“Babakala fwete zola bankento na bo mutindu yina, bonso nitu na bo mosi. Bakala yina ke zolaka nkento na yandi ke kudizolaka yandi mosi, sambu ata muntu mosi ve ke mengaka nitu na yandi mosi, kansi yandi ke disaka yo mpi ke kebaka yo.”​—BAEFEZO 5:28, 29.

Bakala kele mfumu ya dibuta. (Baefezo 5:​23) Kansi bakala ya mbote ke vandaka ve makambu ngolo. Yandi ke pesaka nkento na yandi valere mpi yandi ke lungisaka bampusa na yandi ya kinsuni. Yandi ke salaka nde nkento na yandi kumona nde yandi ke zolaka yandi. Yandi ke salaka mpi yonso sambu na kupesa yandi kiese na kisika ya kulomba yandi na kusala kaka mambu yina yandi ke zola. (Bafilipi 2:4) Yandi ke songaka nkento na yandi na pwelele yonso mutindu yandi ke kudiwa mpi mambu ya yandi ke yindula. Yandi ke widikilaka mambu yina nkento na yandi ke tuba. Yandi ke pesaka yandi ve mpasi na nitu to ke tubilaka yandi ve mambu ya mbi to ya nku.—Bakolosai 3:19.

“Nkento fwete vanda ti luzitu ya mudindu sambu na bakala na yandi.”​—BAEFEZO 5:33.

Kana nkento ke zitisa bakala na yandi mpi ke pesa maboko na balukanu ya yandi ke baka, yandi ta sadisa dibuta na kuvanda na ngemba. Kana bakala na yandi me sala kifu, yandi ke monaka yandi ve mpamba, kansi yandi ke landaka kudikulumusa mpi kuzitisa yandi. (1 Piere 3:4) Kana yandi ke zola kubenda dikebi na yandi na diambu mosi, yandi ke ponaka ntangu ya mbote sambu na kusala yo mpi ke solulaka ti yandi na luzitu.​—Longi 3:7.

“Bakala ta . . . kangama ti nkento na yandi, ebuna bo ta kuma nsuni mosi.”​—KUYANTIKA 2:24.

Kana bakala ti nkento me kwelana, bo ke kumaka banduku ya ngolo. Yo yina, bantu yina me kwelana fwete sala yonso sambu makwela na bo kulanda kuvanda ngolo. Sambu na yo, bo fwete solulaka na masonga yonso mpi kusadilana mambu na mawete. Bo fwete kangama kaka bo zole mpi ata muntu mosi ve fwete vukisa nitu ti muntu yina kele ve nkwelani na yandi. Kana nkwelani mosi me sala diambu ya mutindu yina, yandi ta pesa nkwelani ya nkaka mpasi mingi. Yo ta pusa nkwelani mosi na kutudilaka diaka ve nkwelani ya nkaka ntima mpi yo lenda sala nde bo kabwana.​—Baebreo 13:4.

“Longa mwana na nzila yina yandi fwete kwenda; ata ntangu yandi ta kuma mbuta, yandi ta yambula yo ve.”​—BINGANA 22:​6, noti na nsi ya lutiti.

Nzambi me pesaka bibuti mukumba ya kulonga bana na bo. Yo ke tendula nde bo fwete longa bo bikalulu ya bo fwete vanda ti yo mpi kupesa bo mbandu ya mbote. (Kulonga 6:​6, 7) Kana mwana me sala kifu, kibuti ya mbote ke sadilaka yandi ve  mambu na nku. Yandi “fwete wa nswalu, yandi fwete nwanina ve na kutuba, yandi fwete wa makasi nswalu ve.” (Yakobo 1:​19) Kana kibuti me mona nde yandi fwete pesa mwana ndola, yandi fwete sala yo na zola kansi ve na nsi ya makasi.

“Bana, beno lemfuka na bibuti na beno . . . ‘Kumisa tata na nge ti mama na nge.’”​—BAEFEZO 6:1, 2.

Bana fwete lemfukila bibuti na bo mpi kuzitisa bo mingi. Kana bana ke kumisa bibuti na bo, yo ta sala nde dibuta kuvanda na kiese mpi dibuta ya mvimba kuzinga mbote. Bana yina me yela ta pesa bibuti na bo lukumu kana bo ke sala yonso sambu na kulungisa bampusa ya bibuti na bo. Mu mbandu, bo lenda landa kuyidikila bo nzo to kusadisa bibuti na bo na mbongo.—1 Timoteo 5:3, 4.