Komite ya filiale ya Malawi yidikaka mambu sambu bampangi kulanda balukutakanu ya dibundu na nzila ya batelevizio mpi ya baradio ya insi yai. Bantu mingi kibeni ke landa manaka yai katula bampangi na beto ya babakala mpi ya bankento. Insi Malawi kele ti Bambangi ya Yehowa kuluta 100 000. Kansi bantu yina ke tulaka manaka yai na radio mpi na televizio ke monisa nde na nsuka ya konso mposo, bamilio zole ya bantu ke landaka yo na televizio mpi bamilio nana ya bantu ke landaka yo na radio.

Kaka bonso na bansi mingi ya nkaka, bampangi na beto na Malawi ke kwenda diaka ve na Banzo ya Kimfumu sambu na kuzitisa nsiku ya leta mpi ya minganga yina ke tuba nde bantu kuvukana ve mingi kisika mosi sambu na maladi ya coronavirus. Bampangi ya kele na mabundu mpi ya ke salaka kisalu ya kulonga nsangu ya mbote kele ti makuki ya kulanda radio to ya kutala televizio. Yo ke monisa nde balukutakanu yai ya bo ke tula na radio mpi na televizio ke sadisa bampangi yina kele ve ti Internet to aplikasio yina ke sadisa na kusala balukutakanu na nzila ya video na kulanda balukutakanu ya dibundu.

Balukutakanu yango ya bo ke tula ke salama na Chichewa, ndinga yina bantu ya insi yai ke tubaka. Bo ke balulaka kaka na ntangu yango yina balukutakanu yai ya bo ke songaka na televizio na Ndinga ya Bidimbu ya Malawi. Katula diskure ya bantu yonso, na manaka ya balukutakanu ya bantu yonso ya nsuka ya mposo, bo ke songaka mpi bavideo na beto mpi bo ke tulaka badrame ya lutangu ya Biblia. Na nsuka ya manaka, bo ke siamisaka bantu yina ke talaka yo na televizio mpi bayina ke landaka yo na radio na kukota na site Internet jw.org sambu na kuzaba mambu ya nkaka na bandinga ya nkaka.

Manaka yai ya bo ke tula na radio mpi na televizio me sadisa bantu ya nkaka na kukatula bangindu ya mbi yina bo vandaka ti yo sambu na Bambangi ya Yehowa. Muntu mosi sonikaka nde: “Mono me landa badiskure na beno na radio na bamposo yai me katuka kuluta. Yo me pesa bamvutu ya pwelele na mambu ya luvunu yina bantu ke tubaka sambu na beno. Badiskure na beno kele ve bonso ya mabundu ya nkaka sambu yo ke simba kibeni ntima!” Muntu yina mpi dibuta na yandi me yantika kulonguka Biblia ti Bambangi ya Yehowa.

Augustine Semo ke salaka ti Biro Mosi ya Bansangu (bureau des relations publiques) na Malawi. Yandi ke tuba nde: “Manaka yai kele nzila mosi ya mbote yina ke sadisa bampangi na beto na kulanda kusambila Nzambi mutindu bo ke salaka yo. Yo me pesa mpi bantu mingi ya nkaka ya kele ve Bambangi ya Yehowa nzila ya kuzaba malongi na beto ya ke katukaka na Biblia. Ntangu beto ta vanda diaka ti dibaku ya kukutana na Banzo ya Kimfumu awa na Malawi, beto ke ndima nde beto ta mona bantu mingi ya mpa yina ta kwisa kuvukana ti beto.”

Beto kele na kiese mutindu beto me zaba nde bampangi na beto Bambangi ya Yehowa ya kele na Malawi mpi bantu ya nkaka ke landa kusambila Yehowa na ntangu yai ya mpasi. Yo ke sala nde beto landa kumonisa ntonda na “mpika ya kwikama,” yina ke sala yonso sambu na kulonga bantu yonso kieleka yina kele na Biblia.—Matayo 24:45.