Imajina un pai ta pâpia ku se fidju di 7 anu. El ta fla: “Dja ten txeu ténpu ki Deus faze Téra i tudu kuza na el. El faze sól, lua i strélas. Dipôs di para i pensa un bokadinhu, kel mininu ta pergunta: “Papá, ken ki faze Deus?”

Kel pai ta responde: “Ningen ka faze Deus. Sénpri el izisti.” Na kel momentu, kel mininu ta fika kontenti ku kel respósta sinplis. Má sima el ta ba ta kria el ta kontinua ta pensa na kel pergunta. El ka ta konsigi ntende modi ki un algen ka tevi komésu, dja ki ti séu ku Téra tevi un komésu. El ta pergunta: “Di undi ki Deus ben?”

Kal ki é respósta di Bíblia? Na verdadi, Bíblia ta da kel mésmu respósta ki kel pai da na izénplu ki dja nu odja. Muizés skrebe: ‘Ó Jeová, antis di montis nase ô di bu faze Téra i txon ki ta da kumida, désdi sénpri i pa tudu ténpu, abo é Deus.’ (Salmo 90:1, 2) Proféta Izaías tanbê fla: ‘Nton, bu ka sabe? Nton, bu ka obi? Jeová, kel Kriador di kes párti más lonji di Téra, é Deus pa tudu ténpu’! (Isaías 40:28) Tanbê karta di Judas ta fla ma Deus ta izisti ‘désdi tudu ténpu’. — Judas 25.

Kes testu li ta mostra ma Deus é ‘Rei pa tudu ténpu’, sima apóstlu Polu skrebe. (1 Timóteo 1:17) Kuzê ki kel-li siginifika? Kel-li krê fla ma Deus sénpri izisti, ka ta nporta kantu ténpu pa tras nu ta konsigi imajina. Sénpri el ta kontinua ta izisti. (Apocalipse 1:8) Pur isu, pa el ser Tudu-Poderozu el ten ki izisti pa tudu ténpu.

Pamodi ki kel ideia li é difísil pa nu ntende? Pamodi dja ki nos vida é kurtu nu ka ta odja ténpu di mésmu manera ki Jeová. Jeová sénpri izisti, pur isu mil anu é sima un dia pa el. (2 Pedro 3:8) Pur izénplu, un kafanhotu ki ta vive sô uns 50 dia dipôs ki el kria, el ta konsigi ntende modi ki nu ta konsigi vive 70 ô 80 anu? Kel-li é un kuza difísil. É interesanti ki Bíblia ta fla ma konparadu ku nos Grandiozu Kriador anos é sima kafanhotu. Ti nos kapasidadi di rasusina é ka nada konparadu ku el. (Isaías 40:22; 55:8, 9) Pur isu, nu ka ta fika dimiradu óras ki nu ka ta konsigi ntende dretu alguns kuza sobri Jeová.

Ideia ma ten un Deus ki sénpri izisti ta faze sentidu, nbóra é difísil ntende. Si ten un algen ki faze Deus, nton é kel algen ki ta sérba Kriador. Má, sima Bíblia ta splika é Jeová ki ‘kria tudu kuza’. (Apocalipse 4:11) Tanbê nu sabe ma séu ku Téra tevi un komésu. (Génesis 1:1, 2) Modi ki es parse? Kel Kriador tinha ki izisti antis di es. Kel Kriador li tanbê ta izistiba antis di ómi, ô di Fidju unijénitu di Deus i anjus. (Jó 38:4, 7; Colossenses 1:15) Nton é klaru ki Deus dja izistiba el sô, antis di el kumesa ta faze kuzas.

Pur isu, ningen ka podia kriaba el pamodi é sô el ki ta izistiba. Séu ku Téra i anos ta prova ma ten un Deus ki sénpri izisti. Tinha ki ten un Kriador ki sénpri izisti pa poi séu ku Téra ta movimenta i pa faze leis ki ta kontrola-s. Sô el ki ta pode daba vida pa tudu kuzas. — Jó 33:4.