Kana nge kele Mbangi ya Yehowa, keti bapolisie lenda kwenda kufidisa nge ntangu nge ke longa nsangu ya mbote nzo na nzo? Yina mambu kuminaka Joseph na Micronésie na 2017. Yandi ti bampangi tatu ya Bambangi ya Yehowa vandaka na kampanie mosi ya sipesiali na bisanga yina kele ntama na Micronésie.

 Bampangi yai iya kumaka na kisanga mosi ya fioti. Bantu kiteso ya 600 vandaka kuzinga na kisanga yina. Mfumu ya ntete ya mbanza muntu kwendaka kuyamba bo na dibungu. Joseph ke tuba mambu yina salamaka na nima: “Mfumu ya ntete ya mbanza songaka beto nde kaminio mosi ya bapolisie lenda nata beto na banzo yonso. Dibanza na yandi ya mbote yitukisaka beto kibeni. Kansi na luzitu yonso, beto buyaka dibanza yina. Beto vandaka kuzola kukwenda kutala bantu mutindu beto ke salaka yo ntangu beto ke kwendaka kulonga nzo na nzo.”

 Bampangi yina iya kwendaka na makulu mpi lukanu na bo vandaka ya kulonga bantu mingi. Bo ke tuba nde: “Bantu vandaka kuyamba beto mbote mpi bo vandaka kusepela ti nsangu. Yo yina na konso nzo beto bakaka ntangu mingi kuluta ntangu yina beto yindulaka.”

 Na ntangu mosi buna kaka kilumbu yina, kaminio ya bapolisie lutaka mbala zole na ntwala ya Joseph. Na mbala ya tatu, bapolisie telamaka mpi bo lombaka yandi kana bo lenda nata yandi na banzo yina yandi me longa ntete ve. Joseph ke yibuka nde: “Mono tubaka nde ve. Kansi mbala yai, bo tubaka nde ‘nge kele ve ti ntangu mingi, yo yina beto ke zola kunata nge na banzo yina me bikala.’ Mbala yai, mono lendaka ve kubuya dibanza na bo, sambu mono bikalaka diaka ti bantu mingi ya kutala. Kana beto kuma pene-pene ya nzo mosi, bapolisie vandaka kupesa zina ya dibuta yina. Bo songaka mono nde kana mono ke kokula kansi ata muntu mosi ve ke ndima, bo ta bula klakson sambu bantu ya nzo yina kuzaba nde muntu kele na nganda.”

 “Na nzila ya lusadisu na bo, beto kukaka kuwenda kulonga bantu ya banzo yonso kilumbu yina. Beto pesaka bantu mikanda mingi mpi beto yidikaka mambu sambu beto vutuka kutala bantu yina sepelaka ti nsangu.”

 Bapolisie songaka Joseph nde “bo sepelaka mingi mutindu bo mpi pesaka maboko sambu na kulonga nsangu ya mbote.” Ntangu nkokila bwaka, bampangi yai vutukaka mpi bapolisie pesaka mbote ya nsuka na dibungu. Bapolisie yango vandaka na kiese mpi bo simbaka mikanda ya ke tendulaka Biblia.