Biblia me swaswana mpenza ti mikanda yonso ya ke tubilaka mambu ya mabundu. Katula Biblia, mukanda ya nkaka kele ve ya me sobaka luzingu ya bantu mingi na nsungi ya bamvula mingi. Kansi yo kele mpi mukanda yina bantu me longukaka mingi mpi me tubaka mambu ya mbi sambu na yo.

Mu mbandu, bantu ya nkaka ya mayele ke ndimaka ve nde Babiblia ya bubu yai kele bakopi ya masonama ya kisina yina beto lenda tudila ntima. Longi mosi ya mambu ya mabundu ke tuba nde: “Beto ke zaba mpenza ve kana beto me balulaka masonama ya kisina mbote-mbote. Beto kele kaka ti bakopi ya me fuluka ti bifu, mpi bakopi yango mingi bo sonikaka yo na nima ya bamvu-nkama mingi banda bo me sonikaka masonama ya kisina mpi yo me swaswana na mambu mingi.”

Bantu ya nkaka ke ndimaka ve nde Biblia ke tubaka kieleka sambu na mambu yina bo me longaka bo na mabundu na bo. Beto baka mbandu ya Faizal. Bantu ya dibuta na yandi yina kele ve Bakristu longaka yandi nde Biblia kele mukanda mosi ya santu, kansi bantu me sobaka yo. Yandi ke tuba nde: “Yo yina ntangu bantu vandaka kutubila mono mambu ya Biblia, mono vandaka kutudila bo ve ntima. Mono vandaka kuyindula nde bo kele ve ti Biblia ya kisina sambu yo me sobaka!”

Keti yo kele mfunu na kuzaba kana Biblia me sobaka to ve? Yindula nde nge ke zaba ve kana balusilu ya Biblia ya ke pesa kikesa na yina me tala bilumbu ke kwisa katukaka na masonama ya kisina to ve. Keti nge lenda tudila balusilu yango ntima? (Baroma 15:4) Keti nge lenda sadila minsiku ya Biblia sambu na kubaka balukanu ya mfunu na yina me tala kisalu, dibuta, to lusambu kana Babiblia ya bubu yai vandaka kaka bakopi ya me fulukaka ti bifu yina bantu me tulaka?

Ata mikanda ya kisina ya Biblia me vilaka, beto lenda tala bakopi ya ntama mpi bamaniskri mingi ya Biblia. Inki mutindu baminiskri yango me bebaka ve mpi me vilaka ve ata bantu sosaka kuvidisa yo mpi kusoba masonama na yo? Sambu bamaniskri yango me gulukaka, inki mutindu yo ke sadisa nge na kutula ntima nde Babiblia ya beto kele na yo bubu yai ke tubaka kieleka? Beto tadila bamvutu na bangiufula yai na disolo yina me landa ya ke tubila mutindu Biblia me gulukaka.