Tistimunhas di Jeová ta faze un trabadju inportanti pa djuda pesoas na más di 200 país. Má é sô uns 35 di kes país li ki ta resebe kontribuisons di kongregasons ki ta txiga pa paga tudu dispéza di organizason na ses país. Nton, modi ki kes otu país ta konsigi paga ses dispéza?

 Grupu Enkaregadu di Óbra ta analiza trabadju i nisisidadi spritual di Tistimunhas di Jeová na mundu interu. Dipôs, es ta faze planu ku kuidadu pa djobe modi ki kes kontribuison ta uzadu di midjór manera. Si un filial ta resebe más kontribuison di ki kel ki el ta meste pa faze tudu ses trabadju, nton kel otu párti di kontribuison ta sirbi pa djuda kes otu país ki ka ta resebe kontribuison ki ta txiga-s. Asi, nu ta imita izénplu di kes kriston na ténpu di apóstlus, ki ta djudaba kunpanheru ‘pa tudu algen pode fikaba igual’. (2 Coríntios 8:14) Kes kriston ki tinha más txeu, djuda kes ki tinha más poku.

 Modi ki kes irmon ki ta resebe ajuda di kes otu filial ta xinti? Pur izénplu, na Tanzánia, undi más di metadi di algen ta vive ku ménus di 200 skudu pur dia, kes kontribuison li uzadu pa konpo Salon di Reinu di kongregason Mafinga. Kel kongregason skrebe: “Désdi ki konpodu Salon, mutu más algen kumesa ta sisti runion. Nu ta agradese organizason di Jeová txeu i tanbê kes irmon na mundu interu pamodi ajuda ki es da-nu pa ten un lugar di adorason bunitu si.”

 Alguns irmon na Sri Lanka fika sen kumida pamodi duénsa di COVID-19. Un di es é irman Imara Fernando i se fidju pikinoti ki txoma Enos. Má, pamodi kontribuison di irmons di otus país, es resebe kel ajuda ki es meste. Es faze un karton i es skrebe na el: “Nu ta agradese kes irmon ki mostra-nu amor duránti es ténpu difísil li. Nu sta txeu kontenti pamodi nu ta faze párti di kel família li i nu ta kontinua ta ora pa Jeová djuda tudu nos irmons duránti es ténpu di fin.”

 Ka ta nporta undi ki nos irmons ô irmans ta mora, sénpri es ta sta dispostu pa djuda ku kel ki es ten. Pur izénplu, Enos faze un kaxa di kontribuison pikinoti pa el poi dinheru tanbê pa djuda kes família ki sta ta meste. Un irman ki txoma Guadalupe Álvarez mostra kel mésmu atitudi. El ta mora na un stadu di Méxiku undi txeu algen ka ta resebe nen kel vensimentu más poku ki lei ta manda ô otus ka ten ninhun vensimentu na fin di mês. Má simé, el ta faze kel kontribuison ki el ta pode. El skrebe: “N ta agradese Jeová txeu pamodi se bondadi i se amor lial. N sabe ma nhas kontribuison ta djunta ku di otus algen i ta sirbi pa djuda nhas irmons ki sta pasa pa nisisidadi.”

 Kes filial ki ta manda dinheru pa kes país ki ten nisisidadi ta fika kontenti di faze kel-li. Pur izénplu Anthony Carvalho, ki ta sirbi na Kumison di Filial na Brazil fla: “Pamodi kel apoiu li, óbra na Brazil omenta txeu. Gósi nos situason midjora i nu ten priviléjiu di djuda otus país. Nos irmons ta nkara nos trabadju di pregason sima un kuza ki ta fazedu na mundu interu i es sta ta mostra ma es é disiplus di Jizus ki gosta di faze sakrifisiu pa djuda ku kel ki es ten.”

 Modi ki Tistimunhas di Jeová pode djuda ses irmon ku irmans ki sta pasa nisisidadi? Es ka ta manda dinheru pa filial di otu país, má es ta faze kontribuison pa trabadju ki ta fazedu na mundu interu. Kel kontribuison li pode fazedu através di kaxas di kontribuison pa nos “Óbra na mundu interu” ô na donate.mt1130.com. Tudu kontribuison ki ta fazedu ten txeu valor!