NSIKU ya Moize vandaka kupesa bantu nswa ya kudia ndefi bantangu ya nkaka. Mu mbandu, kutuba nde “na zina Nzambi” to “na zina Yehowa.” Kansi na bilumbu ya Yezu, Bayuda kumaka kudia ndefi na mambu ya mpamba-mpamba. Bo vandaka kusala mpidina sambu bantu kundima mambu yina bo ke tuba, kansi Yezu vandaka kusepela ve nde bantu kudia ndefi mutindu yina. Yandi tubaka nde: “Bika nde ngogo na beno ‘Ee’ kutendula kaka ee, ‘Ve’ na beno, ve.”—Mat. 5:33-37; 23:16-22.

Mukanda mosi (Dictionnaire théologique du Nouveau Testament) ke tuba nde mukanda ya bansiku ya Bayuda (Talmud) ke monisa nde Bayuda vandaka kudia ndefi mingi sambu na kundimisa mambu yina bo ke tuba. Bo vandaka kusala mutindu yina sambu Talmud tendulaka pwelele ndefi yina muntu fwete zitisa mpi yina yandi lenda buya kuzitisa.

Bonso Yezu, bantu ya nkaka mpi vandaka kusepela ve ti kikalulu yai ya Bayuda. Mu mbandu, kadibundu mosi ya Bayuda vandaka kubuyisa kudia ndefi. Bayuda yai vandaka kumona nde kudia ndefi vandaka mbi mpenza kuluta kuta luvunu. Bo vandaka kutuba nde kana muntu ke dia ndefi kaka sambu bantu kundima mambu yina yandi ke tuba, yandi kele muntu ya luvunu. Mukanda ya nkaka ya Bayuda ke tuba nde: “Kudia ndefi kele kikalulu ya bantu yina ke zitisaka ve bansiku.” Yezu vandaka kubuyisa kudia ndefi na mambu ya kukonda mfunu. Muntu ya ke tubaka masonga ntangu yonso kele ve ti mfunu ya kudia ndefi sambu bantu kundima mambu yina yandi ke tuba.