BAMBISI mingi ya ke nwisaka bana na yo yina ke zingaka na masa ya madidi ke vandaka ti mpusu ya kele ti mafuta mingi na nsi na yo; mpi mafuta yango ke sadisaka sambu nitu na yo kuvanda kaka tiya. Loutre ya nzadi-mungwa ke sadilaka metode ya nkaka sambu na kuditanina na madidi—yo ke vandaka ti mika mingi kibeni na mpusu na yo ya nganda.

Beto tadila diambu yai: Loutre ya nzadi-mungwa ke vandaka ti mika mingi kibeni kuluta bambisi yonso yina ke nwisaka bana na yo; yo ke vandaka ti mika kiteso ya 155 000 na santimetre mosi. Kana loutre ke kasa, mpusu na yo ke bumbaka ndambu ya mupepe pene-pene ya nitu na yo. Mupepe yina ke taninaka yo sambu masa ya madidi kusimba ve nitu na yo mpi kukulumusa ve tiya ya nitu na yo.

Bantu ya siansi ke ndimaka nde beto lenda baka dilongi na mika ya loutre ya nzadi-mungwa. Bo me mekaka kusala bakazaka mingi ya mika-mika; bo ke sobaka nda ya mika to mpwasa yina kele na kati ya mika. Bantu ya ke salaka bansosa me monaka nde “kana mika kele mingi kibeni mpi nda, kitini yina kele ti mika ta pesaka tiya mingi to yo ta polaka ve kana masa kusimba yo.” Na kutuba ya nkaka, ba loutre ya nzadi-mungwa ke vandaka ti mika yina ke taninaka yo kibeni na madidi.

Bantu ya ke salaka bansosa ke ndima nde bansosa na bo ta sadisa bo na kusala bilele ya mpa yina ta polaka ve kana masa kusimba yo. Diambu yai lenda pusa bantu na kudiyula kana yo ta vanda ve mbote nde bantu yina ke kasaka na masa ya madidi kulwata bakazaka ya mika-mika, yina me fwanana ti mika ya loutre ya nzadi-mungwa!

Nki nge ke yindula? Mika yina ke sadisaka loutre ya nzadi-mungwa sambu nitu na yo kuvanda kaka tiya, bo gangaka yo? To keti yo kudibasikilaka?