-nu si! — Sal. 139:14.

3. Pamodi ki Jeová ta txomadu di “kel Deus filís”?

³ Bíblia ta fla ma kes algen ki ta da é más filís, pur isu nu ka ta fika dimiradu óras ki el ta fla ma Jeová é “kel Deus filís.” (1 Tim. 1:11) El foi kel primeru algen ki kumesa ta da i ka ten ningen ki ta da más di ki Jeová. Sima Paulu fla, é pamodi Deus ki “nu ten vida, nu ta mexe i nu ta izisti”. (Atus 17:28) Na verdadi, “tudu bon prezenti i tudu prezenti perfeitu” ta ben di Jeová. — Tia. 1:17.

4. Kuzê ki ta djuda-nu xinti más alegria?

⁴ Di serteza, nos tudu nu ta gostaba di xinti kel filisidadi ki ta ben di da. Nu ta faze kel-li óras ki nu ta imita Jeová ki é un Deus ki gosta di da. (Efé. 5:1) Na kel studu li, nu sta ben studa sobri se izénplu ki é bunitu i tanbê kuzê ki nu pode faze si nu xinti ma otus algen ka mostra gratidon  pa kuzê ki nu faze pa es. Kes kuza li ta ben djuda-nu kontinua ku alegria i ti mésmu omenta kel alegria ki ta ben di da.

IMITA JEOVÁ KI GOSTA DI DA

5. Kal ki é alguns kuza material ki Jeová ta da-nu?

⁵ Kal ki é alguns manera ki Jeová ta mostra ma el gosta di da? Odja alguns izénplu. Jeová ta da-nu kuzas material. Nu pode ka ten un vida di luxu, má grasas-a Jeová, maioria di nos nu ten kel ki nu meste. Pur izénplu, el ta ranja manera pa nu ten kumida, ropa i lugar di mora. (Sal. 4:8; Mat. 6:31-33; 1 Tim. 6:6-8) Jeová ka ta da-nu tudu kes kuza li sô pamodi el ta xinti ma el debe faze-l. Nton pamodi ki Jeová ta faze kel-li pa nos?

6. Kuzê ki nu ta prende di Mateus 6:25, 26?

⁶ Jeová ta da-nu kes kuza ki nu meste pamodi el ta ama-nu. Odja kuzê ki Jizus fla na Mateus 6:25, 26. (Lé.) Jizus uza alguns izénplu di kriason. Kantu Jizus pâpia sobri pasus, el fla: “Es ka ta símia, es ka ta faze kodjéta, nen es ka ta djunta na armazén”. Má odja kuzê ki el fla dipôs: “Nhos Pai ki sta na séu ta da-s kumida.” Dipôs el pergunta: “Nhos ka bale más di ki es?” Kuzê ki el krê inxinaba nos? Kes sérvu fiel di Jeová ten mutu más valor ki animal. Si Jeová ta da animal kes kuza ki es meste, nu pode ten serteza ma el ta faze mésmu kuza ku nos! Sima un pai ki ta kuida di se família, Jeová ta kuida di se família pamodi el ta ama-nu. — Sal. 145:16; Mat. 6:32.

7. Kal ki é un manera ki nu pode imita Jeová ki gosta di da? (Odja fotus.)

⁷ Sima Jeová, nos tanbê nu pode da otus algen kuzas material pamodi nu ta ama-s. Pur izénplu, bu konxe un irmon ô un irman ki sta ta meste di kumida ô ropa? Jeová pode uza-u pa bu da-l kes kuza ki el meste. Povu di Jeová tanbê sta prontu pa djuda otus algen óras ki kontise un dizastri na naturéza. Pur izénplu, duránti koronavírus, irmons ku irmans da kumida, ropa i otus kuza pa kes algen ki mesteba. Tanbê txeu irmon da kontribuison pa apoia trabadju na mundu interu. Kel dinheru uzadu pa djuda irmons na mundu interu ki staba ta meste pamodi dizastris na naturéza. Es aplika kel konsedju ki sta na Ebreus 13:16:  “Ka nhos skese di faze kel ki é dretu i di dividi kel ki nhos ten ku otus, pamodi Deus ta fika kontenti ku kes sakrifisiu li.”

