NA NSI ya Nsiku ya Moize, Yehowa vandaka kundima bimenga ya mayembe mpi ya bapizio. Bansiku vandaka kutubila bandeke yina zole na yina me tala bimenga mpi muntu lendaka kupesa mayembe na kisika ya bapizio to bapizio na kisika ya mayembe. (Levi 1:14; 12:8; 14:30) Sambu na nki yo vandaka mbote? Sambu mayembe vandaka kumonana ve ntangu yonso. Sambu na nki?

Mayembe kele bandeke yina ke zingaka na Izraele na bangonda yina ntangu ke vandaka ngolo. Kansi konso mvula, na Octobre, yo ke kwendaka na sudi na bansi yina ntangu ke vandaka ngolo mpi na nsungi ya mvula yo ke vutukaka na Izraele. (Salomo 2:11, 12; Yer. 8:7) Yo yina, na Izraele yo vandaka mpasi sambu na kupesa bimenga ya mayembe na nsungi ya madidi.

Kansi bapizio ke vandaka ve ti kikalulu ya kukwenda na bansi ya nkaka. Yo yina na Izraele yo vandaka kumonana konso ntangu kukonda mpasi. Diambu ya kuluta mbote kele nde, bo vandaka kusansa bapizio na banzo. (Tala mpi Yoane 2:14, 16.) Mukanda mosi (Bible Plants and Animals) ke tuba nde: “Na babwala mpi bambanza yonso na Palestine bantu vandaka kusansa bapizio na banzo na bo. Konso muntu vandaka ti nzo na yandi ya bapizio to dibulu mosi na kibaka ya nzo na yandi sambu na kusansa bapizio.”—Tala mpi Yezaya 60:8.

Yehowa monisaka nde yandi ke zolaka beto mpi nde yandi ke vandaka ve makambu ngolo mutindu yandi ndimaka nde bantu ya Izraele kupesa bimenga ya bandeke yina vandaka kumonana kukonda mpasi.