Na Lumingu Yanuari 5, 2014, Serge Gérardin vandaka kusala nzietelo na bisi sambu na kukwenda na lukutakanu mosi ya nene ya Bambangi ya Yehowa pene-pene ya Paris, na France, ebuna yandi monaka kisumbula mosi ya nene. Yandi ke tuba nde: “Kaminio mosi tutaka kibaka mosi ya beton yina vandaka kutanina pont ebuna kaminio yina pumbukaka na zulu. Na nima, kaminio tutaka pont, pelaka tiya, mpi yo bwaka bapine na zulu.”

Serge me salaka kisalu ya kufwa tiya bamvula kuluta 40. Sambu yandi vandaka kapitene ya kimvuka ya bantu yina ke fwaka tiya, yandi salaka mambu kukonda kusukinina. Yandi ke tuba nde: “Ata beto vandaka na lweka yina ya nkaka, mu lombaka shofere na kutelemisa bisi, mpi mu kulumukaka, mu bakaka ntinu tii na kisika tiya vandaka kupela.” Serge waka bantu ke boka nde: “Gulusa mono! Gulusa mono!” Yandi ke tuba nde: “Mu lwataka kazaka ti kravate, mpi mu vandaka ve ti bisadilu yina lenda tanina mono. Kansi mutindu bantu vandaka kuboka songaka mu nde bo lenda guluka!”

Ntangu Serge vandaka kubaluka na bandambu yonso ya kaminio, yandi monaka muntu mosi mpi basisaka yandi. Serge ke tuba: “Yandi songaka mu nde bantu zole ya nkaka kele na kati ya kaminio. Na ntangu yina, bakamio mingi telemaka. Kansi, sambu tiya vandaka ngolo mingi, ata muntu mosi ve kukaka kupusana kisika yina.”

Bashofere mingi kwisaka ti bima yina bo ke fwilaka tiya. Serge twadisaka bo mpi bo sadilaka bima yonso sambu na kufwa tiya; bo fwaka yo sambu na ntangu fioti. Shofere ya kaminio yina vandaka kupela tiya vandaka me kangama na nsi ya kaminio. Yo yina Serge ti bantu ya nkaka yina telamaka, balulaka kaminio mpi bo basisaka yandi.

Serge ke tuba nde: “Na nima, tiya pelaka diaka!” Kansi muntu ya nkaka vandaka me kangama na mukaba ya kiti ya kaminio. Muntu ya nkaka yina ke fwaka tiya kwisaka, yandi vandaka me lwata bilele ya bantu yina ke tambusaka bamoto. “Mu songaka yandi nde kaminio yai ya mvimba ke zola kupela tiya, yo yina beto bakaka lukanu ya kubenda muntu yina na maboko sambu na kubasisa yandi, mpi beto basisaka yandi.” Ntangu fioti na nima, kaminio yina pelaka tiya.

Ntangu bantu yina ke salaka kisalu ya kufwa tiya mpi minganga kwisaka, bo bakaka bantu yina piaka tiya mpi bo fwaka tiya. Bo sansaka Serge sambu yandi lwalaka mpi sambu na bisika yina yandi piaka tiya na maboko. Ntangu yandi mataka na bisi sambu na kukwenda na lukutakanu ya nene, bantu mingi landaka yandi sambu na kupesa yandi matondo.

Serge kele na kiese mutindu yandi vandaka pana sambu na kusadisa bantu. Yandi ke tuba nde: “Mu monaka nde mu kele na mukumba ya nene na ntwala ya Nzambi na mono Yehowa sambu na bantu yina. Mu ke na kiese sambu mu sadisaka na kugulusa bantu.”