8. Modi ki Jeová ta djuda-nu óras ki el ta da-nu se puder? (Filipensis 2:13)

⁸ Jeová ta da puder. Jeová ten puder sen limiti i el tene vontadi di da se sérvus fiel puder. (Lé Filipensis 2:13.) Dja bu kustuma ora ta pidi forsa pa bu ka kai na un tentason ô puder pa bu aguenta un difikuldadi? Ô talvês dja bu ora ta pidi Jeová pa djuda-u aguenta sô más un dia. Óras ki bu orason respondedu, bu pode konkorda ku kel ki apóstlu Paulu skrebe: “Pa tudu kuza N ten forsa grasas-a kel ki ta da-m puder.” — Flp. 4:13.

9. Kal ki é alguns manera ki nu pode imita Jeová si nu uza nos puder pa djuda otus algen? (Odja fotu.)

⁹ Nu ka ten puder sen limiti sima Jeová, i nu ka ta pode da otus algen puder di mésmu manera ki el ta faze, má nu pode imita-l óras ki nu ta uza nos puder pa djuda otus algen. Pur izénplu, nu pode djuda un irmon ô un irman ki dja sta algen grandi ô ki sta duenti linpa ses kaza ô konpo algun kuza ki meste ô faze-s mandadu. Si nos situason ta da, nu pode oferese pa linpa i konpo Salon di Reinu. Si nu uza nos puder di kes manera li, nu sta ta djuda kes algen ki ta adora Jeová.

10. Modi ki nu pode uza palavras ki ten txeu puder pa djuda otus algen?

¹⁰ Ka bu skese ma palavras ten puder tanbê. Bu pode pensa na un algen ki pode xinti inkorajadu si bu fla-l ma bu ta da txeu valor pa kuzê ki el ta faze? Bu konxe algun algen ki sta meste di konsolu? Si sin, faze tudu kel ki bu ta pode pa dexa kel algen sabe ma bu ta preokupa ku el. Bu pode vizita-l, txoma-l pa tilifóni ô skrebe-l un karta, manda-l un e-mail ô skrebe-l un mensajen. Bu ka meste ser bon na pâpia. Pokus palavra fladu ku amor pode ser kel ki nos irmon ô irman sta meste pa el kontinua fiel pa más un dia ô pa el xinti midjór na un situason ki el sta ta pasa pa el. — Pro. 12:25; Efé. 4:29.

11. Modi ki Jeová ta uza se sabedoria?

¹¹ Jeová ta da sabedoria. Disiplu Tiagu skrebe: “Si algun di nhos tene falta di sabedoria, pa el kontinua ta pidi Deus, i el ta dadu el, pamodi Deus ta da tudu algen el avontádi, i el ka ta kritika kel ki ta pidi-l.” (Tia. 1:5; nóta di rodapé.) Sima kes palavra li ta mostra, Jeová ka ta guarda se sabedoria sô pa el. El ta da-nu el avontádi.  Tiagu tanbê fla ma óras ki Jeová ta da sabedoria, el “ka ta fika xatiadu”, ô “el ka ta kritika”. Jeová nunka ka ta pô-nu ta xinti tristi óras ki nu ta pidi-l orientason. Na verdadi, el krê pa nu pidi se ajuda. — Pro. 2:1-6.

12. Ki oportunidadis nu ten di inxina otus algen kuzê ki nu sabe?

¹² I nos? Modi ki nu pode imita Jeová óras ki nu ta da otus algen nos sabedoria? (Sal. 32:8) Povu di Jeová ten txeu oportunidadi pa inxina otus algen kuzê ki es prende. Pur izénplu, nu pode trena kes publikador ki é novu na pregason. Ansions, ku paxénxa ta djuda kes ajudantis di kongregason i kes irmon batizadu prende modi ki es pode kunpri ses diziginason na kongregason. Tanbê, kes irmon ki ten más spiriénsia na konstruson i na konpo prédius di organizason ta djuda kes irmon ki ten ménus spiriénsia.

