Ong-li ke zingaka na Bulgarie. Yandi kele Mbangi ya Yehowa. Yandi vandaka kulonguka Biblia ti Zlatka. Bakala ya Zlatka vandaka ve kulonguka Biblia. Ong-li ke tuba nde: “Ntangu beto vandaka kutubila luzingu na kati ya dibuta, mono monisaka yandi nde yo kele mfunu na kusongaka babakala mpi bana na beto nde beto ke zolaka bo. Zlatka talaka mono na mawa yonso; yandi songaka mono nde yandi me bikalaka ntete ve kusonga bakala na yandi ti mwana na yandi ya nkento ya bamvula uvwa nde yandi ke zolaka bo!”

 Zlatka tubaka nde: “Mono lenda sala yonso ya mono fwete sala sambu na bo, kansi mono ta kuka ve kutuba bangogo yina.” Yandi tubaka diaka nde: “Mama na mono me bikaka ve kusonga mono nde yandi ke zolaka mono, mpi nkaka na mono ya nkento me bikaka ve kusonga mama na mono nde yandi ke zolaka yandi.” Ong-li monisaka Zlatka na nzila ya Biblia nde Yehowa me songaka dezia Yezu na ndinga ya ngolo nde yandi ke zolaka yandi. (Matayo 3:17) Yandi siamisaka Zlatka na kusamba Yehowa sambu na diambu yina mpi na kubaka lukanu ya kusonga bakala mpi mwana na yandi ya nkento nde yandi ke zolaka bo.

 Ong-li ke tuba nde: “Na nima ya bilumbu zole, Zlatka songaka mono nde yandi sambaka Yehowa sambu yandi sadisa yandi. Ntangu bakala na yandi vutukaka na nzo, yandi songaka yandi nde yandi longukaka na Biblia nde yo kele kibeni mfunu nde nkento kuzitisa bakala na yandi mpi kuzola yandi. Na nima ya kupema mwa fioti, yandi songaka bakala na yandi nde yandi ke zolaka yandi mingi. Ntangu mwana na bo ya nkento vutukaka na nzo, Zlatka yambaka yandi mpi songaka yandi nde yandi ke zolaka yandi. Zlatka songaka mono nde: ‘Sesepi yai, mono ke kudiwa mbote. Bamvula yonso ya me luta, mono vandaka ve kukuka kutubila mutindu mono ke kudiwaka, kansi na nzila ya lusadisu ya Yehowa, mono me kuka kusonga bantu ya dibuta na mono nde mono ke zoloka bo.’

 Ong-li ke tuba diaka nde: “Mposo mosi na nima, mono kutanaka ti bakala ya Zlatka. Yandi songaka mono nde: “Bantu mingi me songa mono nde yo lombaka ve nde Zlatka kulonguka Biblia ti beno. Kansi ntembe kele ve nde malongi yina yandi ke longuka na Biblia ke sadisa dibuta na beto mingi. Beto me kuma ntangu yai banduku ya ngolo mpi beto kele na kiese.”