Yezu vandaka kulonga bantu na kuzinga na ngemba. Kansi kilumbu mosi yandi songaka balongoki na yandi nde: “Beno yindula ve nde mono kwisaka sambu na kutula ngemba na ntoto; mono kwisaka sambu na kutula ngemba ve, kansi mbele ya bitumba. Mono kwisaka kutula kukabwana, na kati ya mwana-bakala ti tata na yandi mpi mwana-nkento ti mama na yandi mpi nkento ya makwela ti bokilo na yandi ya nkento.” (Mat. 10:34, 35) Inki Yezu zolaka kutuba?

Yezu zolaka ve kukabisa bantu ya dibuta mosi. Kansi yandi zabaka nde malongi na yandi ta kabula mabuta ya nkaka. Yo yina, bantu yina ke zola kukuma balongoki ya Kristu mpi ke zola kubaka mbotika fwete zaba nde bantangu ya nkaka bantu ya mabuta na bo ta sepela ve ti lukanu yina bo me baka. Bantangu ya nkaka, bankwelani na bo to bantu ya mabuta na bo lenda telemina bo mpi yo lenda vanda mpasi sambu bo landa kaka kukangama na malongi ya Kristu.

Biblia ke lombaka Bakristu na kuzinga na “ngemba ti bantu yonso.” (Bar. 12:18) Kansi malongi ya Yezu lenda kuma bonso “mbele ya bitumba” na mabuta ya nkaka. Yo ke salamaka ntangu muntu mosi ya dibuta me ndima malongi ya Yezu kansi bankaka ke telemina yo. Kana yo salama mpidina, bantu ya dibuta yina ke kumaka “bambeni” ya muntu yina ke longuka kieleka.—Mat. 10:36.

Bantangu ya nkaka balongoki ya Kristu yina ke zingaka nzo mosi ti bantu yina ke sambilaka ve Yehowa fwete baka lukanu ya kusepedisa Yehowa mpi Yezu to ya kusepedisa bantu ya mabuta na bo. Mu mbandu, bantu ya mabuta yina ke sambilaka ve Yehowa lenda sosa kupusa bo na kusala bankinsi ya mabundu ya luvunu. Yo yina, yo ta lomba nde bo pona nani bo ta sepedisa. Yezu tubaka nde: “Muntu yina ke zolaka mingi tata to mama na yandi kuluta mono me fwana ve na kuvanda longoki na mono.” (Mat. 10:37) Ya kieleka, bangogo yina ya Yezu ke tendula ve nde bantu yina ke zola kukuma balongoki ya Yezu fwete zolaka diaka ve bibuti na bo mingi. Kansi yandi longaka bo mutindu ya kupona mambu ya kuluta mfunu na luzingu na bo. Kana bantu ya dibuta yina ke sambilaka ve Yehowa ke telemina bikesa yina beto ke sala sambu na kusambila Yehowa, beto ta landa kuzola bo kansi beto fwete vila ve nde zola na beto sambu na Yehowa kele kima ya kuluta mfunu.

Ya kieleka, yo ke salaka beto mpasi mingi kana bantu ya dibuta na beto ke telemina beto. Ata mpidina, balongoki ya Yezu fwete vila ve mambu yina Yezu tubaka. Yandi tubaka nde: “Konso muntu yina ke ndima ve nti na yandi ya mpasi mpi ke landa mono ve me fwana ve na kuvanda longoki na mono.” (Mat. 10:38) Yo ke tendula nde kana bantu ya mabuta ya Bakristu ke telemina bo, Bakristu yango fwete kanga ntima sambu bo ke zabaka nde yo kele na kati ya bampasi yina bo ke ndimaka kukangila ntima na luzolo yonso. Bo ke ndimaka kibeni nde kana bo ke monisa bikalulu ya mbote bantu ya mabuta na bo lenda soba mabanza na bo mpi bo lenda ndima kulonguka mambu ya Biblia.—1 Pie. 3:1, 2.