Na anu di 2024 ta ben ten más txeu ileison ki dja kontise na mundu interu. Má, txeu algen sta ta perde kunfiansa na pulítikus.

•   Maioria di merkanus ki nu pâpia ku es fla ma “maioria di pulítikus ta pensa sô na ses kabésa” envês di djuda pesoas. a — Séntru di piskiza di Pew, 19 di setenbru di 2023.

 Txeu jóven tanbê sta perde kunfiansa na pulítikus.

•   “Jóvens sta más preokupadu na ranja solusons pa prublémas inportanti, má txeu ki nu pâpia ku es fla ma pulítikus ka sta ta atxa solusons.” — The New York Times, 29 di janeru di 2024.

•   “Sima un piskiza fla, jóvens ta kunfia más na kes algen ki ta poi vídius na internet i ki ten txeu sigidor na redis sosial di ki na pulítikus.” — Notísias di Koreia, 22 di janeru di 2024.

 Nu pode kunfia ma pulítikus ta da-nu un futuru midjór? Na kenha ki nu pode kunfia?

 Pesoas ten razon pa toma kuidadu na kenha ki es ta kunfia na el. Bíblia ta fla ma ‘algen nosenti ta kridita na tudu palavra, má ken ki é prudenti ta pensa antis di el da kada pasu.’ — Provérbios 14:15.

•   Pa bu atxa ajuda pa bu sabe kal informason ki bu resebe é verdaderu ô falsu, lé artigu “Proteje bu kabésa di informasons falsu”.

 Alén di kel-li, mésmu kes pulítiku más onéstu i ki krê djuda, ka ta pode faze tudu ki es ta gostaba. Pur isu, Bíblia ta aviza-nu:

•   ‘Ka nhos kunfia na kes ómi ki é líder; ninhun ómi ka ta pode salva nhos.’ — Salmo 146:3, Good News Translation.

 Bíblia ta splika ma Deus skodje un líder ki ten txeu kapasidadi i ki nu pode kunfia na el, ki é Jizus Kristu. (Lukas 1:32, 33) Jizus é Rei di Reinu di Deus, ki é un govérnu ki ta governa la di séu. — Mateus 6:10.

•   Prende pamodi ki bu pode kunfia na Jizus i kuzê ki el ta ben faze pa rezolve prublémas ki nu ta infrenta. Lé artigus “Ken ki é Rei di Reinu di Deus?” i “Kuzê ki Reinu di Deus ta ben faze?”.