•   Bu gosta di faze kuzas sen planu; má bu maridu gosta di faze planu i organiza tudu kuza.

•   Abo é kétu i bu gosta di sta na bu lugar; má bu mudjer é más abértu i el gosta di sta meiu di otus algen.

 Bu maridu ô bu mudjer ten un manera di ser ki ta irita-u? Si bu konsentra na kel-li el pode prujudika bu kazamentu. É pur isu, ki Bíblia ta fla: ‘Kel ki ta kontinua ta pâpia sobri un asuntu ta sipara bons amigu.’ — Provérbios 17:9.

 Má, ka bu dexa kel manera di ser ki ta irita-u kria prublémas na bu kazamentu. Envês di kel-li, talvês bu pode prende odja kel manera di ser li di manera puzitivu.

Na kel artigu li

•  Odja kel manera di ser ki ta irita-u di manera puzitivu

•  Kuzê ki alguns maridu ku mudjer ta fla

•  Perguntas ki pode djuda nhos pâpia ku kunpanheru

 Kel manera di ser di bu maridu ô di bu mudjer ki ta irita-u pode sta ligadu ku un kualidadi ki bu gosta txeu. Nu ben odja três izénplu:

 “Nha maridu ta kustuma faze kuzas divagar. El ta dura ta faze kuzas ô ta konpo óras ki nu meste sai. Má kel manera di ser li ta bira-l un algen ki ten txeu paxénxa i el ten txeu paxénxa ti ku mi tanbê. Alvês N ta fika iritadu, pamodi el é divagar, má tanbê kel-li é un kuza ki N gosta na el.” — Chelsea.

 “Nha mudjer ta faze tudu kuza di manera organizadu; el ta krê tene tudu kuza kontroladu. Kel-li pode irita algen. Má pamodi el ta sta sienti na tudu kuza, kel-li krê fla ma el ta sta sénpri priparadu.” — Christopher.

 “Nha maridu ka ta fadiga ku nada i kel-li ta dexa-m xatiadu. Má kel manera di ser li di faze kuzas sen fadiga é un di kes primeru kualidadi ki pô-m ta gosta di el. N ta dimira se kapasidadi di kontinua kalmu na situasons di stress.” — Danielle.

 Chelsea, Christopher i Danielle prende ma kes pontu fórti i kes pontu fraku di ses maridu ô mudjer txeu bês é manera diferenti di mostra mésmu kualidadi. Si bu ten un muéda bu ka ta konsigi fika sô ku un ladu di kel muéda. Di mésmu manera, bu ka ta konsigi kaba ku kel ladu mariadu di un manera di ser sen perde kel ladu bon.

 É klaru ki alguns manera di ser ka ten un ladu puzitivu. Pur izénplu, Bíblia ta fla ma alguns algen ‘ta xatia faxi’. (Provérbios 29:22) Na kel situason li, un algen debe sforsa txeu pa kaba ku ‘tudu tipu di rankor, fúria, raiba, gritaria i palavras ki ta ofende’. a — Efésios 4:31.

 Má óras ki un manera di ser ta irita-u, sigi kel konsedju li ki sta na Bíblia: ‘Nhos kontinua ta suporta kunpanheru, sikrê algen tene algun razon di kexa kóntra kel otu.’ — Colossenses 3:13.

 Alén di kel-li, tenta atxa un kuza dretu na kel manera di ser, un kuza ki talvês ti pô-u ta gosta di kel algen na komésu. Un maridu ki txoma Joseph, fla: “Konsentra na un manera di ser ki ta irita-u é sima djobe sô pa un ladu di un diamanti sen da valor pa se brilhu.”

 Primeru, responde bo sô kes pergunta ki sta dibaxu. Dipôs, nhos pâpia ku kunpanheru sobri kes respósta ki nhos da.

•   Bu maridu ô bu mudjer ten algun manera di ser ki bu ta atxa ma sta ta traze nhos prubléma? Si ten, é kuzê i pamodi ki bu gosta di el?

•   El é un manera di ser mariadu ô sô el ta dexa-u iritadu?

•   Ten algun kuza puzitivu na kel manera di ser? Si ten, é kuzê?