DISOLO YINA KELE NA LUTITI YA ZULU
Ntangu Muntu ya Beto Ke Zolaka Me Fwa
“Bebe, Nzambi yandi mosi me zaba. . . . Kudila . . . ve.”
Bo zabisaka mambu yai na nkento mosi, zina na yandi Bebe, ntangu bo vandaka kuzika papa na yandi yina fwaka na aksida ya kamio.
Bebe vandaka kuzola papa na yandi mingi. Muntu yina zabisaka yandi mambu yango vandaka kuzola dibuta na bo mingi. Kansi Bebe monaka yo mbi, ata muntu yango vandaka ve ti ngindu ya mbi. Bebe vandaka kutuba mbala na mbala nde: “Lufwa ya papa vandaka ve diambu ya mbote.” Yo vandaka pwelele nde ntangu Bebe sonikaka mambu yai na mukanda mosi bamvula mingi na nima, yandi vandaka kaka kuwa mawa.
Mutindu Bebe bakisaka yo na nima, yo lenda baka ntangu mingi sambu mpasi yina lufwa ke nataka kumana, mingi-mingi kana beto vandaka kuzolana mingi ti muntu yina me fwa. Yo yina, Biblia ke binga lufwa nde “mbeni ya nsuka.” (1 Bakorinto 15:26) Kana muntu mosi ya beto vandaka kuzola me fwa, yo ke pesaka beto mpasi, mingi-mingi kana yandi me fwa na kintulumukina. Beto yonso ke waka mpasi kana muntu me fwa. Yo yina, yo kele ve diambu ya kuyituka kana beto ke mona nde beto ke kuka ve kukanga ntima na mpasi yina lufwa ke nataka.
Ziku nge me kudiyulaka nde: ‘Mpasi yina lufwa ke nataka lenda sala bilumbu ikwa sambu yo mana? Inki muntu lenda sala sambu na kukanga ntima na mpasi yina lufwa ke nataka? Inki mutindu mono lenda pesa kikesa na bantu ya nkaka yina me fwilaka? Keti kivuvu kele sambu na bantu ya beto ke zolaka yina me fwaka?’
Nge Lenda Sepela Mpi Ti
NZOZULU YA NKENGI
Keti Kudila Kele Mbi?
Inki beto lenda sala kana bantu ya nkaka ke mona bonso nde mutindu na beto ya kumonisa mawa ntangu muntu ya beto ke zolaka me fwa kele ya kuluta ndilu?
