4 Nunga Bantembe na Nge

“Nge muntu ya lukwikilu ya fioti, sambu na nki nge vandaka na ntima zole?”​—Matayo 14:31.

SAMBU NA NKI YO LENDA VANDA MPASI? Bantangu yankaka, ata balongoki ya Yezu vandaka kutula ntembe. (Matayo 14:30; Luka 24:36-39; Yoane 20:24, 25) Ya kyeleka, Biblia ketubaka nde kukonda lukwikilu kele “masumu yina” kekangaka beto kukonda mpasi. (Baebreo 12:1) Ntumwa Polo kusonikaka nde, “Bantu yonso ve” kevandaka ti lukwikilu. (2 Tesalonika 3:2) Yo ketendula ve nde bantu yankaka lenda monisa ve kikalulu yai. Kansi, bantu mingi kesalaka ve ngolo sambu na kukuma ti kikalulu yango. Nzambi tasakumuna bikesa ya bantu yina kesala ngolo sambu na kukuma ti lukwikilu.

INKI MUTINDU NGE LENDA NUNGA DYAMBU YINA YA MPASI? Zaba mambu yina kesalaka nde nge tula ntembe. Mu mbandu, longoki Toma kundimaka ve nde Yezu kufutumukaka, ata nkutu balongoki yankaka kutubaka nde bo monaka yandi.  Toma kuvandaka na mfunu ya banzikisa. Inki kusalamaka? Yezu kupesaka yandi banzikisa yina yandi vandaka na yo mfunu sambu na kuvanda ti lukwikilu ya ngolo.​—Yoane 20:24-29.

Na nzila ya Biblia, Yehowa Nzambi kepesaka bamvutu yina beto kele na yo mfunu sambu na kukatula bantembe na beto. Mu mbandu, bantu mingi keyambulaka kukwikila na Nzambi sambu bo ketubaka na pwelele yonso to ve nde yandi muntu kele na kisina ya bitumba, mubulu, mpi bampasi yina bantu kekutana ti yo. Inki Biblia ketuba na dyambu yai?

Nzambi keyalaka ve na nzila ya baguvernema ya bantu. Yezu kutubaka nde Satana, kigangwa ya kimpeve ya kemonanaka ve, kele “mfumu ya nsi-ntoto yai.” (Yoane 14:30) Satana kusongaka Yezu nde yandi tapesa yandi kiyeka na zulu ya bimfumu yonso ya ntoto kana yandi sambila yandi, na ntangu yandi tubaka nde: “Mono ta pesa nge kiyeka yai yonso ti lukumu ya bimfumu yai; sambu mono me bakaka kiyeka yai, ebuna mono lenda pesa yo na konso muntu yina ya mono zola.” Yezu kubuyaka ve nde Satana kele ti kiyeka ya mutindu yina. Kansi, yandi tubaka nde: “Bo sonikaka na Mukanda ya Nzambi nde: ‘Nge fweti samba Mfumu Nzambi, Nzambi na nge. Kaka yandi mpamba nge fweti samba!’” (Luka 4:5-8) Bantu kele na kisina ya bampasi ya nsi-ntoto kele Satana ti baguvernema ya bantu, kansi Nzambi ve.​—Kusonga 12:9, 12.

Kubika fyoti, Yehowa Nzambi takatula mambu yonso ya kepesaka bantu mpasi. Yandi meyidikaka dezia Kimfumu, to guvernema, yina kele na nsi ya lutwadisu ya Mwana na yandi, Kristu Yezu, sambu na kuyala bantu. (Matayo 6:9, 10; 1 Korinto 15:20-28) Na kulungana ya bambikudulu ya Biblia, nsangu ya mbote ya metala Kimfumu yai kele na kulongama ntangu yai na nsi-ntoto ya mvimba. (Matayo 24:14) Kubika fyoti, Kimfumu yai takatula bantu yonso yina ketelamina yo mpi mambu yonso ya kepesa bantu mpasi.​—Daniele 2:44; Matayo 25:31-33, 46; Kusonga 21:3, 4.

INKI MAMBOTE NGE TABAKA? Bantu yina ketulaka ntembe kele bonso masa yina kekwendaka ndambu na ndambu na nzila ya konso mupepe ya “malongi ya bantu ya luvunu yina ke kusaka bantu ya nkaka na mayele na bo.” (Efezo 4:14; 2 Piere 2:1) Kansi, bantu yina kebakaka bamvutu ya kesepedisa na bangyufula na bo takuka ‘kuvanda na lukwikilu ya ngolo.’​—1 Korinto 16:13.

Bambangi ya Yehowa, bambasisi ya zulunalu yai, tazola kusadisa nge na kuzwa bamvutu na bangyufula yina lenda sala nde nge tula ntembe. Bo kebinga nge na kuvukana ti bo mpi na kutadila malongi na bo nge mosi. Kana nge sala mpidina, lukwikilu na nge na Nzambi takuma ngolo mpenza.

Sambu na kuzaba mambu mingi, tala kapu ya 8, “Kimfumu ya Nzambi Kele Inki?” mpi kapu ya 11, “Sambu na Nki Nzambi Mepesaka Nzila na Bampasi?” na mukanda Inki Biblia Kelongaka Mpenza? a

[Noti na nsi ya lutiti]

[Kifwanisu ya kele na lutiti 9]

Bantu yina kebakaka bamvutu ya kesepedisa na bangyufula na bo kele ti fondasio ya ngolo sambu na lukwikilu na bo