13. Modi ki nu pode imita manera ki Jeová ta da sabedoria?

¹³ Tenta imita Jeová óras ki bu ta trena otus algen. Lenbra, Jeová ta da sabedoria avontádi. Pur isu, di livri vontadi, nu krê inxina kes algen ki sta ta prende kuzê ki nu sabe. Nu ka ta dexa di inxina otus algen kuzê ki nu sabe sô pamodi nu ta fika ku medu ma es ta ben toma-nu nos diziginason. Nen nu ka ta pensa: ‘Ningen ka trena-m! Dexa-l, el ta prende el sô.’ Kel tipu di atitudi li ka debe izisti entri povu di Jeová. Má nu ta fika kontenti di fla kel ki nu sabe, i faze tudu kel ki nu ta pode pa trena otus. (1 Tes. 2:8) Nu ta spera ma “asi es ta fika kualifikadu pa inxina otus algen.” (2 Tim. 2:1, 2) Si nos tudu, nu gosta di inxina otus algen kel ki nu sabe, kel algen ta ten más sabedoria i el ta xinti más kontenti, i nos tanbê.

ÓRAS KI UN ALGEN KA DA VALOR PA KUZÊ KI NU FAZE PA EL

14. Modi ki maioria di pesoas ta reaji óras ki nu faze algun kuza pa es?

¹⁴ Óras ki nu da algun kuza pa otus algen, prinsipalmenti pa nos irmons i irmans, normalmenti es ta agradese-nu. Es pode skrebe un karta ta agradese-nu ô es pode mostra gratidon di un otu manera. (Kol. 3:15) Óras ki es ta agradese-nu pamodi kuzas ki nu faze pa es, nu ta xinti más filís.

15. Di kuzê ki nu debe lenbra óras ki un algen ka da valor pa kuzê ki nu faze pa el?

¹⁵ Má alguns algen ka ta agradese-nu pa kuzê ki nu faze pa es. Alvês ta parse ma otus algen ka ta da valor pa tudu kel ki nu ta faze pa djuda-s, ô es ka ta repara ténpu ki nu ta gasta, forsa i kuzas ki nu ten pa nu faze algun kuza pa es. Si kel-li kontise, modi ki nu pode ka perde nos alegria ô fika maguadu? Lenbra di kuzê ki Atus 20:35 ta fla. Kel alegria ki nu ta xinti na da ka ta dipende di modi ki pesoas ta reaji. Nu pode skodje xinti alegria na da, sikrê ta parse ma otus algen ka da valor pa kuzê ki nu faze pa es. Kuzê ki pode djuda-nu? Odja alguns manera.

16. Kuzê ki pode djuda-nu kontinua ta da ku alegria?

¹⁶ Lenbra ma óras ki bu ta da, bu sta ta imita Jeová. Jeová ta da kuzas bon pa tudu algen, ka ta inporta si es ta da valor ô nau. (Mat. 5:43-48) Jeová ta promete ma óras ki sima el nu da “sen spera nada di vólta”, el ta ‘rekonpensa-nu txeu’. (Luk. 6:35) Nton, ka bu fika diziludidu si otus algen ka agradese-u pamodi kuzê ki bu faze pa es. Lenbra ma Jeová sénpri ta ben rekonpensa-u pa kes kuza dretu ki bu faze pa djuda otus algen, i  pamodi bu “da ku alegria.” — Pro. 19:17; 2 Kor. 9:7.

17. Kal ki é kel motivu más inportanti ki debe pô-nu ta krê da otus algen? (Lukas 14:12-14)

¹⁷ Otu manera ki nu pode imita Jeová é óras ki nu ta faze kel ki Jizus fla na Lukas 14:12-14. (Lé.) É klaru ki é ka mariadu konvida un algen pa kume ku nos ô mostra-l bondadi, sima dja el fazeba ku nos antis. Má, i si nu da kónta ma alvês nu ta da sô pamodi nu ta spera resebe algun kuza di vólta? Si kel-li sta kontise ku bo, tenta faze sima Jizus fla. Nu pode resebe dretu kes algen ki nu sabe ma ka ten nada pa da-nu di vólta. Di kel manera li, nu ta ser filís pamodi nu sta ta imita Jeová. I si nu ka spera nada di vólta, sénpri nu ta ser filís pamodi nu ta da otus algen, sikrê es ka mostra gratidon pa kuzê ki nu faze pa es.

