Un bês pa anu, Tistimunhas di Jeová i milhons di algen ki es ta konvida na mundu interu ta djunta pa komemora mórti di Jizus, sima el manda. (Lukas 22:19) Kel komemorason li ta djuda-nu intende valor di kuzê ki Jizus faze kantu el da se vida pa tudu algen. Tanbê, el ta djuda-nu odja modi ki sakrifisiu di Jizus ta djuda-nu oji i na futuru. — Juan 3:16.

 Ô bu sisti ô bu ka sisti komemorason es anu, modi ki sakrifisiu di Jizus pode djuda-u? Jizus inxina dôs kuza inportanti ki nu debe faze:

1.  1. Prende sobri Deus i Jizus. Jizus faze un orason pa se pai na séu i el fla: “Pa ganha vida pa tudu ténpu, es meste konxe-u abo, kel úniku Deus verdaderu, i tanbê kel ki bu manda, Jizus Kristu.” — Juan 17:3.

2.  2. Faze sima bu prende. Jizus mostra ma é inportanti nu aplika kes kuza ki el inxina na nos vida. Pur izénplu, na fin di kel diskursu famozu ki el faze na un monti, el ilojia kes algen ki ta “obi [se] palavra i ki ta faze sima [el] fla”. (Lukas 6:46-48) Tanbê na un otu okazion, el fla: “Si nhos sabe kes kuza li, nhos ta ser filís si nhos faze-s.” — Juan 13:17.

 Bu ta gostaba di prende más sobri Deus i Jizus? Bu krê bons konsedju di modi ki bu pode aplika kuzê ki bu prende? Odja alguns kuza ki pode djuda-u.

 Nos studu di Bíblia ki é di grasa dja djuda txeu algen prende kuzê ki Bíblia ta fla i faze sima es prende.

•   Pa sabe más sobri nos studu di Bíblia, bai na jw.org i djobe na kel párti Studa Bíblia ku ajuda di un algen.

•   Odja vídiu Modi ki é un studu di Bíblia pa sabe modi ki Tistimunhas di Jeová ta studa Bíblia ku algen.

 Dôs bês pa simana, Tistimunhas di Jeová ta djunta na ses lugar di adorason ki ta txomadu di Salon di Reinu. Na kes runion li, nu ta studa Bíblia i nu ta prende modi ki nu ta aplika kuzê ki el ta inxina na nos dia-dia.

 Kalker algen pode sisti runion. Sikrê é ka Tistimunha di Jeová. Di akordu ku situason di un lugar, bu pode bai sisti runion na un Salon di Reinu ô através di xamada ku vídiu.

•   Odja vídiu Kuzê ki ta kontise na un Salon di Reinu? pa sabe modi ki kes runion ta fazedu.

•   Bai na jw.org, na párti Runions di Tistimunhas di Jeová pa bu atxa un runion más pértu di bo.

 Txeu artigu i vídius na jw.org pode djuda-u prende más sobri kes kuza ki Jizus inxina i valor di se sakrifisiu.

 Pur izénplu, pa bu prende modi ki mórti di un ómi pode djuda milhons di algen, lé artigus “Modi ki Jizus ta salva-nu?” i “Porque Jesus sofreu e morreu?” ô odja vídiu Pamodi ki Jizus móre?