MUTINDU YA KUBUYA KUMENGA BANTU YA NKAKA
2 | Kuvutula Ve Mbi na Mbi
Biblia Ke Tuba Nde:
“Beno vutula mbi sambu na mbi ata na muntu mosi ve. . . . Kana mpila kele, beno sala yonso sambu na kuzinga na ngemba ti bantu yonso. . . . Beno vutula ve mbi sambu na mbi, . . . sambu bo me sonikaka nde: Yehowa ke tuba nde: ‘“Mono muntu ke vutulaka mbi,” mono muntu ta pesa ndola.’”—BAROMA 12:17-19.
Mambu Yina Yo Ke Tendula:
Ata beto ke waka makasi kana muntu mosi me sadila beto diambu ya mbi, Nzambi ke zolaka ve nde beto vutula mbi na mbi. Kansi yandi ke songa beto na kuvingila sambu ntama mingi ve, yandi ta manisa mambu yonso ya kukonda lunungu.—Nkunga 37:7, 10.
Mambu ya Nge Lenda Sala:
Ntangu bantu ya kukonda kukuka ke vutulaka mbi na mbi, yo ke salaka nde kikalulu ya kumenga bantu ya nkaka kukuma diaka mingi. Yo yina, kana muntu mosi me sadila nge diambu ya mbi to me pesa nge mpasi, kuvutudila yandi ve mbi. Sosa kuyala mawi na nge mpi sala mambu na ngemba yonso. Bantangu ya nkaka yo ke vandaka mbote na kuvila diambu ya mbi yina bo me sadila beto. (Bingana 19:11) Kansi bantangu ya nkaka, yo ke vandaka mbote na kusosa kuyidika diambu ya mbi. Mu mbandu, kana babandi me sala nge mbi, nge lenda songa yo bapolisi to bamfumu ya nkaka.
Kuvutula mbi na mbi kele kudikota nsoki
Ebuna kana nge me mona nde yo kele ve mutindu ya mbote ya kuyidika makambu? To kana nge salaka yonso yina yo lombaka nde nge sala sambu na kuyidika mambu na ngemba yonso kansi yo simbaka ve? Kuvutula ve mbi na mbi. Sambu kusala mutindu yina ta kumisa diaka mambu mbi mingi mpenza. Buya kuvutula mbi na mbi. Nge lenda longuka mutindu ya kutula ntima nde Nzambi ta yidika mambu. Biblia ke tuba nde: “Tudila yandi ntima, ebuna yandi ta sadila nge mambu ya mbote.”—Nkunga 37:3-5.
Nge Lenda Sepela Mpi Ti
BIBLIA KE SOBAKA LUZINGU YA BANTU
Mono Zolaka Kunwanisa Kukonda Lunungu
Rafika kotaka na kimvuka mosi ya bantu yina vandaka kuzola kusoba mambu mpi yina vandaka kunwana sambu kukonda lunungu kuvanda diaka ve. Kansi yandi kwisaka kuzaba mambu yina Biblia ya ke tuba nde Kimfumu ya Nzambi ta tula ngemba mpi ta katula kukonda lunungu.
BIBLIA KE SOBAKA LUZINGU YA BANTU
Inki Ntangu Zola ya Kwikama Ta Nunga Kimbeni?
Yo lenda vanda mpasi na kukatula kikalulu ya kuvanda ti bangindu ya mbi sambu na bantu ya nkaka. Tala mutindu Muyuda ti muntu mosi ya Palestine nungaka diambu yina.