18. Kuzê ki nunka nu ka debe faze i pamodi?

¹⁸ Ka bu atxa ma otus algen sta ta ser ingratu. (1 Kor. 13:7) Si otus algen ka mostra gratidon, nu pode pensa na kel pergunta li: ‘Kel algen ka da valor própi pa kuzê ki nu faze pa el, ô el skese di mostra gratidon?’ Talvês kel algen ka mostra gratidon di manera ki nu staba ta spera. Alguns algen ta xinti txeu gratu, má es ten txeu difikuldadi na mostra kel-la. Es pode fika ku vergónha di resebe ajuda, prinsipalmenti si dja es djudaba otus algen antis. Má si nu ta ama nos irmons ku irmans di verdadi, nu ka ta pensa mariadu di es i nu ta kontinua ta da ku alegria. — Efé. 4:2.

19-20. Kuzê más ki pode djuda-nu xinti alegria óras ki nu ta da otus algen? (Odja fotus.)

¹⁹ Ten paxénxa. Rei Salumon skrebe: ‘Bota bu pon na agu, pamodi dipôs di txeu dia bu ta ben atxa-l otu bês.’ (Ecl. 11:1) Kes palavra li ta inxina-nu ma alguns algen ta mostra gratidon sô ‘dipôs di txeu dia’. Odja un spiriénsia ki ta mostra ma kel-li é verdadi.

²⁰ Dja ten txeu anu ki mudjer di un enkaregadu  di grupu di kongregason skrebe un karta pa un irman ki tinha poku ténpu ki batiza, ta fla pa el kontinua ku un fé fórti. Uns 8 anu dipôs ki kel irman resebe kel karta, el skrebe un karta ta fla: “Bu ka sabe kel-li, má N krê dexa-u sabe modi ki bu djuda-m txeu na kes anu ki pasa. [Kes palavra ki bu skrebe] ku amor na bu karta toka nha korason i nunka N ka skese di kel testu di Bíblia.” a Dipôs di splika alguns difikuldadi ki el pasa pa el, kel irman fla: “Alvês N ta pensaba na dizisti di tudu kuza, i na paraba di sirbi Jeová. Má sénpri N ta lenbraba di kel testu ki bu skrebeba mi. El da-m forsa pa N kontinua ku un fé fórti i es djuda-m pa... N ka dizisti.” El kontinua ta fla: “Duránti kes 8 anu li, nada ka da-m koraji más di ki kel karta i kel testu ki bu manda-m.” Imajina alegria ki kel mudjer di enkaregadu di grupu di kongregason xinti kantu el resebe kel karta ‘dipôs di txeu dia’! Tanbê un algen pode mostra gratidon pa un kuza dretu ki nu faze pa el dipôs di txeu ténpu.

21. Pamodi ki bu sta disididu na kontinua ta imita Jeová ki gosta di da?

²¹ Sima dja nu odjaba antis, Jeová kria-nu ku un kapasidadi spesial. Enbóra nu gosta di resebe kuzas, nu ta ser más filís óras ki nu ta da. Nu ta xinti sábi óras ki nu ta pode djuda nos irmons ku irmans. I nu ta xinti kontenti óras ki es ta mostra gratidon. Má, ô es mostra gratidon ô nau, nu ta xinti kontenti pamodi nu faze kel ki é dretu. Nunka ka bu skese ma ka ta inporta kuzê ki bu da, ‘Jeová pode da-u mutu más di ki kel-la.’ (2 Cró. 25:9) Nton nunka bu ka ta konsigi da otus algen más di ki kel ki Jeová ta pode da-u! I ka ten alegria más grandi di ki resebe rekonpensa di Jeová. Nu sta disididu na kontinua ta imita nos Pai na séu ki gosta di da.