Kuzê ki N ten ki faze pa N bira un Tistimunha di Jeová?

TOKA

Na Mateus 28:19, 20 Jizus fla kes kuza ki un algen meste faze pa el bira un Tistimunha di Jeová. Kel testu li ta mostra kuzê ki un algen meste faze pa bira un disiplu di Kristu, ki ta nvolve pâpia ô da tistimunhu sobri Jeová.

Primeru pasu: Prende kuzê ki Bíblia ta inxina. Jizus inxina se sigidoris pa ‘faze disiplus [i] inxina-s’. (Mateus 28:19, 20) Palavra ki traduzidu pa ‘disiplu’ siginifika ‘un algen ki sta prende’. Bíblia ten kes informason, prinsipalmenti kes kuza ki Jizus inxina, ki bu meste pa bu ser filís i ten un vida sábi. (2 Timóteo 3:16, 17) Nu ta fika kontenti di djuda-u prende kuzê ki Bíblia ta inxina através di un prugrama di studu di Bíblia di grasa. — Mateus 10:7, 8; 1 Tessalonicenses 2:13.

Sugundu pasu: Faze sima bu ta prende. Jizus fla ma kes ki ta prende tanbê debe ‘obidese tudu kuza ki [el] manda-s’. (Mateus 28:20) Kel-li krê fla ma na bu studu di Bíblia bu debe faze más di ki sô prende. Bu meste sforsa pa muda bu manera di pensa i di konporta. (Atos 10:42; Efésios 4:22-29; Hebreus 10:24, 25) Kes algen ki ta obi ku Jizus, ta disidi didika ses vida pa Jeová Deus pamodi es skodje sigi Jizus di livri vontadi. — Mateus 16:24.

Tirseru pasu: Batiza. (Mateus 28:19) Bíblia ta konpara batismu ku mórti. (Konpara ku Romanos 6:2-4.) Óras ki algen batiza é sima si el móre pa kel vida ki el tinha antis i el kumesa un vida novu. Tanbê, batismu ta mostra klaru pa otus algen ma dja bu da kes dôs primeru pasu ki Jizus fla i ma bu krê sirbi Deus ku un konsénsia linpu. — Hebreus 9:14; 1 Pedro 3:21.

Modi ki N ta sabe si N sta priparadu pa N batiza?

Pâpia ku ansions di kongregason. Es ta pâpia ku bo pa es ten sertéza ma bu ta ntende kuzê ki Bíblia ta inxina, ma bu sta ta faze sima bu prende i ma dja bu didika bu vida pa Deus di livri vontadi. — Atos 20:28; 1 Pedro 5:1-3.

Fidjus di Tistimunhas di Jeová meste faze mésmu kuza tanbê?

Sin. Nu ta kria nos fidjus ‘na disiplina i na instruson di Jeová’, sima Bíblia ta manda. (Efésios 6:4) Má, sima es ta ba ta kria, es meste toma ses disizon di prende, seta i faze sima Bíblia ta inxina pa es pode sta kualifikadu pa batiza. (Romanos 12:2) Na verdadi, kada algen meste toma se própi disizon sobri adorason pa Deus. — Romanos 14:12; Gálatas 6:5.