N nase na un zóna di Saxônia, ki ta fikaba na Repúblika Demokrátika di Alimanha. Na nos kaza tinha un anbienti sábi di amor i karinhu. Nha mai ku nha pai da-m un bon idukason. Repúblika Demokrátika di Alimanha éra un país kumunista, pur isu txeu algen na Saxônia ka ta preokupaba ku relijion. I N ka ta kriditaba ma Deus ta izistiba. Ti nhas 18 anu tevi dôs kuza ki influensia nha vida txeu: Kumunismu i kel ideia ma Deus ka izisti.

Pamodi ki kumunismu ta txomaba mi atenson? Pamodi N ta gostaba di kel ideia ma tudu algen é igual. Tanbê, N ta atxaba ma es debe dividiba tudu kuza material di manera justu, asi ningen ka ta fikaba póbri dimás nen riku dimás. Nton N bira ta djuda un organizason di jóvens ki éra kumunista. Kantu N tinha 14 anu, N pasa txeu ténpu ta trabadja na un prujétu pa rekupera papel pa ser uzadu otu bês, asi pa djuda naturéza. Autoridadis di sidadi di Aue na undi ki N ta moraba fika txeu kontenti ku nha trabadju ki es da-m un prémiu. Nbóra inda N staba jóven, N konxe txeu pulítiku kumunista inportanti. N ta atxaba ma N staba na kaminhu sértu i ma N ta tinha un bon futuru.

Má dirapenti tudu kuza muda. Na 1989 muru di Berlin kai i txeu govérnu kumunista na Europa tanbê kaba. N tevi diziluzon un tras di kel otu. Pamodi dipôs N diskubri ma govérnu di nha país ta fazeba txeu injustisa. Pur izénplu, ken ki ka ta apoiaba kumunismu ka ta tinha mésmu direitu ki otus ta tinha. N ta fikaba ta pensa, pamodi ki es ta faze si? Kumunistas ka ta fla ma tudu algen é igual? Nton kumunismu é sô iluzon? Pamodi kel-li N fika txeu preokupadu.

Pur isu N disidi konsentra na múzika i na pinta. Na kel ténpu N ta studaba na un skóla di múzika, i N krê kontinuaba ta studa múzika na universidadi. Nha sonhu éra trabadja na múzika i arti. N kaba pa bandona tudu kes prinsípiu ki N inxinadu kantu mi éra mininu. Divirti bira kuza más inportanti pa mi, i kel-li ta inkluiba ranja txeu namorada omésmu ténpu. Má nen múzika, nen pinta, nen kel vida sen régra ki N ta lebaba ka inpidi-m di xinti medu di futuru. Ti mésmu nhas pintura ta mostraba medu ki N ta xintiba. Nton N ta pensaba, kuzê ki sta ta spera-m na futuru? Kal ki é obijetivu di vida?

Kantu ki N atxa respósta pa nhas pergunta, N fika dimiradu. Un dia mi ku nhas koléga na skóla, staba ta pâpia sobri modi ki futuru ta sérba. Un di kes koléga txomaba Mandy * i el éra Tistimunha di Jeová. Kel dia el da-m bon konsedju. El fla-m, “Andreas si bu krê atxa respósta pa perguntas ki bu ten sobri vida i futuru, bu ten ki djobe dretu kuzê ki Bíblia ta fla.”

N ka kridita na kuzê ki el fla-m, ma simé N disidi odja kuzê ki Bíblia ta flaba. Mandy mostra-m kapítlu 2 di Daniel, i N fika dimiradu ku kuzê ki N lé. Kel profesia li ta papiaba sobri txeu poténsia na mundu interu, ki ta tinha grandi influensia ti nos ténpu. Mandy mostra-m otus profesia di Bíblia ki ta pâpia sobri nos futuru. Ti ki enfin N atxa respósta pa nhas pergunta! Má ken ki skrebe kes profesia li, i kenha ki pode sabe futuru ku tudu sertéza? Má Deus izisti mê?

Pamodi Mandy N konxe Horst ku Angelika, ki é un kazal di Tistimunhas di Jeová i es djuda-m ntende Palavra di Deus midjór. Na poku ténpu N odja ma Tistimunhas di Jeová é úniku relijion ki ta uza i ki ta djuda pesoas konxe nómi di Deus, Jeová. (Salmo 83:18; Mateus 6:9 ) N prende ma Jeová Deus ta da-nu speransa di vive pa tudu ténpu na paraízu na Téra. Salmo 37:9 ta fla: ‘Kes ki ta spéra na Jeová ta ben toma kónta di Téra.’ N fika kontenti pamodi kel speransa li é pa tudu algen ki ta sforsa pa vive di akordu ku leis di Deus sima sta na Bíblia.

Nton, N sforsa txeu pa-m vive di akordu ku kel ki Bíblia ta fla. N tevi ki prende ser umildi dja ki fama na múzika i na pinta, dexa-m txeu orgulhozu. Tanbê, ka foi fásil dexa pa trás kes kuza mariadu ki N ta fazeba. N ta agradese Jeová pamodi el ta mostra paxénxa, mizerikórdia, i el ta ntende óras ki algen ta sforsa pa faze kel ki Bíblia ta inxina!

Ti 18 anu kumunismu i kel ideia ma Deus ka izisti influensia-m nha manera di pensa, ma dipôs Bíblia muda nha vida. Kuza ki N prende djuda-m ka xinti medu di futuru i djuda-m ten un obijetivu na vida. Na 1993, N batiza i N bira Tistimunha di Jeová, i na anu 2000 N kaza ku un irman zeloza ki txoma Tabitha, nu ta pasa txeu ténpu ta djuda otus konxe Bíblia. Txeu algen ki nu ta nkontra ku es é influensiadu pa kes mésmu kuza ki ta influensiaba mi, ki é kumunismu i kel ideia ma Deus ka izisti. N ta xinti txeu kontenti óras ki N ta djuda-s konxe Jeová.

Kantu N kumesa ta studa Bíblia ku Tistimunhas di Jeová, nha mai ku nha pai fika txeu diziludidu. Má ku ténpu es da kónta, ma studa Bíblia muda nha vida pa midjór. Gósi N sta kontenti pamodi es sta ta lé Bíblia i es sta ta sisti runion ku Tistimunhas di Jeová.

Mi ku Tabitha nu ten un kazamentu filís, pamodi nu ta sforsa pa sigi kes konsedju ki Bíblia ta da pa kes algen ki é kazadu. Pur izénplu, Bíblia ta fla ma maridu ku mudjer debe ser fiel pa kunpanheru i kel konsedju li sta ta djuda nos kazamentu ser más fórti. — Hebreus 13:4.

Gósi N ka ta xinti medu di futuru más. N ta xinti ma N ta faze párti di un família di Tistimunhas di Jeová na mundu interu, un família ki ten pas i union di verdadi. Na es família nu ta trata tudu algen igual. É kel-li ki N staba ta djobe duránti tudu nha vida.